啱啱過咗加拿大國慶,總算可以整理五月去三藩市啲相。今次呢就特別少少,見唔見到今次嘅主題同「金句王」其中一首歌同一齣戲有關呢? 是咁的:話說我啲上司們去美國開會,最後一站喺三藩市;咁我淨係去三藩市嘅,咁我就先從多倫多出發,去到後攞車就等上司們到。問題係:佢哋係夜晚機到! 咁得喇!既然都有六七個鐘頭空檔時間,我打骰:第二次親自揸上金門橋! 仲錄咗片添!睇睇... 有揸開101北行線嘅朋友都知道,行完金門橋後就會經過一個叫做Sausalito嘅小鎮。咁大家明白點解同今日個主題有關啦? 因為「金句王」有首歌的確叫做Sausalito,即係「及時擁抱」嘅英文版!齣戲名係「一見鍾情」,都一段時間㗎啦。 去旅行又好,去公幹都好,若果可以欣賞沿途景色當然好啦,但係可以特登停低部車,最好! 點擊圖片放大 +4 但願 及時伸手擁抱 將一身的保護色都脫下 你叫我發覺原來還會牽掛 (睡著亦懂得牽掛) 但願 及時開始擁抱 不必花花天地中一個玩耍 (孤單多可怕) 凝望世界變化 變二人的畫 自由行咗一段時間,見肚餓就搵地方食嘢。咁啱我經過一間漢堡包餐廳,睇吓有乜嘢食啦,跟住就有侍應出嚟問我入唔入嚟食,因為就嚟閂舖喎!唔理咁多即刻嗌嘢食! 加州本土有氣酒 Barefoot Bubbly Brut Cuvee Sausalito Burger有蛋、瑞士芝士、同埋牛油果!份量啱啱好㗎! 咁就成為我嘅晚餐咯(西岸時間六點食,對應東岸九點,唔算遲食晚飯嘅) Napa Valley Burger Co. 670 Bridgeway Sausalito, CA 94965 +1-415-332-1454 注意:營業時間為每日10am至6pm 不過飲咗酒唔可以即刻揸車,所以再自由行多一個鐘先揸番入去三藩市。 熊出沒注意 點擊圖片放大 +4 Sausalito主幹就喺Bridgeway呢條大街 如果有網友打算去三藩市玩,Sausalito值得去㗎! 番外篇一:我部租車食生化燃料! 喺美加你部車有機會可以入電油或者Flex Fuel。但係加拿大Flex Fuel設施嚴重缺乏,得物無所用,但係美國就唔同啦。佢標榜用粟米轉化成Ethanol而成嘅生化燃料。通常都係E85,即85% Ethanol, 15% Petrol咁樣。 雖然E85燃燒產生嘅能源比電油弱,耗油仲差過入電油,但係油費好平! 留意車尾有冇Flex Fuel標誌先好去搵Flex Fuel油站 點擊圖片放大 +3 咁樣慳法,公幹都冇咁重皮嘛,仲環保添! 番外篇二:我知點解我鍾意三藩市啦 公幹後冇耐我再踏上回港嘅路途啦。我喺我留港最後一日去番去港大睇睇,不竟都有八年冇番去咯。 咁熟悉港大area嘅網友都知去半山區都係近嘅。結果就直接解釋點解我會對三藩市有莫名其妙嘅歸屬感啦... 咁嘅斜路同我喺三藩市揸過有乜分別? 點擊圖片放大 落低波再加落山控制系統啦(如適用) (按:我喺三藩市部租車有落山控制系統。理論上香港用得著,可惜不設右駕版,按運輸處法例唔出得牌!) 真係同三藩市downtown好似! 番外篇三:身份認同 呢個我必須要講。 七一除咗係加拿大國慶,亦係香港特別行政區成立紀念日。所以作為加籍港人就難免有百感交集嘅感覺。 移民耐咗,話「我愛加拿大」當然無可厚非,唱國歌O Canada梗係大聲啲(雖然我習慣擺右手喺胸前就算,同美國人一樣;當然加拿大並無「擺右手喺胸前」之例);的確生活真係舒適過香港好多好多。 但係計我話,亦唔及講句「我係香港人」嚟得更貼切。 我唔求生活舒適,只求有一個有幹勁、有挑戰嘅生活,唔好停留喺舒適區,願足矣。 既然眾多香港人(不論係留港定係移民多年嘅,包括屋企人、朋友、同學、同事)都喺我生命俾咗我唔少支持同鼓勵,我唔話自己係香港人豈不是忘恩負義?至少都要共同進退啦! 跌得起輸得起 搵塊鏡照下自己 香港人至叻 唔駛靠人個個靠自己 唔怕攬住一齊死 駛乜怕從頭做起 要有訂企 首先要企硬自己 (粵)我係香港人 (英)I am Hong Konger (法)Je suis Hongkongais (馬)Saya orang Hong Kong (閩)Wa si Heong Gang nang 好,寫到呢度先!下一期就整理我喺馬來西亞嘅發現啦!照樣嚟我臉書專頁睇吓,呃個like先啦!唔呃like點睇到最新嘅post呢?哈哈!