2018復活清明假特別企劃:柬埔寨(二)樹不「柬」單義遊點滴

終於嚟到今次柬埔寨之旅嘅戲肉啦。我哋搭咗兩個幾鐘頭巴士去到CYA Ruseydom Village,開始義遊生活。離開市區咁遠,我已經有哂心理準備村落嘅簡樸生活。冇錯,蛇蟲鼠蟻走唔甩,沖涼如廁要稍為將就吓,但都好快適應。不過個營地嘅屋係非常企理!

略略講吓今次樹不「柬」單義遊嘅目的:了解柬埔寨村民嘅迫切需要,協助種植同傳授技巧,從而改善生活。同鄰國(越南、泰國)一樣,都係種米種菜牧畜,但係太多雨浸死啲農作物,太少雨又手停口停。既然香港資源尚算豐富,傳授技巧呢方面係好重要。

而呢次我哋主要種嘅樹係辣木子樹 (Moringa),其特點係乾旱天氣時都可以生長,而成棵樹嘅種子呀、葉呀、根呀都食得,有藥用功效。(最基本可以沖茶啦,當然做番梘嘅材料都得!)

(聲明:以往我嘅網誌喺公網盡可能唔會影到我啲旅伴嘅,以示尊重私隱啦;同埋我落手落腳做嘢點去影相吖。不過今次啲相可能會影到,希望唔好介意喔!)

去到柬埔寨,梗係學幾句柬文旁身啦。最起碼打招呼同買賣都聽得明先啦。

喺語文學我哋可以咁樣類比:泰文同寮文基本共通,好次英美甚至澳洲英文咁(如果用泰北嘅方言,效果更佳)但係柬文呢?就好似德文咁,不能共通,要特別去學。

雖然我出發前特登買東南亞語言書頂住,加上Youtube有唔少柬文教學,但係始終有當地人教同直接應用會進步得快。

學好啲柬文後,就開始家訪啦。

我哋拜訪其中一戶人家時,發現個水井壞咗。零件唔係話好貴(大概廿蚊美金左右),但奇就奇在冇人去整!又冇後備水源,好論盡。之後我同啲組員討論其實有冇辦法去籌集資金同人力去整番好佢…

返到營地後,我哋去學習種樹嘅技巧。因為我哋之後會去唔同村民嘅屋企去種樹之餘,仲要喺嗰度瞓一晚,作為交流。

我嗰組被安排咗去一個一家四口嘅屋企,homestay爸爸係做老師嘅。但係適逢清明(原來我哋homestay係柬埔寨華人後代!),要拜山,所以我哋去支援其他組先。

柬埔寨嘅土地肥沃,種嘢其實好得,但係有多啲know-how去傳授,咁就錦上添花啦

我哋去支援嘅村民屋企;佢嘅辣木子樹生得唔錯喎

出面煮飯㗎

開始體力勞動啦。柬埔寨天氣熱,鋤泥、撈有機物料要用嘅力量係明顯多過平時喺香港種嘢、甚至做粗重嘢、做gym!雖然好快攰,還好我平時做開gym都頂得順,同夠水去飲。

行番去營地時影低嘅農地

之後我哋分幾轉電單車去我哋個homestay,繼續種樹,總共種咗五棵!稍作休息後同homestay小朋友玩,後來透過翻譯(其實係營地嘅柬埔寨朋友)得知原來村落有人結婚,屋企就家姐去婚宴,就問我哋去唔去埋一份!一個難得嘅機會,梗係要試吓啦!

我嗰組兩男三女,女組員就走去幫homestay家姐化妝,當然先用最熟手嘅港式方法啦。後來homestay媽媽幫手埋尾,用柬式方法(當然濃好多,但係佢哋carry到!)我同另一個男組員就喺度做阿四,出去買嘢飲拎番homestay。

文化交流就咁開始:港式韓式柬式化妝應用!

原來村莊附近有間髮型屋。Homestay家姐走去set頭,亦見到其他女仔去排隊,似乎都係一樣參與婚宴

一個ah-ha嘅念頭出現咗:當我去觀察呢個村莊嘅時候,留意到雖然物資冇大城市咁豐富,但係村民同村民之間嘅互動係好親密。而見到佢哋嘅生活有知足嘅心態時,不禁令我去思考:我哋香港人嘅生活可否去番呢個位,唔為物質太過執著?好難,但唔係做唔到。

Homestay後院嘅牛

終於要出發去婚宴啦。我冇影低homestay家姐盛裝嘅樣子,但有我x年前喺加拿大中學grad din時啲女仔盛裝打扮嘅感覺!一下子有個「吾家小孩初長成」嘅感覺(喂)

喺柬埔寨參加婚宴期間,賓客先食哂啲嘢先,通常有柬式火鍋同海鮮;而台上有現場樂隊表演。(啲音樂超大聲!)之後新人先至出場接受大家祝福!而嗰段時間,賓客就可以交低人情俾人,仲要係即時記錄人情金額!(即場拆人情嘅橋段?)但係放心:人情明顯平過香港甚至美加:只需10 USD或者40,000 KHR!之後就跳舞跳到幾夜(YEAH)都得!

有沙律菜、火鍋;比起香港食幾味餸,簡單又平實得多

咖喱蝦好好食喔!

工作人員準備結婚蛋糕,等新人嚟到時做切餅儀式

最美嘅畫面:新人互相合十祝福,祈求婚姻生活美滿

恭喜呢對新人:白頭偕老、永結同心!

講起跳舞,柬埔寨人傳統舞蹈叫做romvong,即係圍住個大圈、手轉轉咁慢慢跳。個個都識跳㗎。我先前睇過Youtube片啲柬文歌啲MTV略知一二(例子),結果變咗即場跳。我用手機Google翻譯(英譯柬)問其中一個哥仔做一個示範,跟住我做埋一份,佢好開心見到我呢個外籍人士pick up得幾快!

柬人港人一齊跳

呢位歌手嘅唱腔同台灣嘅阿吉仔好似!(可能大家唔知邊個係阿吉仔,留意佢嘅首本名曲命運的結他聲

舞照跳

Homestay家姐話要早走(始終又唔好玩太夜),咁我哋就等老師接番我哋番歸,但佢就跟佢啲朋友嘅電單車回家!費時要老師佢擔心,我打咗個信息話家姐出咗發,佢似乎話俾我知「當然冇問題,呢度啲後生仔女係咁㗎。」番到去仲有得食:有肉有湯同生果!芒果仲要係點椒鹽去食,好特別但好易接受到嘅食法。

就寢時,都同啲組員分享咗點解參加義遊,同人生方向… 其實好開心㗎,可以了解同認識大家更深…

第朝番到營地就學整辣木子番梘啦。點知我嘅身體突然發生狀況:好攰同肌肉輕微抽吓抽吓,仲要係大熱天時發生咁嘅嘢!我盡量放慢步伐去頂硬上,但不得要領。結果同組長商量後要強制休息,去隔離屋瞓!點知有其他女組員都發生唔同狀況!

後來再深入了解,係因此之前種樹所需能力勁過龍,又天口熱,加上用甜嘅飲品頂住(冰咖啡、冰青檸茶之類),難怪出事!再對比熱衰竭同中暑症狀,我驚覺同前者相似!休息過後同補充水份後,啲能源番嚟啦,可以繼續參與活動。

呢個義遊有一日自由活動:去附近嘅街市觀察買賣情況、參觀另一個CYA營地(主要係種紅樹mangrove)、同埋胡椒之鄉貢布(Kampot)!

先講吓去市集嘅目的。除咗買嘢食,我哋利用呢個機會了解辣木子嘅產品可以喺嗰度點樣擺檔同賣。

啲魚直接放喺地下賣

話說我喺呢個生果店重遇紅毛榴槤 (Soursop),仲喺度買埋番去營地!(一個要2 USD或8,000 HKR)不過嗰底熟過頭,要處理後先食得。

炸黃蜂!出奇地好味,好有食花生同popcorn chicken嘅感覺。可能連啲香料都炸得好好香啦。

時令西瓜,梗係買幾個番去啦

下一站去CYA另一個營地。其實亦都係旅館嚟,幾靚㗎。

柬式烤魚

去到貢布,就好好休息吓啦。去按摩店鬆吓(3 USD 或12,000 KHR半個鐘起跳)、飲咖啡望對面岸… 係舒服嘅。同時間大部份組員去就近嘅市場買榴槤食!

成個榴槤像喺度!難怪啲組員突然想食榴槤啦…

喺貢布,可以去遊船河睇螢火蟲!

燃燒青春在高綿

柬式牛柳粒飯

東南亞常見嘅景色

手機影唔到螢火蟲閃吓閃吓,但肉眼係睇得好清楚

落船,準備番營地

歡迎使用美金和柬幣!(按:有啲菜色冇英文翻譯,肯定係地道菜。其中一個係炸香蕉片雞肉之類嘅嘢)

去到義遊最後一日,就係同村民互動嘅時間。朝早就教佢哋整番梘,晏晝就整一包包辣木子種子同泥土,同小朋友玩遊戲。最後我哋每組整一味香港家常菜同村民分享。當然啲村民整咗柬埔寨甜品俾我哋試吓啦。

啲番梘整好啦。等佢風乾一個多月,令到酸鹼值去到中間就用得。

英柬雙語教授

喺市集買嘅紅毛榴槤食得啦

同小朋友玩咗好多集體遊戲

皮蛋、炒茄子

柬式格仔餅

柬式甜品

就係咁樣,呢一個禮拜過得好充實。義遊部份就喺呢度結束,回程番去金邊啦。

後記:

出咗嚟社會做嘢多年,一直都有思考社會責任同世界公民呢個課題。

先講社會責任:人生唔係淨係得做嘢賺錢,可以我哋利用唔同嘅強項,走埋一齊去幫咗人家,貢獻番個社會。至少我哋可以喺自己嘅地方(香港)做起。

論到世界公民,可能我自己主修國際貿易啦,比較容易了解外國嘅國情、文化。好多時我哋要親身經歷先至真係認識嗰個地方。喺鄉村嘅簡樸生活了解到佢哋嘅需要,就明白到有乜嘢可以落手落腳去幫手。再番到香港後,學到嘅嘢都會跟住我哋,甚至可以直接應用添。

同一時間我又會諗:先搞掂本地,然後再衝出去,都係可取。最緊要係能力許可。

而呢個義遊最大得著,就係生活其實可以好簡單,同埋組員變成旅伴,好熱血咁一齊渡過長假期。Orb kun chrang (柬文:多謝哂。)

適逢執筆時係柬埔寨人新年。謹此祝各位朋友Sousdey Chnam Thmey(柬文:新年快樂!)

希望大家留意主辦方嘅臉書或網頁,睇吓下次有邊個義遊可以參與!
VolTra (Facebook)
Plant for Water

第三集:chill住遊金邊!敬請留意!

臉書專頁:在此

This entry was posted in 其他, 柬埔寨. Bookmark the permalink.