2018復活清明假特別企劃:柬埔寨(一)準備工作,初到金邊

喺好多背包客嚟講,去亞洲旅行首選嘅地方除咗泰國外,就係柬埔寨。

當我仲喺北美生活嘅時候就覺得柬埔寨呢個國家好特別,希望有機會走一轉。結果喺我回港生活一年後,呢個機會終於成為現實,仲要係以義工遊呢個方式入去。

義工遊,或者好似台灣人咁講志工旅遊,self explantory啦,係咪?原則上,我哋喺唔做成他人負擔,而自己有個心智去幫當地人做一樣特別嘅嘢,而最後帶走嘅係快樂嘅回憶同心智嘅成熟,咁義工遊先係成功。

今次小弟有幸參與由本地義遊團體VolTra同Plant for Water聯合舉辦嘅樹不「柬」單義工遊,由3/30 – 4/5喺柬埔寨嘅村落種樹同認識生態環境。我會喺下一篇會有詳盡介紹,但起行前緊係有啲準備工夫啦。

攞簽證

除非有讀者喺ASEAN國家居住,否則所有人都要攞入境簽證。以下三個途經去申請簽證(及其利弊):

  1. 電子簽證:上網上載哂啲嘢就得,信用咭俾錢(總共40 USD左右,未計信用咭外匯費),等回覆啫;不過曾經試過有人申請咗但冇電郵回覆搞到好論盡,仲上咗報紙。但以我所知絕大部份人申請咗都冇事。
  2. 落地簽證:準備30 USD現金,加證件相同護照副本就得,但坊間話有海關索賄嘅風險!我喺金邊機場入境時見唔到有人中招,但當然啦索賄係唔可以做啦。
  3. 親自到領事館遞表:同上但準備290 HKD現金去星光行一轉。雖然開放時間對打工仔有少許不便(平日9am-1pm, 2pm-5pm),但係超快走得!我特登喺9am去到星光行,前面一個外籍人士去排啫,我遞表同攞番護照只需10分鐘!同埋一下子免咗以上兩個方法嘅弊處,所以值得跑一轉!

柬埔寨駐港領事館
地址:尖沙咀梳士巴利道3號星光行12樓1218室

貨幣兌換

柬埔寨嘅法定貨幣係里爾(Riel;下稱柬幣),通常係1 USD兌4,000 KHR。但係由於歷史原因,美金大量流通超過八成!

由於香港用聯繫匯率,同美金鎖定7.75 – 7.85之間(執筆時港元就hit中弱方兌換保證㗎啦),所以我哋換美金係有著數。但係有樣嘢要注意嘅係啲紙幣唔好有破損,特別係10 USD以上,有少少裂痕就等同報廢!而我喺香港兌換嘅時候,未必一下子有大量1 USD同5 USD紙幣,如果搭tuk-tuk入去金邊,俾咗錢又驚司機冇錢找就麻煩…

而近呢一年柬埔寨政府鼓勵國民多啲使用柬幣,甚至要求商家如果商品低於100 USD就必需同時報上柬幣價錢。咁就得啦,我就帶咗啲港紙去到找換店直接換柬幣,而美金全部做後備。

當然啦,要搭tuk-tuk俾柬幣大家好做,我入咗境就做咗一個「財政自殺行為」:喺機場裡面嘅找換店換錢!係人都知個匯率有幾差㗎啦。不過咁,又唔係一炮過換哂啲港紙,預少一半嘅分量換頂一頂手先,其餘嘅一大半入咗金邊先換。(按:啲港紙係食完飯找錢找淨番嚟,冇咁肉痛嘛!)

真係唔好喺機場一砲過換哂港紙轉柬幣吖,喊都無謂吖

果然喺第二日,我同旅伴們去到俄羅斯市場時,喺附近嘅找換店換埋啲港紙轉柬幣,啲匯率靚好多!接待我嘅原來喺華僑,仲要係潮州人!雖然小弟唔係潮州人,但係用檳城福建話都溝通到!(本人認為接近潮州話嘅福建話,非我家鄉檳城莫屬!)間找換店喺450街嗰度,一見到櫃枱有唔同國家貨幣就啱㗎喇。

到咗金邊後就坐tuk-tuk去酒店安頓吓啦。一般嚟講由機場出發去酒店公價係7 USD起跳;由於先前柬埔寨方面都幫我其他旅伴們book咗,基於行李較大同每部只坐兩人(我哋四人同行住同一間酒店),每部tuk-tuk只需10 USD或者40,000 KHR!每人5 USD都抵吖。

大型tuk-tuk

酒店推介

我哋其實早到咗一日去金邊,瞓一晚就好啦,咁就揀咗Le Grand Palais Boutique Hotel。一入去就嘩,古色古香囉真係。不過有少少瑕疵係啲熱水唔夠熱。不過如果係其中一個節省能源嘅方法,將就吓都冇所謂嘅。

Le Grand Palais Boutique Hotel
地址:House 16, Street 130 Sangkat Phsar Thmey I, Daun Penh, Phnom Penh

夜遊金邊

之後我就開通咗Grab去叫車啦。喺柬埔寨,遊客基本上係唔可以揸車,因為要有柬埔寨車牌先得,就算我用加拿大同香港加國際駕駛執照都冇得傾!不過又未至於成為deal killer:叫車一樣方便。(按:Uber喺東南亞嘅營運已經歸於Grab啦)同類嘅有PassApp,可以先下載然後使用。

Grab明顯有個好處係可以收信用咭,喺app度加咭就得!(香港咭嘅請留意:唔該你同你電訊商開通roaming收SMS,否則你做唔到SMS認證就盞搞!)

之後就join大隊食welcome dinner,真係去認識其他嘅旅伴同組長。飯後仲去咗夜市一轉添,咁啱有人演唱柬文歌,當然坐低聽吓啦。

金邊夜市 (Psar Reatrey)
地址:Sisowath Quay, Street 1, Wat Phnom Commune, Daun Penh District, Phnom Penh

由於酒店同夜市好近,行番去就得啦。

尋找金邊凍咖啡嘅故事

第二朝就去俄羅斯市場(真係咁叫㗎,本名為Toul Tom Poung)睇吓啦,順便買吓嘢,自用或送禮兩相宜吖。之前咪講過用港紙直接換柬幣嘅?啲柬幣終於有用武之地!

去開市集嘅網友一定鍾意同店主講價,呢度都唔例外;但估唔到間接帶旺咗人哋生意,因為咁啱有一團後生仔去買嘢,見到我哋同店主咁好傾又買到嘢…

菠蘿3,000柬幣一個(我意外地買咗兩個去分嚟食。柬埔寨人習慣加辣椒粉上去,風味更佳,但我哋都係維持原味都好滿足。同埋係甜同爽囉!)

烤大蕉每串2,000柬幣

俄羅斯市場 (Toul Tom Poung)
地址:Corner of Street 163 and Street 444, Phnom Penh, Cambodia

話說我啲旅伴做咗資料搜集,發現裡面有間咖啡店,賣嘅凍咖啡好出名,但都搵咗好耐!問過唔少人點去之後,行到food court咁上吓嘅位置,就搵到啦!

連哥倫比亞人都讚好!

1蚊美金(4,000柬幣)一杯凍啡,加煉奶,消暑最佳選擇

後來更發展到買一大包咖啡粉番香港享用。一包2kg,四個人分就論盡啲;叫兩包呢,每人分到1kg都有排飲!一包盛惠11 USD或者44,000 KHR!我收齊錢之後就真係雙幣共用俾店主,個個都開心啦!(按:嗰時我應該有足夠嘅一萬柬幣紙俾,咁我入到營地都要用柬幣㗎)

Best Iced Coffee in Phnom Penh Facebook Page

受難節去Tuol Sleng,真係應景喇

大家有讀過亞洲歷史都知柬埔寨曾經有段黑暗時期。當赤柬喺1975-1979年統治柬埔寨時,情況非常牙煙,簡單講句就非我類別者死。而Tuol Sleng以前係中學,卻變咗做審自己柬埔寨人嘅地方。好人好者就咁拉咗,仲要係受到極不人道嘅對待。

為表尊重,我喺嗰度時冇乜點影相,但係去到感受到嘅氣場,咪話唔凝重㗎。

吐斯廉屠殺博物館 (Tuol Sleng Genocide Museum)
地址:St.113, Beoung Keng Kang III, Chamkarmorn, 12304 Phnom Penh, Cambodia
入場費:8 USD(包語音導遊)

差唔多要去機場集合啦。我哋番酒店攞行李再叫Grab,喺車度算係舒服呀,但結果大塞車!好在司機知道有條捷徑走。我哋到咗時都未算好遲,仲有時間買嘢飲添。

準備好為期一個禮拜嘅鄉村體驗未呢?

臉書專頁:在此

This entry was posted in 住宿, 外遊美食, 柬埔寨, 觀光, 購物. Bookmark the permalink.