自從香港快運登陸香港後,再加上國泰fanfare的promotion,多左好多香港人留意清邁呢個旅遊點。人妻身邊起碼有6位朋友話月內會出發。其中有朋友在上月用左$900買到hkexpress來回連稅機票,仲要係聖誕檔期。咁平!!!???真係唔去會對唔住自己囉。 人妻上年都係11,12月呢段時間同老公去清邁,呢一年黎我倆都成日嘈住想搵假期再番去! 接住落黎一連兩星期會為朋友仔推介清邁有咩好玩好食好住。 清邁位於泰國北面,係泰國第二大的城市。平時港人對泰國的印象會即時諗起陽光與海灘,但清邁位於內陸,被高山林木包圍。雖然冇沙灘,但連綿的山林,農地,河流等等自然靚景成為清邁的誘人之處。 清邁其中一個遊客必玩活動,就係叢林滑翔(zipline)。意思將個人吊在百幾米高的樹上,滑翔於綁在每棵樹之間的繩索,令你可以飛越叢林,穿梭於幾百米以上的樹幹,真正感受一趟泰山之旅 有好多唔同的公司有搞Zipline景點。人妻同老公選擇左JUNGLE FLIGHT http://www.jungleflightchiangmai.com/ 因為jungle flight的網站建立得好好。訂package容易指示又清晰! 而且價錢在多間zipline公司中算中價。玩一個朝早連午餐約HKD $600。 有朋友去過另一間公司 Flight of the gibbon, 睇到的景色係靚d,加上可以飛越農地。 但價錢就接近HKD $1000,就是乎你銀兩充足與否了。 其實清邁市內都有好多其他公司book Zipline day tour。但講規模同安全性呢以上呢兩間公司都係評價最好。始終都係危險性高的活動,唔好搵太平宜的公司呢! 清邁DAY TOUR活動例牌會有車黎到你酒店樓下接你。(落果住得離市區太遠,會另有pick up charge) 網上Book package的時候就可以選pick up time。到時坐在酒店lobby等就會有人來接你。 45分鐘車程後就到達jungle flight的base camp了! 到達後,工作人員會開始幫你著裝備。 很搞笑吧! 從basecamp行到去zipline約10分鐘。 我地ready set go!!!! 一開始當然係小試牛刀,比條又短又矮的zipline你玩玩。 真係矮到跌落去都唔怕…… 當你到達每個platform,未「起飛」前,都會有安全扣將你同大樹連接。所以就算興奮得濟行出左個platform,都唔怕會葬身樹林。 當你玩左兩三條碎料,就開始真正進入泰山mode! 飛呀飛~~~環顧四周都係密麻麻的大樹! 滑翔於一片綠海中! 望望腳下? 此乃粉身碎骨之地。 其實除左高之外,jungle flight其實唔太恐怖。 滑翔的一刻速度唔算好快,而且由A點去B點間的高度相差唔大,唔似玩機動遊戲有種攞你命的離心力。 同行的一群中國女仔,一開始因為怕高叫到拆天。 後來習慣左就不停叫爽。 當速度太快的時候,工作人員會拉緊條zipline,令你減速,就唔怕成個人飛撲落終點個platform 習慣以後仲可以鬆開手。(記住保持平衝,如果唔係個人可以半倒吊!) 除左Zipline以外,仲有吊橋,繩索網陣比你行來行去。 來到全日最high爆的一條Zipline了! 平時每條zipline的安全扣都扣在你前面,驚驚的話就可以捉實條繩, 但呢條zipline的安全扣係扣在你背脊位置,雙手係完全冇野捉到!!!! 呢個時候,你驚都要打開雙手, 表演一下大鵬展翅。 oh yeah~~~i'm flying~~~ 而全日最可怕的一條ZIPLINE,就係最後一條,將你從30米高空急速放下! 快到成個心真係有拋出來的感覺….. 點擊圖片放大 當然,條ZIPLINE有幾快就係工作人員控制。 但係唔好以為佢叫放慢D佢真係會放慢。 佢只會頭果兩秒放慢少少,再極速送你一程。嚇得我要死…… 全團人齊整回歸!!! Jungle flight 的工作人員講得一口流利英文。 而且好識帶氣分。除左奉送笑話(真係笑話唔係爛gag),亦都好有安全意識。 我地位團長叫monkey。人如其名,靈活性同跳脫性同一條馬騮無異。 仲經常會表演倒吊zipline工夫。 又會整蠱細膽的女生,令到佢地尖叫,佢就會好滿足咁哈哈大笑! 見唔見到monkey去左邊?? 真係非常挑皮又可愛的monkey哥哥。 去玩jungle flight的小貼士: 1) 做早起的鳥兒 早上的天氣比較清爽。如果下晝先開始太陽會曬住你頭頂。 所以選擇7點幾左右的pick up時間最好。 玩完食埋飯差不多12點。番到酒店1點鐘,可以安排整個下午去下一個行程 2) 記住做防蚊措施 樹林多蚊是常識吧! 因為全團人有十幾位,你等飛的一刻就係蚊蟲開餐的時候。請錫身。 3) 情侶可以孖公仔一齊飛 你要求就可以。當然兩個人一齊飛速度一定慢少少。但浪漫又好玩緊係要試番兩轉! yeah~~~~齊齊飛!! 4) 想SOLO flight 請不要最後一個出發 最後一個起飛的,工作人員會跟住你尾。一兩次叫佢幫你影下相拍下video就算吧….Solo flight自由好多! 5) 早上等pick up比d耐性 Hotel Pick up一向都係有遲冇早。人妻等了7個字才等到專車來。 大家唔洗怕係咪被違忘。其實網上完成booking,出發前再send個email confirm就一定唔會走你數。 只係要pick up 好幾團人,你又不能預期人家一定會準時。所以,耐心等等吧! 其實人妻都會推介膽小的朋友去試試。 因為恐怖都只係頭果幾分鐘的事。 來到清邁為的就係欣賞叢林景色,我諗冇咩其他方法可以令你如此零距離,又有趣味性地去感受樹林的美。 所以千其唔好錯過呢個化身泰山的機會呀!