浪漫hideaway–大澳文物酒店

 

一般人對大澳的印象就係漁村同蝦醬。

其實在大澳西面最「篤篤」的一角,有一所浪漫的白色小屋

 

呢所白色小屋,前身係舊大澳警署,係水警的辦公室。

2012年活化後成為一所酒店。主樓同副樓共有9間房出租。

 

客房門口好有殖民地時代的風格

 

每間客房會以大澳著名景點及海軍歷史命名,亦會說房間舊有用途。

人妻入住的套房叫做海獅.海豹。

係局長以前的睡房及警員酒吧。

 

 

房間外的走廊,採用英式開放圓拱設計。

零阻隔面向海景無極。

 

酒店晚上會開柔和的黃燈。又有另一番風味。

 

建於西面的小山丘上,被大樹包圍,遠眺都幾隱蔽

 

活化後亦加建左一間玻璃屋餐廳—Tai O Lookout

呢間餐廳的環境及設計真係爆分。

用左天然採光,加上全木色的色tone,令你同山上及海的環境融為一體。

咁浪漫的地方,聽講有情侶會book全場搞婚禮。

 

 

酒店每日由11點至6點會開放比公眾參觀,每日亦有導賞團介紹古蹟的歷史。

由於酒店位於大澳海皮的最西面,從漁村行入去約20分鐘,所以絕對係耳根清淨的避世熱點。

但想避得浪漫又有格調,有以下幾個訂房/入住貼士:

 

1)不要訂weekend時段

雖然打工仔們都係放六日,但周未入到去,唔洗指意搵到遠離煩囂的感覺。因為weekend大澳遊客量極多,去到所有角落都係輪住影相的人潮!

人妻同老公選了星期一二來。只有少量遊客來參觀影相。

若果真係閒日去唔到,建議3點check –in後出市區觀光,6點後番來。因為酒店對外開放時間只係11am-6pm. 第二朝先早點起床,慢慢參觀酒店每個角落。

 

2)訂房要訂一樓

9間房間中,只有3間位於1樓。其中兩間係套房,一間係雙人房。

因為酒店上層不准遊客參觀。(除左跟導賞團外),遊客唔會在你房外走來走去拍照叫囂,亦唔會有三五成群伏在窗外意圖偷窺你的房間。

 

3)最靚雙人房–「海虎」

唔想花太多錢住大套房,但又想有靚海景睇,可以book位於1樓的海虎雙人房。仲有兩個角度的海景。但荀野當然長期爆滿,要入住海虎請提早幾個月預約。

 

4)Book套房,住上層總好過住下層

上層套房以往都係警官級先可以用。當然係有原因啦!

呢個無極海景已解釋一切

 

仲可以坐出走廊,嘆杯茶,睇下書。

 

都係果句,荀野請提早預約。

 

套房內的格局,分開睡房及大廳。再加兩個大廁所。

套房保留火爐做裝飾。

對套房的感覺,一個字,大

住完後的評價,兩個字,很爽。

 

5)book 主題package,抵玩方便

酒店有唔同package。有浪漫之旅,生日package,文化體驗之旅。

其實呢d package主要係包左食。唔想食玻璃屋餐廳可以純book房。

但記得這裡是大澳…除非你慕名大澳海鮮而來,同埋可以接受行20分鐘出去搵食。

人妻因為牛一,所以book左個生日package。

夜晚就可以於玻璃屋內享受浪漫晚餐。

Set dinner 睇起來西式,但其實食材都係用大澳本老用料。叫左魚main course,非常好食。

 

生日package仲會有蛋糕同香檳送,真係浪漫到不得了…

 

早餐又包埋。早上lookout的景色又係另一個感覺。

 

 

6)放下你的公主皇子態度

Book房之前睇網上的評價,好多人都話硬件一流,但服務唔夠好。

其實酒店職員都係請番大澳本土居民。人地唔係由四季文華集團訓練出來的…

服務質素雖然唔可以同5星級媲美,但係會感覺到佢地想盡量幫助客人,滿足你的要求。大澳的居民其實好簡單好親切。你叫佢做A佢就會做A,唔好預設人地自動做埋BCDE比你。城市人奄尖又要求多多的心態,請在入住前放下。如果唔係辛苦的是自己

 

 

咁有靚房有浪漫餐廳以外有咩玩?

其實來過大澳的朋友仔都知道,大部份人會出去市集遊船睇下海豚,買番包蝦醬,食番餐海鮮。

如果book左酒店房來避世,想有深入體驗的朋友,可以試下人妻另類推介

 

推介一: 睇書

可以問reception借呢本大澳文物酒店的介紹書。

呢本係酒店落成的紀念冊。

入面有文物酒店的歷史,豐富的建築資料,同埋當年註大澳水警與原居民的趣事。平時經過書店,老老實實我唔會拎呢本書上手睇。但當你置身於古蹟內,配合四周舒適又有格調的環境,坐在戶外享受陽光時,凝望呢所白色小屋,再細閱以往在腳下發生的一點一滴,感覺好似同歷史互動中。

 

當我讀到前水警的生活,原來就係百無了賴望望海,吹吹水,飲下茶,我當下直情覺得自己過緊水警生活!

又讀到一章關於自己住的套房的故事,原來以前大廳位置係用作職員酒吧。當年水警鐘意玩飲啤酒比賽。成杯飲完後要掉轉放在頭上,直至全隊飲曬為止。當夜晚在房間開香檳時,都會莫名其妙地飲得特別開心。

保育文物的一大目的,就係令人去認識歷史。

住得入黎酒店,花少少時間睇睇書,認識多一點背後的故事。除左住完豪華靚房影曬靚相之餘,你會有更深的感受。

 

推介二: 睇日落

大澳出名睇日落靚。因為接近香港的最西面。

一般遊客會去市內的橋上睇日落。

但想睇得更清更正,可以去大澳街市後的石灘。

再懶d,酒店對出的橋都可以睇到正一正。

記得上網check定日落時間呀!

 

 

推介三 : 行山睇海豚

一入到大澳,就會有人問你睇唔睇白海豚呀?

其實有個方法唔洗出海都睇到。就係…

行上山頂!

大澳有一坐虎山,上到頂可以全無阻隔地睇到海岸。

人妻留在山頂一陣子,就聽到有海豚的叫聲! 不過我搵唔到佢個位置…叫左一分鐘左右就消失了….當然,睇唔睇到多數係運氣。

全程大約行一個鐘。山路起得好完善,亦唔算太斜。可以俯瞰曬全個大澳,視線清的日子可以睇到機場同東涌呢!

想避世,想浪漫,要情調,要親親大自然同感受歷史,找兩天放下手上的工作,來一趟大澳,一定令你感受良多。



留意: book房可以上大澳酒店的官網。

網上預早book仲有可能會有折呢!



http://www.taioheritagehotel.com/eng/homepage/Homepage

 

This entry was posted in 香港. Bookmark the permalink.

2 Responses to 浪漫hideaway–大澳文物酒店
  1. 尼泊爾人妻 says:

    Lotus:
    希望你1月去玩得開心:)

  2. *Lotus* says:

    計劃1月去, 謝謝分享~

Comments are closed.