日本。鳥取。米子 DAY 1

最近同隻肥貓去完挪威,冒起左一個想寫下呢D旅遊記錄既想法。就開左呢個BLOG,比自己有個位寫低。

就由第一次同肥貓一齊去旅行既地方——鳥取/島根/岡山縣寫起。

2018年5月 DAY1

我地一月到就已經買左香港航空既機票,由香港飛去米子。二月收到通知,話航班有變動。其實就係個飛行時間長左。

出發個日12:00既飛機,去到已經差唔多係日本時間17:00。個機場就好似D普通外國內陸機場咁細細地但又餓你唔死咁(實情係本豬飛番香港前散左好多錢既地方,因為有D係出面好似未見過)。拎埋行李就去搭電車去酒店。一黎就黎左架鬼太郎列車。去到米子市既酒店已經差唔多18:30了。

為左唔將D行李搬黎搬去,我地決定呢一個星期都住係同一間酒店。幫我地check—in果個人都好似有D嚇一嚇窒左咁,可能係因為米子市冇野值得遊客留咁耐?而事實上,酒店附近的而且確係得一間AEON可以行下睇下野。。亦都係我地每晚都會去一去既地方~因為要買宵夜呀,打下機呀,行下街呀。。等等

第一晚既晚餐,食左隻肥貓最鐘意食既壽喜燒。我地係旅遊書入面見到有間係米子市叫「和顏」既涮涮鍋同壽喜燒專門店。係GOOGLE MAP睇到間野同酒店係行得到既距離(好似都行左20分鐘),就去左試呢間餐廳。

間野係一棟活化左既舊建築物入面,我地都搵左陣,仲以為係咪冇開。我地行左入個建築物入面條巷仔,來回行左2,3轉先見到個舖頭名,見到有燈著左,就開門入左去。成間舖係得我地兩個人。

唔知係咪通常要預約先有得食呢?我地入到去店員就晤我係唔係MISS XX,而我個姓又真係XX喎!心諗:呢間野既人係有特異功能既?我就話我係MISS XX但就應該唔係做左預約個MISS XX喇。最後佢地都有比我地坐低食野~

我地用我地有限度既日文同英文落左餐。而店員同廚師都好盡力同我地解釋我地食緊既野係咩,仲會整埋D牛比我地食。

 

初時以為個餐好似好少野,得牛同菜,以為會唔夠飽。。點知原來仲有烏冬,年糕物體,同甜品,食到好飽好濟!大滿足!

大約咁就過左我地係日本既第一日。

This entry was posted in 日本 and tagged , , , , , , . Bookmark the permalink.