放假就梗係瞓晏少少,包囡都好識做,自動調節左,結果大家又係好趕咁去食早餐! 早餐時間去到10:00,基本上10:00就開始清走食物,所以一定要準時!野食都算唔錯! 點擊圖片放大 +6 日本早餐一定有飯,包生都唔執輸,自己砌左碗魚生飯! 呢到仲有個架放小朋友餐具,連bib都有,幾好! 早餐後出發~ 是日唯一行程:新札幌站 Fantasy Kids Resort https://www.fantasyresort.jp/sapporo/ 由札幌站搭JR,10分鐘就到新札幌站(快車,少左幾個中途站)。一出站我地向Sunpiazza方向出,呢到由幾個連住嘅商場合成,有Sunpiazza、Duo、Qualite Prix同Aeon,唔單止有好多小朋友野,亦有好多男女裝舖頭,好吸引!忍住先,我地先去搵playhouse。 Fantasy Kids Resort係商場尾,星期六朝早10點幾,都有唔少小朋友入左場。 我地買左「一日任玩放題」,小朋友¥1200+每位大人¥650,總共¥2500就可以玩足一日。 入到去先除鞋放入Lockers,注意⚠️:近門口堆Lockers係放鞋用!入場後再有Lockers放個人財物,BB車亦可以泊入裡面。 一入去即刻被小型滑梯吸引! 最近入口係為3歲以下小朋友而設嘅area,出入口特意整左啲閘,以防小朋友出走,家長可以放心! 點擊圖片放大 +3 今日timetable 行入啲,有大型放電設施: 波波彈床,真係好滑同好彈⋯⋯包囡係入面又跳又碌,彈左好耐! 是日最放電環節:大型滑梯,唔止放哂包囡電,連包生都腳軟!包囡始終未夠力,要包生幫手頂住,包囡先攀到上去。真係玩左好多好多好多次⋯辛苦哂! 側邊仲有個海賊船,可惜包囡未夠100cm高,玩唔到! 鱷魚滑梯 玩沙,我怕太messy,冇畀包囡玩,真係すみません⋯ 下層主打吹氣結構玩意,上層就走文靜風~ 先有cosplay場 佈景都有幾款畀你揀! Accessories都有~ (btw圖左位小朋友玩緊超長傳聲+傳口水筒) 任打街機(當然係舊野,不過包生都玩得好開心!) 另一邊廂:LEGO 區 小型車場 桌上遊戲:側邊一箱箱玩具自己拎上枱面玩,有砌火車、磁石形狀、膠形狀條等等 包囡最鍾意就係呢係啲屋仔入面煮飯仔,啲餸菜,煮食器具都好齊全! 就連牆身都有得玩 齊齊玩Bingo 攀石牆 呢到連toilet都好細心同baby friendly~ Playhouse入面有坐低休息食下野嘅地方,有雪糕汽水等小食賣(不過冇正餐)。我地千辛萬苦,終於拉到包囡出去食晏,係Duo1個邊食拉麵,食完再入去玩過!包囡為左玩,連晏覺都唔瞓! 包生嘅拍攝視角係咪好特別呢~ 下半場,包囡入去玩,包生繼續陪玩,包太可以出去消費!Yeah! 先係sunpiazza行個圈,買左少少自己衫褲。再行過Duo2 3樓搵包太最愛:アカチャンホンポ(akachan honpo)!雖然呢間唔係本店,冇咁大,但都有好多啱包囡嘅野!就快到夏天,有好多靚靚水著!花多眼亂~ 點擊圖片放大 +3 巧虎電動牙擦 巧虎尿片都有~ 當然仲有好多靚靚衫褲鞋襪、餐具、食物、玩具⋯⋯等等。時間有限,好快咁掃左啲衫、褲、裙、水著⋯⋯就走啦! 晚餐去左Duo2食Pasta,冇辦法,包囡鍾意食麵! Pasta賣相普普通通,但好好味! 反而睇落靚靚嘅pizza,味道一般。 飲飽食醉,係時候番去。 其實playhouse隔離有水族館,對出有個大公園,仲有青少年科學館,離遠見到個大噴水池,夏天黎可以玩水添!真係好適合帶小朋友黎呢到! 不過我地基本上走出唔到間playhouse,希望不久將來可以再黎玩過!