帶隻馬騮去北海道9日8夜:Day 4~登別 》夕張中途站 》富良野-麵包超人店,果醬店

早餐時間7-9,被迫晨早起床。8半飛落去餐廳,地方好大,不過好似冇咩食咁。

或者係啲野唔太啱食,拎左麵包同拉麵畀包囡食,包生依舊食左兩碗飯⋯犀利犀利!

房間實在太舒服啦,真係好唔願離開⋯可惜10點就要check out,而且今日係車程較長嘅一日,都係要早啲出發。

離開酒店,先揸個半鐘車,由登別去夕張停一停。停車場對開有幾間小檔口,夕張當然有夕張蜜瓜賣~

個道之駅有間supermarket,應有盡有,有好多野賣~

除左蔬果,仲有好多蜜瓜手信(例如:啫喱、糖、餅⋯)我估係夕張買夕張產品,應該平過係札幌或機場買,而且係呢到買完又可以即刻掟上車,幾方便,所以買左啲蜜瓜零食手信。個人比較少格價,其實唔肯定係咪平啲!

除左supermarket,附近咩都冇,午餐搵左間好local嘅飯店︰

求其食都好好味!快快食完就走啦~

食飯前係蜜瓜檔見到有散件蜜瓜賣,飯後竟然賣哂!明明呢到人影都唔多隻,點解賣得咁快家!?唔擔心,我地去富良野一定食到!

食飽繼續趕路,下晝再揸個半鐘入富良野,去今日唯一景點:麵包超人店~

店外有得玩水,可惜今日落雨,而且氣溫突然驟降,得11*C都幾凍下,好彩有準備厚衫畀包囡!玩唔到水,唯有望下影下相~

室內有個玩具area可以畀包囡玩

上層有啲藝術畫作,亦有隻大公仔擺設可以摟下影下相~

包生陪包囡周圍跑跑跳跳,包太可以專心購物,大家都冇投訴!呢到真係勁多野買!其實掛住睇,都冇乜影相!

睇完麵包超人,順便過隔離果醬店睇下。

呢到有好多唔同味道嘅果醬,側邊放左麵包/餅乾畀你配果醬試,有啲味道都幾得意~
咁啱撞正有旅行團,突然勁多人擁入黎…

個人幾鍾意隻白葡萄酒味嘅Jam,真係好似飲緊白酒咁,好味!

玩左一輪就5點,開車去今晚酒店:ホテルナト,呢間酒店標榜小朋友oriented,有啲民宿feel嘅酒店。

大大隻麵超人坐係門口歡迎大家~

Welcome drink~

係大堂側有啲小朋友用品,可以借上房間用~

Close up~

有巧虎尿片呀! 拎左包畀包囡著,勁開心!係咁講自己著左巧虎片片~

枕頭架,可以自選枕頭!

另外亦有啲accessories,每人可以揀5樣~

房間正正常常~

地下有間snack room,會跟時間表提供唔同嘅小食同全日任飲汽水!。

 

我地check in時就有燒棉花糖,包囡第一次食棉花糖!勁開心!

1樓有間兒童遊戲室,有啲小型玩具玩下~

隔離有閱讀室

Buffet 晚餐,一行入餐廳已經聞到好勁嘅燒烤味。呢到每張枱都有個小烤爐,可以拎啲海鮮材料入去BBQ。

另外亦有刺身壽司,日式料理,任點熟食等等。

最得意就係有個小朋友corner,預備左好多小朋友食物,當然亦提供小朋友食具,連剪刀都有,真係幾細心!

成間餐廳其實有少少打冷舖feel,個人認為地方有啲啲dirty,可能因為油煙太勁!

食完正餐,上一層繼續有甜品buffet!大件事,要捧個肚番房!包囡簡直係大放肆!食盡好多未食過嘅甜品⋯⋯

呢間酒店有大浴場同溫泉,包生自告奮勇,帶包囡去大浴場沖涼!我就興趣不大,留係房梳洗!結果包囡又叫又喊好唔合作,搞到包生極速沖完涼就走,都冇機會浸下個溫泉!最搞笑係包囡明明著住橙色鞋仔落去(酒店啲膠鞋),番黎換左黃色!爸爸們都係carefree啲⋯

 

This entry was posted in 日本 and tagged , , , , , , , , . Bookmark the permalink.

One Response to 帶隻馬騮去北海道9日8夜:Day 4~登別 》夕張中途站 》富良野-麵包超人店,果醬店
  1. frankiefong says:

    Thx for sharing!

Comments are closed.