[純粹邏輯思考非科學資訊]斷六親既行業,你有冇試過比人說到去做?

圖片來源: 蘋果日報

住係香港地,其實周時都聽到有d識左無耐自稱做緊marketing既朋友無啦啦話有好野益你,叫你去一個地方比錢聽書,一齊拍住做生意。究竟佢係想做咩?咪就係你諗到果d行業lo~

由於偽科學呢d行業一直都係氾濫緊,所以酋長打算好快甘分析下希望大家唔好再考慮從事呢d經濟邪教既活動,入面涉及既產品酋長遲下再講。

酋長年青時亦曾經造訪過呢d機構,好彩遺傳了老母既智慧冇被洗腦,再加上甘多年來既見聞,終於模清個玩法係點。

通常呢d機構都會有個門口守衛深嚴既office, 你個表現得好nice既fd會同你入去然後就會有好多唔同既人同你briefing, 講自己有幾慘,入到黎好多人都得到救贖又賺到好多錢,時間自由,然後說你入會比錢上堂/買佢既產品試,再叫你簽份約,比錢佢做獨立經銷商,賣到貨/sell到service就有佣/獎金,搵下線番黎做又會有多d佣金同快d升職分多d獎金。

酋長唔係d咩商業奇才,但係邏輯係會幫助你去判斷。

每個人做野都會有佢既目的。可以係為自己既利益,可以係為他人既利益。達成一件事需要既係方法/工具,可以係實物,亦都可以係人與人之間既關係。知甘多,你心水清就會諗到個故仔係點:

有個人想搵錢,佢搵到d貨或者服務黎sell, 但自己sell唔店要搵人幫手但又唔想比錢請,end up 就諗左呢種營銷模式。

公司想要sales又唔想比錢,所以就當其下既人做獨立經銷商,有生意先需要“出糧”,變相要佢地承擔所有風險,佢地做錯事犯左法亦都容易逃避法律責任,sales亦都唔受勞工法例保障。

搵左第一批人番黎,哄佢地比錢做培訓,再哄佢地叫人黎做,甘一黎可以穩袋巨額培訓費用黎營運二來又可以兒孫滿堂大把人幫手sell。教下線打warm call,利用佢地既人脈同貪婪心理再搵人黎做以加快升職賺錢。

圖片來源: LIHKG

做起左就一定會愈來愈多閒言閒語,所以要疲勞轟炸式洗腦,拋少少商業理論,有幾大吹幾大,反正又冇成本,個個話自己搵好多錢一個月都放棄要入黎做,或者打心理牌話呢到既人個個都好nice會互相照顧,吸引新人入黎繼續比錢做培訓同幫佢地sell野。

我唔可以話我判斷既故仔100%真實,但甘樣既model絕對係可行,行呢個制度既人絕對係一個惡魔級既商人。

順便一提,佢地甘樣既模式絕對唔係做自己生意,貨/服務係公司既,office都係公司既,收錢都係公司收完先分比sales,係公司亦都冇話事/決定權,憑咩話係自己生意?

呢個marketing 公司其實可能只係一個做到野先需要出糧既銷售部門,完全唔洗點負責,客戶公司好大機會都係同一個老闆…

所以大家小心識錯朋友,入左行既諗下當初你個朋友為咩搵你一齊做。

You can follow any responses to this entry through the RSS 2.0 feed.
You can leave a response, or trackback from your own site.

Comments are closed.