【Kanto Travel Focus 1 - Day1】2015-07-04 [值得嚟嘅程度 LEVEL 9/12] 第一次踩電動單車真係幾過癮,當中行程有啲上斜位真係幫咗好多,踩得冇咁辛苦❗ 【征服東日本】 ☞ 之前完成咗日本12個縣,不過都係西日本嗰邊,所以嚟緊要去東日本嘅地方,而且自己嘅年假有限,而且仲計劃咗十一月去東北嘅地方睇紅葉,所以暫時真係冇多餘嘅假俾我去日本,但自己又好想快啲完成制霸全日本,所以被迫之下萌生咗兩日制去日本嘅程況,就係利用星期五夜晚凌晨時間飛,然後星期日晚返嚟香港。其實諗起依加都覺得有啲癲,而且太趕真係攰,但當時就唔覺係辛苦,反而仲好興奮想去。 ☞ 記得呢一次我係搭香草航空VANILLA, 因為臨近一星期飛所以將機票超貴,來回要成七千幾蚊。不過自己真係等唔到咁耐再去日本所以都立即扑鎚飛去東京地方。 ☞ 今次同上三次去嘅有唔同,係第一次冇拎喼去,淨係一個背囊就去喇,而且個背囊都唔細有啲似人哋露營嗰種SIZE,不過細少少咁,所以呢兩日制嘅體驗對自己都好新鮮,行程命名KANTO TRAVEL FOCUS 1。 ☞ VANILLA落機嘅位置就係喺成田空港TERMINAL 3,TERMINAL 3原來去返有鐵路搭嘅TERMINA L2要行三個字,而且係冇電梯可以行過去,都有啲唔方便。 ☞ 去到TERMINAL 2買咗張【KANTO AREA PASS】就搭JR去千葉。個個喺成田機場暫搭JR絕大部份都會係去東京,而我就反方向去千葉站,因為今次制霸嘅都道府縣就係千葉縣。 【直接去銚子市】 ☞ 由成田機場去銚子唔遠,本身成田機場就係喺千葉縣,所以一個鐘就到達銚子。銚子附近本身係一個普通嘅民居地方,唔算話好多嘢睇,而我嚟呢度就知可以踩住單車去一個叫銚子嘅魚市場同埋犬吠埼鄧塔附近觀光。 ☞ 當我去到車站搵一個地方可以租單車踩,咁嗰度就係觀光案內所。我去租單車,個職員就話要1000円,咁我就填晒資料,包括護照號碼同埋酒店地址,嗰陣知原來係咁麻煩,因為之前喺日本租單車唔駛填咁多資料,反而呢度要咁多。 ☞ 之後俾埋錢就去拎單車踩,發覺原來呢架係電動單車嚟,唔怪得咁貴租啦,因為平時普通單車租最多係七百円就有。坐上去踩個職員都教我點踩,始終自己未試過踩,不過都唔複雜。當一起步,只係俾少少力就可以向前行,有股力真係推前自己,感覺好得意,覺得好好玩,不過馬路嘅地方都要小心,始終踩少少就會推向前,同自己靠力踩差好遠。 ☞ 一直踩去到一個細少嘅公園,望對面一河之隔就係茨城縣嘅地方嚟。再踩嘅時候就開始咗啲似工業區嘅地方,周圍嘅馬路都係啲貨車,1甚至係貨櫃車,雖然算好多車,但當啲車駛近埋自己都有啲驚驚地,而且我距離啲車其實都幾近。不過踩住電動車其實都幾爽,慳咗唔少力。 【銚子ポートタワー】 ☞ 踩咗都好耐時間,有成45分鐘,終於到咗銚子ポートタワー,應該叫銚子塔。呢度係一個觀光塔嚟,想到最高可以望晒東南西北四方位嘅景色。因為呢個塔其實距離車站都好遠,大部份都係揸車嚟,除咗我一個係踩單車嚟。到咗個塔嘅樓下就鎖好架單車先,都係隨意唔阻人情況擺喺側邊。之後上上面個塔,底層係買啲記念品,不過通常我買記念品係最後先買,要睇晒所有地方再決定買邊樣記念品。 ☞ 再落一層係食店嚟,但不如話係一個魚市長仲貼切,因為落到呢層會聞到啲魚腥味,而且有好多魚缸喺度,裝潢同魚市司場冇咩分別。可能係因為銚子係近海邊地方,魚穫豐盛,所以啲食點係以海鮮居多。咁啱自己都餓,就事旦去咗間食咗碗魚子海膽式,賣相都唔錯,而且幾好食,價錢要1800円。 ☞ 食完就上個塔頂地方,位置唔算大,不過都可以清楚望見四方位嘅景色。發覺隨除咗我之外,都唔見其他人上嚟望。其實都好快睇晒,而且見色都未算好靚,所以去埋買紀念 【犬吠埼灯台】 ☞ 繼續踩沿住海邊地方踩去犬吠埼灯台,開始離開咗剛才工業區嘅地方,沿途旁邊係啲岩石嘅地方,不斷海水拍打。踩去犬吠埼灯台都要一定時間,大約30分鐘。開始見到車路同行人路有分隔,我當然立即踩1返行人路唔好咗住其他車行過。 ☞ 中途見到一個海灘嘅地方,遠見都有人山步同放狗。就咁直望個海就係太平洋嚟,冇諗過自己原來同太平洋係咁近。而且喺呢到會見到日本最初太陽升起嘅位置嚟,但當時都晏晝嚟,基本上係冇特別嘢睇,所以繼續前往犬吠埼。 ☞ 去到犬吠埼灯台,可以俾錢入去灯台嘅情況,同埋上去最高嘅位置。當入去時都已經係細,再沿灯台樓梯行上去就會越嚟越窄,企兩個人都無可能。當時撞到一啲人要落返地面而我要上上面嗰陣真係要好貼牆,側晒身等人行過,加強樓底越嚟越細,有時都要踎低少少過去先可以,就連腳架都要摺埋。想到去基本望一陣遠景就落返嚟,因為根本冇嘢行,同埋唔好阻其他人上嚟。 ☞ 另外附近都有啲石級受海水侵蝕,行落去欣賞,但有告示顯示有危險封咗去路。所以逗留一陣多少少時間就離開。 【返去銚子駅還車】 ☞ 時間都四點幾,附近都冇咩特別行所以就踩返轉頭去車站還車,不過中途唔知點解踩踩吓行唔返之前嘅路,至少見唔返個銚子塔,不過左兜右兜都最後行返到車站。去到車站還車個職員同我講話我遲還,因為五點要還車但我係過左十幾廿分鐘先還返嚟。本來佢話要加錢,而我都準備俾錢佢當過鐘嘅收費,不過最後個職員話唔駛,真係好喇。 ☞ 行返出車站望到好多舖都收檔,淨返真係冇幾間。喺嗰一刻就開始落雨喇,真係好彩我踩完單車先嚟落雨。之後就去搭JR去千葉駅。 【好繁榮嘅千葉市】 ☞ 嚟到千葉市咩大型購物地方都好齊,而且食店居酒屋都一應俱全,始終近東京地方係繁榮啲。不過啲舖頭收八點依然冇變,喺個度我都係打咗陣機同食埋嘢就離開。然後去東京搭新幹線去宇都宮市嘅酒店瞓。 ☞ 當我瞓緊嗰陣,都仲覺得我兩日際嘅日本真係幾癲,唔相信自己瞓緊喺日本。 點擊圖片放大 【INFORMATION - 銚子ポートタワー】 交通: JR銚子駅去銚子觀光案內所旁邊租單車踩 。 由JR銚子駅乘坐巴士(川口・ポートセンター行きバス),喺總站落車。(約20分鐘時間) 營業時間:上午08:30至下年05:30 入場費:380円 網址:https://www.choshikanko.com/porttower/guide.html 【INFORMATION - 犬吠埼灯台】 交通:銚子電鉄犬吠駅步行7分鐘。 營業時間:上午08:30至下年04:00 入場費:200円 網址:http://www.choshikanko.com/extra/toudai/ ==================== 外部連結 ==================== 自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 https://blog.ulifestyle.com.hk/blogger/ao37182/?p=2936671