【Shikoku Wonder Quest - Day6】2015-05-05 值得嚟嘅程度 LEVEL 8/12 ☞ 道後溫泉真係人山人海,連排隊入去個溫泉旅館都要排長龍,果然係最古老嘅溫泉,威力果然唔同啲。 【車廂慢遊郊區景色】 ☞ 嚟到四國行程嘅最後一日,去愛媛縣最古老嘅溫泉地方,道後溫泉。呢個最古老嘅溫泉係除咗係最古老之外,亦都唔係宮崎駿嘅動畫❮千與千尋❯其中一幕取景嘅地方,所以真係吸引好多人嚟睇。 ☞ 朝早起身就check-out,連埋行李離開酒店。早餐食咗個鰻魚飯就行去JR高松站等車,不過見仲有時間就行咗出面個海濱公園嘅地方,發覺好清新寧靜,令人心曠神怡。有啲人就沿住公園海濱長廊跑步,有啲就喺公園放狗,感覺令人好輕鬆。其實日本呢一種普通嘅公園真係好舒服,不過喺香港應該都好難揾到。 ☞ 差唔多夠鐘就搭特急列車出發去道後溫泉,車程大約兩個鐘。雖然喺車箱旅面兩個鐘冇嘢做,但發覺從窗口望出外面慢慢欣賞郊區嘅景色都非常唔錯。列車開往途中嘅右手面係沿海地區,左手面係農田地方,喺呢個車程裏面完全感受日本鄉郊地方嘅氣氛。 【第一時間放低個喼】 ☞ 當到達JR松山站就係距離道後溫泉已經不遠矣。喺松山站一早堆滿好多人,站外更加多人,畢竟松山站係愛媛縣最多人同繁榮嘅地方嚟。 一到達車站第一時間就係要處理我手上嘅行李箱,即刻揾貯物櫃可以俾我放個喼。本身自己個喼都大,而呢啲大Size嘅儲物櫃通常唔多,所以要即刻揾到出儲物櫃嘅位置先,而且咁多人,驚就算有儲物櫃都俾人用晒。 ☞ 好彩都發覺啲儲物櫃係喺車站附近,不過見到嘅剩番唔多,即刻嗱嗱聲將行李放入去個儲物櫃裏面。 【好多人@道後溫泉】 ☞ 一搞掂就立即轉坐路面電車由松山站去到道後溫泉站。架路面電車裏面都好多人,除咗遊客之外都仲有當地居民都去道後溫泉。大約三個字時間就到達道後溫泉站去個車站都好靚好有特色,出車站冇幾遠就有條手信區嘅地方,係通去道後溫泉嘅街道嚟到。 ☞ 入到條街真係好多人,而街兩邊嘅舖頭大部份係手信區或者係餐廳嚟。其實我覺得啲商舖賣嘅嘢都唔錯,不過實在太多人,好難慢慢欣賞。穿過手信區位置就係道後溫泉嘅地方,外觀好古色古香,旁邊仲有轎車可以去租,不過嗰啲都幾貴。 【逗留一個鐘離開】 ☞ 道後溫泉裡面除咗即日浸溫泉之外仲可以住埋。但係我見排隊入係浸溫泉條隊都非常之長,所以結果都冇入去浸,加上整個環境都好多人所以喺出面望多陣就走人。番轉頭出番去車站中途去手信區嘅地方買啲記念品就離開,因為實在係好多人。我諗自己都喺度逗留住一個鐘左右離開。 ☞ 拎番個喼之後就搭番JR去番高松站。由於時間都比較趕,都係買咗個便當喺列車上食。 ☞ 當到咗JR高松站,即刻去櫃位買將車飛由高松站去關西空港站。初初發覺個職員要我俾多成幾千円,原來佢幫我整咗將指定席嘅位。買完車票發覺仲有啲時間,睇過下一班嘅時間仲有個半鐘,又睇過如果去埋栗林公園係絕對夠時間返嚟JR高松站。而且本來栗林公園之前都已經想去,不過冇時間去到所以依加剩番嘅時間點都要去一去。 【高松栗林公園】 ☞ 距離栗林公園同高松站其實都係幾嗰站就到,不過班次好疏,成個鐘先一班車。咁啱我嘅時間係差唔多開車,所以好快到栗林公園。栗林公園係一個國定嘅名勝,裏面比起一般公園大,而且貌似後花園嘅格局,都值得去睇。 ☞ 去栗林公園我係拖住個喼嚟行,都幾辛苦,而且有啲路係啲碎石舖成,根本係拖唔到個喼。不過為咗完成睇埋栗林公園就冇辦法啦。不過由於時間唔太夠,淨係逗留咗九個字時間就走。 ☞ 最後就坐返列車去番高松站,之後轉車去搭新幹線同特急列車返去關西機場準備返香港。由高松站去機場都要三個幾鐘,最弊係新幹線上冇得坐,大多人喇,自己都係企咗近廁所嘅位置。 【後記】----------------------------------------- ☞ 六日嘅Shikoku Wonder Quest就係咁結束咗,睇驗比之前關西地區同中國地區,四國又有另類感受。 ☞ 四國基本上相對清靜,就算最大城市高松市都冇廣島市或者係大阪咁熱鬧,但呢一種清靜好係去咁多日都好響往,特別去到郊區地方更覺得好有家鄉味道,感覺自己寧靜輕鬆,有種返到去從前嘅情懷,特別喺高知縣四万十川河流,有一家大細坐喺溪流邊野餐;麵包超人博物館面嘅公園一班小朋友一齊去玩咁,望到個景象都非常滿足,覺得日本人嘅家庭樂都可以咁寫意。 ☞ 喺四國呢幾日當中,最深刻一定係去愛媛縣島波海道踩單車。雖然極為辛苦,但勇敢去嘗試踩足三個島嘅情況,都非常值得嘅體驗。即使踩過唔到對面廣島縣,但對於自己有咁嘅毅力,自己都好有滿足感。 ☞ 西日本嘅地方經過三次嘅旅行都踏足過唔少,已經征服咗12/47個縣。 ==================== 外部連結 ==================== 自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 - 12/2016) ,分開17次時間,唔識日文情況下,自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 https://blog.ulifestyle.com.hk/blogger/ao37182/?p=2936671