泰國雜記1 – 芭堤雅3日快閃行程懶人包

估唔到平時寫野係story mode既我都會寫行程懶人包呢~
事緣今年6月頭公眾假期放五六日,最fit當然係星期四晚出發星期日晚返快閃一轉啦~ 泰國呢d飛兩個半鐘頭近近地話行就行最岩ga啦!
雖然話芭堤雅係一個已開發過度既老牌旅遊城市,個個fd都話「無咩睇啦,去華欣好過」,但我去完又覺遠比想像中好wor!
食物又平物價又低,就算唔幫襯紅燈事業都有野睇有野玩!
比起日日塞車放題既曼谷,都係芭提雅陽光與海灘有度假feel得多~
小弟唔係泰國專家,只不過係將自己呢3日plan左既健康行程公諸同好,等大家唔使用腦原封不動copy and paste都得,真正輕輕鬆鬆話行就行啦~

 

航班及到埗交通

HK Airline / HK Express / 皇家約旦航空 / 泰國航空等等大把夜晚機同凌晨機飛Bangkok唔使我講啦~
不過要注意飛邊個機場,Suvarnabhumi airport (BKK)地理上係正曼谷同芭堤雅中間,落機坐的士or Grab大約1.5小時可到,去程價格約1200 – 1800 THB,回程則最多1000 THB攪掂
如果係飛廊曼機場(DMK),座落曼谷市中心北邊,就要搵下方法去了,雖然夜晚嚟講的士都係唯一既option…….

(凌晨1點嚟到都咁多人…….)

住宿

芭堤雅Apartment比酒店抵住,大多有埋廚房Gym room甚至天台Infinity Pool
但我第一次on居居book左呢間遠離市中心既”1st Chezz Condo by PDT”,每次來回都要我坐街邊電單車煩到死!
之不過房間又新又大,附近有Big C同24超市,多local food,最重要係有個無玻璃係面前既真正無邊際泳池!
港幣$200幾一晚,hostel價錢有hotel級享受,真係抵到難以至信!
Link by booking.com : https://bit.ly/2Z7d0eJ

 

 

如果覺得交通不便,我上幾星期再去時住過另一間apartment “The BASE Central Pattaya”
地理位置非常不錯,價格同硬件都可接受,不過好多大陸人,兼且入住係一場惡夢……….
過兩日 #場邊小故事 再講!

好啦基本野講完,行程開始了~

Day 0 – 落機宵夜

星期四晚放工,香港夜機飛曼谷BKK,個半鐘的士到芭堤雅
住宿check-in,落Seven或街邊檔食個宵夜,起碼都凌晨3-4點先有得訓

 

Day 1 – hea酒店 + Aree Massage按摩 + 任食海鮮燒烤

訓到黃朝百晏,12點幾自然醒是常識吧~
落街食個飯,我就去左apartment附近24小時營業的TOOK LAE DEE,
泰西式連鎖食店,約116 THB = $30一個蘑菇汁煎雞胸辣椒飯,雞胸竟然水軟嫩滑爆哂汁,驚喜!

 

 

中午食完飯兩點幾,返apartment做個靚gym操下肌舉下鐵,再上infinity pool睇下鬼佬與他的外賣在水中浮下浮下,幾hea幾寫意~

 

 

 

(好啦我知上面個畫面唔太岩小朋友,唯有犧牲我既色相去balance返啦~)

4點幾無咁熱,係時候出去做泰式既正式按摩鬆一鬆全身~
當然有心人係可以去泰式既唔正式既按摩鬆一鬆隻腳的~
按摩店方面,真係唔使去Let’s xxxxx,周街搵間都無問題啦!
個人則推薦Aree massage
光猛、闊落、乾淨、手勢好,按全身係芭堤雅公價200 THB = 港幣$50 1hour,但按肩頸竟然都係200 THB 1hour only就真係比好多地方都平~
仲有少見既耳燭,生日時做呢個最岩ga啦~

 

 

按完摩快6點,天氣好既可以出到海邊坐沙灘睇日落~
就算好似我咁當日天氣唔好,吹下海風咬個M記都係爽呀~

 

 

 

晚餐可以坐車去Ninja BBQ食香港失傳已久的龜頭火鍋……..呀係龜背火鍋先岩!
249 THB = 港幣$63任食海鮮及肉類真係抵到喊!
又可以BBQ又可以打邊爐,d蝦新鮮大隻,燒五花腩配泰式辣汁非常正!
缺點係炭火太猛非常易燶,兼且攝氏34度對住個火爐真係有靈魂出竅的感覺!
向好處諗,無咩地方可以一邊食飯一邊減肥ga…….

 

 

 

 

 

 

 

Day2 – 小珊瑚島 + Hilton Skybar + Terminal 21

訓醒食個早餐hea下,中午1點前到達Pier Pattaya坐30 THB = $7.5 船到小珊瑚島的Tawaen Beach同陽光玩遊戲~
芭堤雅海灘水質非常麻麻,但呢個距離40分鐘船程的小島仍然是水清沙幼,陽光下如玻璃般透射見底
雖然同沙巴仲有少少距離,但已經係非常非常唔錯!
係咁靚既海灘都唔使做d咩啦~
跳落海破冰轉身,熱血自由式完就攤係沙灘椅上嘆支啤酒,肚餓就上去open view餐廳食個勁辣肉碎煎蛋飯~
仲唔夠既,可以租個浮潛鏡出浮波外試下比海膽拮~
記住碼頭落船右方既沙灘比較少人寧靜d ga~

 

 

 

 

坐最後一班下晝5點船返市中心,直接坐電單車(約一人80 THB,二人100 THB)到芭堤雅海灘中心的Hilton酒店Skybar「Horizon」睇日落
呢度毫無疑問係全芭堤雅最靚最靚既skybar,能270度全覽芭堤雅海灘的美麗黃昏及醉人夜景~
天晴時可觀夕陽,天陰時能賞雲海
圓形中空的天花則讓人有雲中觀天之感,入黑後更有星光效果~
我甚至覺得呢度比曼谷既Lebua及 Banyan Tree既skybar更值得嚟!
360-400 THB = $90-$100一杯cocktail係香港價格,但下晝5點至7點happy hour買一送一,抵到喊!

 

 

 

 

 

 

 

 

https://www.youtube.com/watch?v=8ch5CWw_fcQ

係Skybar磨爛蓆到夠後可以坐兩條車去Terminal 21搵食兼行街~
我試左間香港少見的黎巴嫩菜Grillicious by Beirut
睇menu,都係同中東土耳其果類食品風格差不多,見隔離枱果碟kebab夾餅好大份好吸引呢~
但唔知點解我叫左個「芝士蕃茄茸焗吉列雞扒」,超西式,超邪惡
好唔好味?
呢個組合唔會有唔好味既可能law~

 

至於呢個我成日攪唔清係Forever定Terminal既21商場可以話同曼谷果個倒模一樣,幾乎連店鋪都exactly係果d,有無興趣行就見人見志啦~
之不過有幾間香港無既店例如AIIZ等都有平衫賣~
3/F日本主題果層toilet更係原裝日式電子沖洗馬桶,可以話係芭堤雅放低幾兩既最佳選擇~

Day3 (Big C買手信 + 真理寺 + Beer Garden)

嚟得泰國好難唔去Big C shopping~
其實芭堤雅呢間距離市中心有少少遠,不過咁岩係我間apartment附近,咁無理由唔去買手信ga~
個人推薦可買泰國原產咖啡粉同泰式辣醬,肯定香港無咁平無咁靚嗎!
至於買邊種辣醬……….唔好問我,你分得出有咩唔同ge我話妳好野……….

 

 

 

中午Check out完求其食個飯,下晝去芭堤雅最具代表性既觀光名勝「真理寺」,又或者叫「真理聖殿」,係一座超級巨大的純木雕刻佛寺
我超~
有邊座佛寺唔係用木造? 係大陸求其行座山都有幾間啦
唔係wor,係成座白雪公主城堡咁大既佛寺都係由純木佛像雕刻所組合而成wor!
不論寺內寺外,每一角落都係一個立體佛教故事雕刻,會唔會太誇張呀?
雖然咁樣比較有d怪,但佢比起伊朗既伊瑪目清真寺(Imam Mosque) 及德國慕尼黑既阿桑教堂(Asamkirche) 一d都唔輸蝕! 必到!

 

 

 

 

 

 

 

 

(KLook有優惠,去到門口先即時手機買飛都得~)

返到市中心,又係時候按個摩,一日按一次係基本啦~ 都係果句大家自己選擇按腳仔定雀仔啦~
按完時間上都差不多5至6點,可以去Pattaya walking street搵間海邊bar飲杯冰凍啤酒睇日落~
我選擇左最有名的Pattaya Beer Garden,地方大而chill,食物都唔算太貴
冬蔭公湯唔錯,但金邊粉夠膽死未渌熟透,仲硬到可以玩拮拮降頭仔

 

 

 

 

 

食完其實都差不多要走人了,Depends on大家幾點機啦~
其實d時間都幾趕,even夜晚11點機即要9點去到BKK機場,芭堤雅去要1.5 hours的士即係7半要出發,廊曼的話仲要再早1個鐘預塞車tim!
但如果大家同我一樣係玩命系列「飛凌晨落機即返工」既,咪去dum多個骨law~
Dum完頭dum身,dum完身dum腳,反正泰國就係要按到比人打左一鑊咁係合理ga ma~

提提大家,芭堤雅去BKK既巴士大約7點幾就會係南方的車站開走,如果唔岩時間既最好都係的士
假如call Grab or周街搵個的士佬,起碼劏你1500至2000 THB!
其實市中心好多地方都有擺counter for 1000 THB預約的士接送到機場服務,如果大家唔想煩既可以試下下面呢間,我坐完覺得職員非常盡責,唔錯~
counter地址可以係下面張地圖搵到~

寫完了~ 芭堤雅簡單三日係咪hea得嚟又多野玩又正經呢~
所以睇完呢篇後,大家可以好大聲同另一半講「你睇下~ 芭堤雅可以玩得好健康ga! 下個月我一支公去無問題啦ho Honey?~」

如有家變,恕不負責

====================================

 

=================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~

 

=================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/

 
Email : funggarcia@gmail.com
 
 
另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!

 

 

This entry was posted in 住宿, 外遊美食, 泰國, 觀光 and tagged , , , , , , . Bookmark the permalink.