經過facebook「#場邊小故事」所講地獄般既4個鐘Mini-bus,夜晚8點我終於返到Tbilisi啦! 第一件事當然係去今晚既住宿放低背囊先啦~ 今晚既hostel叫Hostel Mountain 13,係網上見佢有不錯既評價,地點又幾近Rustaveli,都係兩三個街口je,仲可以順利探索多d Shota Rustaveli Ave大街,就試下你啦 點擊圖片放大 +3 (夜晚既Shota Rustaveli Ave大街,氣氛唔錯wor~) 點知原來係大中伏呀!!!!!!!! 一日都係自己check野check少左,原來間hostel係半山ga!!!!!!! 幅地圖無顯示高低差呀頂! 簡單嚟講即係由金鐘站行去羅便臣道! 無錯的確係行到,但攰ga嗎! 廿幾分鐘大斜路wor,我仲要孭住個大背囊……… 係講完一千句粗口之後,我爬到呢間”Hostel Mountain 13”了 (由於當晚個人太過謝,本文部份相片係第二朝先影的) 經過一日既舟車勞頓,我而家只係想快d check-in後去食飯休息ja 但hostel office門口貼左張紙話「行開左15分鐘後返」,咁唯有係個大廳坐下休息下先 呢間hostel好明顯係一間正常民居改建而成 -------- 無錯人類係用對腳嚟行路ar嗎! 但我有呢個立論係因為佢個大廳exactly係歐洲家庭格局! 當然唔好問得我咁detail即係點,總之就係勁有回到我德國的家既感覺! 連阻住我面前果對情侶睇戲談心既感覺都一樣! 係呀當年我德國間屋隔離房係一對羅馬尼亞痴男怨女,牆身薄到連打字都聽到,但住咁耐一次熱情聲我都無聽過,睇怕我係阻人xx會比人燒xx ga la……. 係wor呢件事搵日係「#場邊小故事」or「#過客列傳」講下先 點擊圖片放大 +2 係個大廳一等就等左廿分鐘,開始有d奇怪,行入露台搵人問下知唔知個staff去左邊 見有個中東鬍鬚仔係度溝通緊個金髮美女,咁我當然係去阻住佢啦~ 佢話佢都唔知,ok fine~ 呢個時候望一望個呢度馳名既露台 ------ 果然係正wor!!!! 再等多15分鐘,喂有無咁耐ar,百無聊懶又周圍走,見阿鬍鬚仔今次係廚房整緊伊朗式肉串,傾多兩句見知原來佢係伊朗人嚟左格魯吉亞工作,今晚會係露台個炭爐整串燒同fd吹水~ 鬍鬚仔 : 「Do you wanna join?」 我 : 「Thank you! But I wanna check-in 1st, please don’t wait for me. 」 但我拒絕既真正原因係 ------ 我想試下自己整串燒呀~~~~~~ 本身我揀呢間hostel就係因為網站既reviews話個「露台view正兼有BBQ爐」,而家見廚房連伊朗式鐵籤都有wor,梗係想大顯身手啦! 我要Kebab! 我要燒雞! 但首要係個staff返左嚟先呀!!!!! 我等左就嚟成粒鐘啦! (佢個廚房,都算大又齊) (上年係伊朗Vazaneh沙漠食果個鐵串燒雞真係諗起都流口水~) 忍唔住,見阿鬍鬚仔咁熟架部,問下佢有無方法聯絡到個staff,我等左成粒鐘,出緊蜘蛛網啦! 鬍鬚仔 : 「oh you are waiting for check-in? Sorry I though you are the old guest, I am the staff.」 我 : 「……………………………………」 鬍鬚仔 : 「……………………………………」 人嚟,拖佢出去打 八格耶格你個香蕉蘋果橙! 我出出入入咁多次、又同佢傾左咁多次、又講過幾次我係等緊check-in! 你條粉腸Listening囉U ga????????? 而更利害既係我問所有餐廳資料交通資訊玩樂推荐等等佢全部都一竅不通! 甚至連地圖都無張,有無咁廢ar???? 點都好,總算入到房了 8人房床算大,有布簾有私人燈有大locker,但白燈+白床鋪攪到有d刺眼,另外床”玉”都係歐洲果種超軟淋淋,一坐落去會起唔返身果隻 所以,真係唔係太鐘意 唯一要讚既係廁所算多而且乾淨,沖涼水力亦十足 (網上圖片,cap自booking.com) 唔理啦! 我要食飯啦! 一諗起要行返落去大街食飯再上返嚟真係腳都軟....... 可唔可以囉條扶手電梯比我呀...... 再問呀胡鬚仔邊度有超市,佢都係hea答我"周圍都有" 如果係平時,我就好樂意係呢個第比利斯半山區遊盪下ge,之不過係10點幾都仲未食飯既呢個moment,我只想快快脆脆祭下間五臟廟ja! 有時不能不嘆服google map ,連呢d地方都可以show到超市係邊度! 之不過行下一間,行下又一間........全部都士多嚟ge?? 咩肉都無,連煙肉都無!唔通燒oreo咩!!!??? 一剎那諗過,不如揾間餐廳快快手手一餐算啦,就嚟11點啦......岩岩行過間pizza店好鬼死香呀...... 但轉頭一諗,我今日除左做肥佬夾心餅之外幾乎無野做過!咁辛苦既一日我想做d令自己開心既野呀! 把心一橫,再行遠少少揾埋map上既last一間,今次終於係超市啦!!! 但都係無肉呀!!!!!!!!!!!!! 咁點呀?唔通而家先放棄? 好彩呢間超市有腸仔賣! 作為一個香港人,BBQ除左最緊要有個爐,就係要有腸仔! 仲有杯麵賣tim,加支蘋果汁,夠ga啦! 頂住先啦! 終於買齊餸,我可以返去煮了.....T_T (其實如果唔係咁夜,山上呢度應該幾似soho區好多特式店舖的,值得一行~) 煮,原來係另一個問題 用BBQ炭透爐我真係從無失手,係郊外露營用樹枝都難我唔到,但究竟點樣用蘿蔔咁粗既爛木凳腳嚟生火ga呢?? 明知唔得,但都會好白痴咁試下可唔可以就用火機點個火把出嚟呢......... um果然係唔得ga!!!! 呢個時候胡鬚仔又出現,係唔知邊度囉左個會甩頭既鎚仔同螺絲批出嚟,教我點中間破佢柴,咁我第一反應當然就係瞄準佢大腿中間啦 其實劈成既細條都係好大條,於是我就建築工人咁不停係地下鑿鑿鑿鑿鑿,鑿到d木起碼筷子咁幼先ok 「年輕人,係乜野驅使你夜嗎嗎係度鑿地板呀?」 「係餓呀dllm!!!!!」 當材料攪掂,又到發現呢隻木好難燒得著.......唉真係煩到爆,不過又咁講,其實我係幾enjoy ge~ 有幾可會一個人夜嗎嗎係異國的天台上透爐生火呢~ That's so much fun for me ! 總之最後又係技術搭救,成功起到火,可以燒腸仔啦!!!!! (呢d畫面真係好治癒~) 最終,晚上12點3,炭燒格魯吉亞香腸三拼,配台式牛肉即食碗麵登場啦! 無錯,我為左呢個香港廿五蚊攪掂既腸仔麵,又劈柴又放火又餓到嘔,都唔知為乜! 不過,可以望住呢個咁靚既夜景,嘆返個由自己努力與汗水整出嚟既晚餐,真係一種享受呀~~~ 食完野就訓好肥ga,但又無計wor 聽朝一早8點就要離開第比利斯 死死地氣,訓啦~ 聽日會係新挑戰呢! =================== 相關文章 : 《格魯吉亞背包行 - 出發前資料大全集》 《格魯吉亞背包行Day1 - 夜遊第比利斯》 《格魯吉亞背包行Day2.1 - 漫步第比利斯》 《格魯吉亞背包行Day2.2 - 公共浴場奇異見聞錄》 《格魯吉亞背包行Day2.3 - 半山城+初試格魯吉亞菜》《格魯吉亞背包行Day3.1 - 雪山下的仙境民宿》 《格魯吉亞背包行Day3.2 - 冰川獨行@Mestia》 《格魯吉亞背包行Day4 - 烏樹故里,那僻遠村落中的僻遠村落》 《格魯吉亞背包行Day5.1 - 係咁ee睇下Kutaisi》 ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!