汶萊幾乎可以話係全東南亞最少旅客到訪暨最少人認識既國家 (僅次於東帝汶) 個名會聽過ge,但一般只會同石油及吳尊拉上關係,係街求其問人汶萊係咩位置的話,都幾sure 10個有8個都係亂up 無他既,綜合各方旅遊人士既意見,一致認為汶萊係一個超級無野睇無野玩既國家! 不過,睇開我個Blog都知我包拗頸ga la~ 你地話無野玩je,我就偏偏要用自己對腳行過睇下乜料! 計過機票時間假期都ok,兼且蘇師傅話今年屬鼠既農曆3、4月去南方會有桃花運! (呢個先係最重點!) 所以,人生中既第40個國家,我萊萊~萊萊萊萊~萊萊萊萊萊萊~萊萊萊萊萊萊萊啦!!!! 行貨都好,講少少background la~ 汶萊,全名「汶萊達魯薩蘭國」,古時稱之為「婆羅乃」,係肥皂劇中首屈一指既賣豬仔勝地兼咕呢集散地 地理上位於世界第三大島婆羅洲島 (第一係格陵蘭第二係新幾內亞第四係馬達加斯加,《嚮導玩》時溫返嚟既無聊知識.........),整個國土分成兩部份,全都比島上既東馬來西亞完全包圍,同南方的印尼無接壤 土地Size大約係5個香港左右,但只有40幾萬人,九龍城都多人過佢呀! 可以想像到條街會幾咁無人呢......... 另外國家行既係伊斯蘭教君主專制,即係獨裁.........不過當地居民都話現任蘇丹 (即係國王,同匈奴王叫”單于”同道理) 哈山納·包奇亞係名君,其長子亦非常受國民愛戴,對佢地都非常尊敬 再簡單d講,汶萊有豐富石油---->有錢,人少----->政府可以做到全民免稅及醫療全補貼,所以社會非常穩定安全,當地人話犯罪事件一年兩隻手數得哂,殺人事件更好似10幾年無出現過了 Wa~~~~~~世界上真係有聽起來咁烏托邦既國家ga咩??? 唉講講下突然灰灰地,其他資料point form算了......... 時差 : GMT+8,同香港無時差 貨幣 : 汶萊幣,與新加坡幣掛勾,即大約等於港紙 x6。幾乎全國均可直接使用新加坡幣,不過對方會找返汶萊幣比你,所以唔使唱定的 氣溫 : 熱到阿媽都唔認得,幾乎無四季齋得夏季,30幾度等閒事,而且變化極快,一陣落dog shit一陣太陽出來了亦係常事 衣著 : 雖係伊斯蘭國家但對旅客唔嚴格,女士唔使戴頭巾,男士可著短褲踢拖,入清真寺時會有件外套比你點解要大家笠 (35度笠件全黑ge...........熱到.........) Background講完,正式開波啦(打左800幾字先同我正式開波???) 香港往來汶萊交通 : 香港唯一去汶萊既直航機由Royal Brunei「汶萊皇家航空」營運,每日一班,幾乎固定去程14:55 --> 18:00回程10:30 --> 13:35,飛行時間3小時5分鐘,下晝機去早機返,仲索價3千幾蚊,幾乎去歐洲都仲得! 兼且汶萊出名無野玩,相信呢個都係點解無乜香港人會去呢處既原因 另一個方法係游水。由香港最南既蒲台島出發,一直向南游過西沙群島東邊,再穿越有主權爭議既南沙群島,咁都唔死得既話就有機會係著名既六星級酒店The Empire and Country Club的私人海灘登陸。該處風光明媚,必能一洗閣下既倦意ar~ 既然兩個直接去既方法都唔係咁friendly,就唯有好似我甚至其他backpacker咁採用迂迴策略 ------- 由沙巴進入! 暫時香港至沙巴的直航機只剩下Air Asia,夠膽坐馬航的話都要繞遠路先到吉隆坡轉機 疊埋心水坐廉航啦~ big sales時來回機票可以唔使1k的~時間仲唔錯呢~ 沙巴往來汶萊交通 : 由沙巴到汶萊有4種方式,飛機、船、巴士、游水...........得啦唔好再游水啦!!!! 內陸機係由沙巴到汶萊最快既方法,只需一小時,但汶萊皇家航空單程多數都要成800幾,來回的話仲貴過我張沙巴機票! 除非閣下有膽坐馬航啦........ 但如果閣下時間非常緊拙,咁就用錢買時間啦~ 無錢既話,就只有坐船or坐車,由於我兩種都試哂,所以呢part會詳細d~ 無心機既話就飛落下面個比較表啦~ 1. 坐船 連坐船都會有兩條路線! 最common最唔使諗最方便既路線係呢條 : 路線A: 沙巴市中心Jesselton Point碼頭 --> (高速船3.5 hrs) --> 納閩 --> (高速船1 hr) --> 汶萊 Jesselton Point碼頭即係平時出外島浮潛果個,每日會有兩班船駛到「納閩島」,分別係08:00及13:00,票價係頭等RM44.6,二等RM39.6,港幣係將佢乘2,都唔算貴,聽聞兩者都無咩好大分別。 去到碼頭,ticket office會有一個counter用英文寫住「Labuan」,早半個鐘即場買飛,仲有時間比你係碼頭買個早餐,之後上船訓覺,到,easy job~ 而由於納閩島係沙巴坐船到汶萊必經之路,所以唔使諗,買啦~ 點擊圖片放大 +6 船很大基本上唔會full,有toilet兼有美國超廢電影睇,整體尚算企理~ 點擊圖片放大 被拋浪頭3個半鐘後到達納閩島,出左閘記得即刻轉身射個三分波後去ticket office買去汶萊既船票,票價約RM35 記得快買,有聽聞過會full的 點擊圖片放大 納閩去汶萊會每隔1.5小時有一班船,如果你坐08:00沙巴開嚟果班船,理論上落船時間係11:30,即最快都只可以坐到13:00果架駁去汶萊,仲有個半鐘比你係個島上慢慢hea 放心~呢度好多野行,又水上村又市集,仲係馬來西亞三大免稅中心之一,酒同朱古力都係超平--------人地話law,我就咁望就覺得係香港價位了 至於我...........對唔住,小弟出名冷血,熱到唔對路頂唔順,行左陣就去KFC借食野為名涼冷氣了......... 點擊圖片放大 +4 個半鐘後去返碼頭,正1點鐘會有你聽唔到亦聽唔明既廣播,開始入閘check行李check passport過關上船。 至於隻船都無咩好講,唔算太”浪”,冷氣亦夠,仲會播我BB仔時既電影「上帝也瘋狂」 如無意外,1個鐘後=下午15:00正式到達汶萊~全程需時約7小時 點擊圖片放大 以上既係路線A,另一個由沙巴去汶萊既坐船路線B係咁: 路線B: 沙巴City Bus Terminal (North) --> (長途巴士/的士/Grab 2.5至3hrs) --> Menumbok --> (高速快艇15-20mins) --> 納閩 --> (高速船1 hr) --> 汶萊 唔同之處係沙巴去納閩果程唔坐船,改為以陸上交通工具到達離納閩最近既沙巴小鎮Menumbok 好處一係巴士好平,二係Menumbok到納閩的高速快艇真係好X快,只需RM15兼係海上風馳電制15分鐘就到,順便幫你吹個孫悟空頭之餘,仲免卻了A路線一日兩班船既限制,自由度大增,更有機會縮短整體交通時間 不過有點隱憂,首先我係網上搵唔到來回Kota Kinabalu <--> Menumbok既巴士時間表,有網友影過一張相但已屬多年之前難以確定,如果坐的士or Grab則價格高昂,而最大問題都係陸路有機會塞車!</--> 不過與其擔心塞車,倒不如擔心下身體好過.........有外國blogger話果15分鐘快艇食左暈浪丸都嘔到黃河泛濫.......... 反正沙巴果程船都唔貴,需時又差不多,所以B路線係比較少人用的 好! 問題出現了! 點解我會有暈浪快艇既相ga呢?? 是咁的,話說下晝1點正我係納閩碼頭過左關登上去汶萊既船,上船前都例牌問多句”Which one is go to Brunei?”,碼頭職員就指左我上呢首船 一上船我就覺得非常熱,同時心裡有d疑惑 ---------- 明明隻張飛寫有劃位ga,點解無ge??? 未來得切問,乘客就已經由唯一既出入口魚貫而入,不到1分鐘已經full house開船 開船後我5分鐘我望望電話,仲上到網既??? 心知不妙,開個GPS睇下..........shit 真係去緊Menumbok呀!!!!! 我問下隔離位馬拉仔"呢首船唔係應該去Brunei ga 咩?" 佢好爽咁答我"唔係呀,你坐錯船了" "你點知ga?" "岩岩我睇到你張飛,知你中伏了" 我dddddddddddddddeeeeeeeeeeeeeeeee!!!!船家!!!!!! "oh無辦法,一陣你坐返回頭艇啦" 於是我就係半小時內用自己既方法極速來回左一轉沙巴納閩了....... 一落船即刻去揾老點我果條友算帳!!! 不過............條友咩樣ga呢..........一面之緣本身就難記,何況我一向患有男人面盲呢....... 唉都係算啦,轉身想離開碼頭就比岩岩載我回來個快船家捉住------"細路,你未比呢程船錢呀" "What!?This is not my fault! " "Yes, this is not my fault too " .............又真係唔關佢事wor..........但點解見到佢串串共個衰樣好想踢佢落海ge.......... 死死地氣對30蚊比佢,再去海關攪埋d手續 梗係啦,我明明出左關但又返返嚟,我變左非法入境ga....... 海關要我坐返另一首船離開,但飛都要再買過........唉黑到呢......... 最後係碼頭旁一間茶室飲杯茶食個撻,到15:30終於可以正式上船,17:00正式入境汶萊了! 點擊圖片放大 (終於到汶萊.................) 點擊圖片放大 坐船到達汶萊後的交通 坐船最終會到達汶萊Serasa碼頭,呢處距離首都斯里卡巴灣約半小時車程,常識嚟講坐巴士去好簡單ar~ sorry, 嚟到汶萊,你首先要接受一件事 --------- 汶萊既公共巴士係如來佛祖九代單傳,即係佛系巴士 無人會知架車究竟幾點會到,到定唔到,經唔經呢度 ; 緣份到了,架車自然會出現。阿彌陀佛,你點佛佢都無用,佢死都唔嚟你吹咩 甚至聽過有遊客係碼頭等左2粒鐘都係食西北風.............. 特別下晝5點d人開始收工(真係好。。。。) 要離開碼頭唯一方法似乎都係的士 而我出門時唯一仲存在既的士佬就係睇死呢點,個價企到勁硬!仲話「你唔坐無所謂~我可以早d返屋企食飯~」 哎呀招積得佢呀!!!!!!!!偏偏汶萊人真係個個都有錢唔稀罕做你生意wor! 用盡九牛二虎之力,最後講價由35變到25汶萊幣=$150成交...........短短半個鐘唔夠車程收我舊半,仲貴過香港ar............ 另外除左唔知幾時有既巴士同食你隻車既的士外,如果閣下住既係五六星酒店,好似可以叫shuttle接送的 (呢個就係巴士站+的士站) 睇左2000幾字,係咪覺得坐船好麻煩轉嚟轉去頭都痛呢~ 放心無問題,我而家講另一個更加頭痛既方法,長途巴士! 2. 坐車 路線C: 坐長途巴士 沙巴汶萊既來回長途巴士每日有一班,由沙巴City Bus Terminal (North) 直達汶萊斯里巴卡灣Bus terminal外近河位置(見下方地圖) 發車時間不論係沙巴定汶萊都係08:00,車程約6.5小時,但中途係”老越”Lawas會監粗停低磨你兩粒鐘,即total 8.5小時,非常揾笨! 沿途風景欠奉,都係樹呀樹呀樹呀樹呀,無聊之極 點擊圖片放大 +2 之但係全世界有不少旅人卻對呢程車趨之若鶩,因為佢有一個超大既特點 ------ 儲印仔! 由於政治地理飛地等等問題,呢程車需要多次出入汶萊及馬來西亞,於是短短8小時內passport可以打左多8隻白豬仔!完全滿足哂男人儲無謂野既慾望呀! 咁我都鐘意儲野,例如閃卡,之不過我本passport好似就爆頁所以唔係好想咁做..........我講完呢句民宿個屋主勁想打鑊我 但最終基於"未試過"同"幫大家介紹下啦"既精神,我都係咁樣巴士返沙巴的 (民宿屋主既手繪地圖) 其他呢程車既資訊包括 : 架車都算係舒服,冷氣都夠,頭個半鐘已經會蓋左6個印,所以係老越再開車後可以大覺訓......... 而我個人comment係,車同船既所需時間及金錢幾乎一樣,除非想儲印or去無野睇既老越行個圈食個乾撈麵,否則都係坐船舒服d (老越名物乾撈麵,味道尚可~) 知道大家睇咁多字好辛苦又好混亂,所以特登整左呢個終極對比表格出嚟,咁就易d揾到岩自己行動既方法啦~ 另因為除飛機外ABC的交通費幾乎一樣,所以唔比價格lu~ 路線 交通方法 出發地點 途經地點 到達地點 需時 好處 壞處 注 A 船+船 沙巴Jesselton Point碼頭 納閩 汶萊 Serasa碼頭 7 hrs Ø 時間穩定 Ø 舒適 Ø 可順便行埋納閩 Ø 出發時間有限制 到斯里巴卡灣需再坐半小時巴士或的士,搵車易有困難 B 巴士+ 快艇+船 沙巴City Bus Terminal (North) Menumbok、 納閩 5 hrs30mins Ø 快 Ø 彈性出發時間 Ø 可順便行埋納閩 Ø 巴士有機會塞車 Ø 快艇有暈船保證 Ø 轉乘太多,好攰 C 長途巴士 老越 汶萊 斯里巴卡灣Bus terminal 8-9 hrs Ø Passport會多8個印 Ø 唔使轉交通工具 Ø 行程需時較長 Ø 一日只有一班車 Ø 有機會塞車 Ø 坐到蘿友開花 ------- X 飛機 香港機場 ------ 汶萊機場 3 hrs 5mins Ø 好快,直達唔使煩 Ø 好貴,同去北海道差不多 到斯里巴卡灣需再坐半小時的士 Y 沙巴機場 ------ 汶萊機場 1 hr Ø 好快,唔使花時間 Ø 好貴,同香港來回沙巴差不多 汶萊市內交通 不厭其煩都要講多次 -------- 汶萊人太有錢啦! 你幾時見過有錢佬-------特別係30歲打後既男人會用公共交通工具ga? 根據上面既串嘴的士佬所講,全汶萊只有61架的士!我地加連威老道唔載客既的士數量都完爆佢啦! 唔易揾車兼收費昂貴,所以對我地背包客嚟講,最後能依靠既只有非常不能依靠的佛系巴士 汶萊巴士係可以一張圖睇哂的 幾乎所有巴士都會行經斯里巴卡灣bus terminal,所以係呢度等車係無死錯人的 如果想係中途上車,你首先要對當地地理位置有返咁上下熟識 因為google map雖有標示巴士站,但並無寫邊架巴士會行呢度,連個巴士站本身都唔會有寫,wa真係玄到呢.......僅次於加里寧格勒ar........ (呢個就係中央巴士站,明顯見到同大陸既差不多) (普通巴士站) 至於巴士既質素又唔係咁worse wor 所謂巴士,根本同我地香港16座紅van完全一樣,冷氣都係一樣凍得死人,不過汶萊咁熱就無所謂啦~ 車身有好大個路線號碼唔怕坐錯,收費係1蚊汶萊幣=$6,聽講仲可以叫司機兜路到路線以外既地點,甚至叫司機幾點鐘嚟接妳.........真係紅van一樣ar........ 聽落好正ar ho !?但首要係妳上到架車呢........ 汶萊係無Uber and Grab的,原因又係........無錯,根本無需要,個個人都有4-5架車,的士都無生意,仲Uber? 但比較少旅遊書or Blogger有講過既係,Bus Terminal 其實有一班白牌車司機,佢地會自稱的士,用既車比較大陸feel,不過好處係講價講得好輕鬆! 事例 : 我等左成粒鐘都無巴士去名勝"帝國酒店",廿分鐘車距離,的士要收我3-40蚊=兩舊幾 ; 班白牌開價20蚊,我開天殺價10蚊,佢lue飯應!??? 連民宿主人都話「平wor!原來有呢d野?我都唔知」 至於安全性,汶萊犯罪率咁低,OK ge ~ 汶萊仲有一種重要交通 ------ 水上的士 單程收費當地人0.5元汶萊幣,外國人1蚊=6蚊港幣,係去水上村的必需交通工具,亦可以由水上村各個碼頭自由去到岸邊各處景點如morning market, 皇宮等等,更可以和艇家自己傾到紅樹林睇長鼻猴,收費另計 要用果陣,係碼頭揚手就得,24小時營業,落雨照行~ 我今次住係水上村既民宿,開頭都諗要坐船出入會唔會好煩,點知係方便到極點!甚至覺得坐水上的士係遊汶萊雖小而必需的嘗試項目! 點擊圖片放大 +3 原本我係想一篇講哂交通住宿既,點知又係老毛病越寫越多,呢度已經4千幾字....... 唯有下回先講呢間我超級鍾意既水上民宿啦~ p.s. 其實睇完成篇,有無人覺得由沙巴來回汶萊根本係揾笨既呢.......... ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia (岩岩新開,仲研究緊點用呀!) 另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!