搵食艱難,收視率節節下降,自已又懶去勤力寫好d wor(乜Q鬼理由嚟??) 聽聞加某d字係標題度會多人睇d易呃like d~ 寫呢篇野時fb見到連李準基戀情曝光都有「懶人包」兼幾百個like,我再加埋「好邪惡呀」仲唔無得輸!!?? 今次掂呀~我齋落相唔寫字算啦! 咁又唔得~~~~~話哂峴港都係我近期少見,一個會有咁多有趣野玩既城市~唔龍飛鳳舞亂up幾句都對唔住呢個令我玩得咁過癮既地方啦~ 既然標題都落左做懶人包,就一於簡單d point form攪掂啦! 美溪海灘 曾被評為世界最美的六個海灘之一,水極清藍沙極幼白,無去過唔好話自己lai過峴港! 不過有得睇無得食,呢個海灘係唔游得水ga!!!!!!即係男朋友約你去迪士尼玩但原來只係係門口猜包剪揼玩埋舟! 但就算有得游都千其唔好游! 睇下個海面,天朗氣清都咁多白頭浪,絕對會打直游出去打橫飄返lai ar…….. 都唔使擔心ge~ 面對如此水天一色的靚海灘,一邊買個椰青咬下,一邊視乎喜好欣賞下四圍比堅尼女郎or肌肉猛男揮曬汗水,都係一樂也~ 遊玩時間 : 一早到天黑,玩到你想走為止 點擊圖片放大 +3 (唔覺意影到個女仔無著衫tim.....我無心ga,真係無,絕對無!) 點擊圖片放大 +8 猴子山觀音像 觀音像唔係澳門ge專利~ 呢座通體純白色既觀音姐姐高約67米,寧寧捨捨企係峴港東北角的山茶半島上,由美溪海灘離遠望過去都非常搶眼! 開頭我都心諗佛像一座有乜好睇,但事實就係呢個雕像手工精細,為日落下的山茶半島帶來一片莊嚴而平和的氣氛,縱然沒有宗教信仰亦會不自覺被感染,靜靜地站著欣賞其美態 點擊圖片放大 +10 另外同一位置的靈應寺及不少建築均非常精美,非常值得得登坐的士lai玩! 不過記得同的士大哥講定你會玩幾耐叫佢係度等妳,因為無飛來蜢空的士會走上山猴子山的 如果想慳d車費,由海灘慢慢行上山or vice versa ,無問題~應該3個鐘會到ga la~ 我就係on居無的士,天黑後一條友行左一個半鐘山區馬路出市區………… 遊玩時間 : 1.5至2小時 點擊圖片放大 +6 (行左粒幾鐘.......真on居....) 龍橋 係峴港玩一定會經過ga la~ 日頭無咩得別,咪黃甘甘一條唔之為乜既鐵皮假龍,條橋仲要好多車好大塵tim 但一到夜晚,條龍發出亮麗燈光,或青或紫或紅或綠,即刻成為整個峴港夜景的重心! 遠遠都見到呢個新地標是如何照耀著整個城市! 而唔講唔知,呢條龍仲有一個故事 : 傳說只要集齊七粒「o者根波」放於龍頭之下大叫一聲「出lai啦小火龍」,條龍就會真係噴火,之後就會有越南警察出現帶妳去到一個神秘而密封ge房間的~ 聽到都令人神往~但我自己無試過,希望有心人能願望成真~ 遊玩時間 : 10-15分鐘 點擊圖片放大 +5 情人橋 位於龍橋頭北的河邊,夜晚超級超級多人! 基本上10個有9個都係情侶or一大班女仔 無他ge,情人橋一帶全部都係心心心心心心心心心心心心心心心心心心,d女仔見到就會講「wa~~~~~~好浪漫ar~~~~~~~~~~」 但正如我facebook live時所講,咁多個心係度,即係花心啦,仲情咩人橋,應該叫「唔專一橋」,或者「分手橋」! 哼! 總之我一個獨男係度好無癮ar!!!!!!!! 唉,不過平心而論ar,呢度的確幾靚ge 就算唔係拍拖,周邊既酒吧食肆都係氣氛一流,遊艇food court更係最佳既睇龍橋噴火地點 至於果條類似新加坡魚尾獅既物體,sorry,我影張相就無理過了~ 遊玩時間 : 齋行20分鐘,要影相浪漫就1個鐘,夜間推薦 點擊圖片放大 +7 Han River東岸,Cau Song Han橋南方河邊小市集 同普通市集唔同,呢度賣既係玩樂~ 妳會見到一張張地布上放左一大堆80年代的玩具比小朋友隨意喪玩~有好多仲係超懷舊type,而佢地媽媽就坐係旁邊咬下瓜子食下螺肉同街坊吹下水~ 唔玩玩具,亦有檔攤放住一個個紙粘土公仔比妳慢慢用水彩油顏色~ 我見唔止受小朋友歡迎,唔少情侶都係度妳一筆我一筆製造屬於佢地自己既愛情結晶品,攪到我都好想走埋去破壞佢tim~ 另外仲有平版車、小型旋轉木馬、街邊水果檔咖啡檔等,係完全充份體驗左峴港當地人既簡單但開心既生活~ 至於我係呢度其實有d奇遇,但為顧及一向都無乜既文章連貫性,都係留返facebook page既場邊小故事再講啦~ 遊玩時間 : 1 – 2小時,但懷疑係星期六晚限定 點擊圖片放大 +7 五行山 分為兩部份,要分開比入場費,但都係10零蚊港幣je 一部份係一座山洞版既虎豹別墅,閻羅王阿鼻地獄觀音姐姐菩提老祖一律大鑊飯共冶一爐! 但最吸引既都係陽光穿透入數十層樓高山洞所化成的神聖耶穌光! 點擊圖片放大 +14 另一部份係山上各廟宇建築~ 不過最精彩的是上山後的絕情谷巨井,個名我作的,因為成個天井就好似神雕俠侶中困住裘千尺果個廿幾層樓高的墜直石洞 除左孫悟空用龜波氣功外,我真係諗唔到點樣可以整個咁神奇既地型出lai! 穿過天井往上爬可以去到山頂,但沿路狹窄兼石頭非常平滑,幾乎亳無磨擦力,必須手腳並用先可以上到去,有一定危險性,平時少做運動的女士並不建議登山 遊玩時間 : total 2-3小時,天晴猛陽光先好去 點擊圖片放大 +15 峴港大教堂 粉紅色的牆身係其標記,中世紀哥德式風格,充滿異國風情~ 但我有歐洲教堂審美疲勞症,所以影既相都係focus於旁邊影相大媽既各種古怪姿勢多d 遊玩時間 : 頂盡半個鐘 點擊圖片放大 +3 Asia Park 峴港市中心的主題公園,入場費只係六十蚊左右港紙 我想去但最終無時間去唔到,網上資料就話摩天輪上睇日落同夜景非常非常靚~ 應該都值得一到~ 遊玩時間 : 未去過唔知~但應該都係傍晚去比較好 Han Market 非常著名的遊客向乾濕貨市場,大致上分為3部份 地下近內街係乾貨,咖啡、糖果、調味料、日常家居離物以至所有手信都可以係度買得到,不過記得講價 但我個人非常唔鐘意呢part,因為一入去就木人巷式比人問買唔買咖啡,煩到嘔! 點擊圖片放大 +2 地下近河邊係街市,但感覺上衛生情況有待改善,地下正中央是熟食檔,似乎都係遊客生意為主 點擊圖片放大 +2 1樓主要買衫褲鞋襪,而極多店舖都可以幫妳度身訂造越南傳統服裝,價格方面就靠閣下的殺價能力了 遊玩時間 : 齋行約半小時 點擊圖片放大 +2 市內主要既景點大致上就係咁多~ 仲有其他Big C及商場等我就唔多講啦,當然可能仲有更多野留待各位去發掘啦~ 最後講埋交通先! 交通 : 的士 : 同街都搵到,甚至會主動撩你,起錶平但跳得快,20分鐘約港幣$70 巴士 : 市內巴士唔易搵,落車地點亦比較難預,最好問定當地人,上車開埋GPS定位自己係邊 電單車 : 多數酒店同Hostel都會有烈火戰車出租,多數港幣$100唔使就可以扮華dee扮足一日,為最平最方便的移動方法。江湖傳聞無車牌都可以渣大膽車,但強烈唔建議,因為當地人渣車真係好狼……….. 11號車 : 峴港市中心話大唔大,但話細都唔細,由龍橋尾行去美溪海灘,以我一個行慣路既backpacker lai講都要行半個鐘,而兩個市中心(龍橋一帶同五行山海邊一帶)既距離大約係美孚至尖沙咀,一來一回都真係幾甘下。所以要自己衡量下了 <iframe src="https://www.google.com/maps/d/embed?mid=1hDmReLjNQJrm0coFeUwB2qu0Zo8&hl=zh-TW" width="640" height="480"></iframe> (奇怪地只有Ublog係做唔到直接嵌入地圖,想睇確實map既朋友唯有click入上面呢條link來放大縮細啦) 懶人包都寫成2千5字,叫人點睇ar??? 我呢d長氣怪要寫得簡而清真係有待磨練ar~~~~ 好~下篇講食野,好邪惡呀~~~~~~~ ================ ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!