係紀伊半島兜左一個圈,係第7日返到大阪啦~ 相隔4年再次來到難波,第一件事梗係醫肚先啦~~~~ 其實每次去日本我都有個list要食d乜要食d乜,而每次都榜上有名既,一定係奄列飯! 無計,其實我係一個不折不扣既蛋控,特別係炒蛋,抵抗力完全係零 所以一早已係Tabelog上鎖定呢間位於難波千日前既小店「洋食屋 カトリーナ」 下午兩點幾,人唔多,但牆上就掛滿哂簽名,似乎都有返一定人氣wor 都正常既,話哂都係市中心超旺地段,無返咁上下實力應該都頂唔住 只係,我就無足夠既日文實力去睇得明個menu啦 點擊圖片放大 +2 (睇返tabelog ge review,呢度好似係吉本興業藝人事務所既日常飯堂.......um好似係好出名ar ho) 叫左個炸蝦奄列飯,900yen,但叫完2分鐘後就後悔-------menu上部有set係多80yen有齊3個餸ar!!!!好似抵好多law……. 算,忘記自己d笨7野,好味就得 來了! 睇下個樣~ 奄列做法係乎係近年流行的「一個蛋團中間切開流到一地都係」版本,即係香港人成日講既咩「神級蛋包飯」,之不過呢處老闆唔切係你面前je 講真呢種技術原理並不難,只係需要好好的拋鑊技術同火喉控制,當然蛋要夠多,所以香港d縮骨餐廳係做唔到的,但一般正常既日本廚房師傅應該係無難度ge~ ……………………………… 唔係wor,睇真d...........個邊燶燶地ge.......即係炒滑蛋la........咁我上面講咁多做乜........ ……………………………… Hey d花臣野對個味道無影響ge~~~講下味道好過啦~~ 「蛋夠滑夠香,唔會太生又唔會過熟,滿滿包住微彈的日本珍珠米,每一粒都在口內跳躍翻滾,牛肉汁令鮮味倍增,卻不會過份濃郁而搶去蛋味 ; 吉列炸蝦雖不是新鮮海蝦,但鮮味仍是合格有餘,麵衣輕薄無成口粉,香脆可口,加埋奄列飯既軟滑,正ar~~~~~」 以上為作狀食評,如果唔想睇,我可以下面寫個簡易版的 : 「好味! 推薦!」 呢種小店,你話好有特式又唔係,話好味到驚為天人又未達標,只係小本經營,平平淡淡,充滿著人情味,默默地為百姓解決生存所需 Come on,呢種煮得好味道但平凡,以無特式為特式的家常小餐館,為社會必然需要之存在,其能生存於熙來攘往市中心更是難能可貴 相比起果d著名既一流食肆,我更喜歡係呢種既平實小店~ 如果你都係一樣既,呢間洋食屋 カトリーナ不容錯過~ ================ 洋食屋 カトリーナ 大阪府大阪市中央区難波千日前10-16 ベスト!Mビル 2F https://tabelog.com/osaka/A2701/A270202/27006043/ 睇返少少review,呢間店係藝人經紀公司「吉本興業株式会社」既飯堂之一,好容易會見到明星------當然首要你要知呢間公司有咩明星先 我望過下,一個都唔識sorry.......... ================ My Facebook Page : www.facebook.com/Garcia.in.Germany Utravel Blog : https://blog.ulifestyle.com.hk/blogger/aeolusgarcia/ Instagram : https://www.instagram.com/fung_garcia/ DCFever - Fever Travel : http://www.dcfever.com/travel/utravelogue.php?id=799202 Email : funggarcia@gmail.com 請各位繼續多多支持呀!!!!!!!!!!!!!!!