日本紀伊半島Day4.3 – 九陽神功吞拿魚丼

正所謂「夜晚即管去蒲」,近傍晚時份,我終於來到今晚既目的地”紀伊勝浦”
呢度有3樣野超級出名 – 吞拿魚、溫泉同海上風光! 三樣都係我杯茶wor! 希望會有好事發生啦!
而今日又行山又淋雨但只係得lunch果兩舊飯邊度夠呢,梗係要怒食吞拿魚啦!
係information centre超好人姐姐的介紹下,我來位於近勝浦港碼頭的呢間「十割そば森本屋」



(超多謝information centre既好姐姐,一次過幫我解決哂聽日day5既行程!)

望下門口,17:00先開門,仲有15分鐘就係周圍行個圈先啦
行不數步就見到有間屋打開大門扔左個雪櫃係度,上面寫住「放低錢,自己囉」6隻字
面對呢d講求自律既交易行為,每次都令我有犯罪出蠱惑既衝動,好唔好放低1蚊囉10盒走呢?不過見個櫃得果幾盒無著數就算啦~
明知仲有15分鐘就食飯,但都真係餓得太緊要,率先試下此地聞名既吞拿魚先!
講真ar,放得係度hea賣既一定係d唔荒好得去邊既頭頭尾尾啦,太靚既我會懷疑條魚係大陸游過lai tim ar,不過味道仍然比香港一般食肆4-50蚊碟既質素好得多!
開始有d期待一陣間店啦!~

下晝5點正,老闆婆婆似乎對有個濕水利是封係雨中等開門表示驚訝,渣渣臨帶我入店開暖爐被上熱綠茶
再望下裝潢,你只會覺得自己係日本傳統家庭作客中,完全無任何餐室之感。所謂未見官先打三十,未食其菜先有好感~


(好明顯我係烘乾緊對袜啦~)

係呢個充滿和室風情既地方,連個餐牌都架勢過人~係一塊手寫的扇狀小木牌~
Um~有feel有feel~
Um~我睇唔明…………..
於是同老闆婆婆講「你地渣主意啦,乜都ok的」,婆婆點頭後帶左佢個仔出lai,一齊用非常流利既日文同我傾偈問我想食乜………
果種久違了既「友善歡樂的雞同鴨講」感覺又來了~
大家互相堅持左5分鐘,小老闆放棄了,打電話比佢一個識英文既朋友於空氣中做翻譯~
終於都明白到佢地既招牌吞拿魚定食係「分粗幼的熱麵同凍麵」問我要邊樣
自從做左backpacker以來,都好耐未試過點菜點得咁複雜了……..

我唔係一個特別鐘意澱粉質既人,亦對於日本人以飯配麵及炒飯配白飯既做法不甚理解
所以當上菜時,我望住蕎麥冷麵+吞拿魚丼定食時,個心係離一離的
Um………….我仲要係唔太鐘意食蕎麥麵的………..中計了……….

但就唔可以唔佩服日本人,點解一樣又普通(行外人覺得)又難食(我覺得)既野會變得咁好味!!!!!!!
同香港既完全不一樣,蕎麥麵煙韌彈牙唔會一團粉,但又唔會好似魔芋咁有種古怪既爽口,仲滲有淡淡的蕎麥香(好似係)
沾醬由鏗魚昆布清湯加醬油所製,濃郁但清爽,加上生鵪鶉蛋同生蔥更添香滑!
拿起小杯所盛的醬汁,一箸一啖,不論係feeling同tasting都absolutely perfect!

重頭戲 ——- 吞拿魚丼!
表面睇lai,呢碗只係一碗由其扔幾塊吞拿魚上面曬幾粒蔥上去的細碗飯,你去爭鮮買盒刺身返屋企一樣整到
但當我將魚肉放入口時,對唔住,我詞窮,只能夠講,我呢一世都未食過咁新鮮咁好味既吞拿魚!!!!!
even唔係咩拖羅位咩特別部位,仍然係入口即化,每一啖都好似炸彈咁係口中作鮮味大爆炸!!

下一口,連埋飯一齊食先…………
加埋伴左蔥花同淡醬油既白飯更加係一絕呀!!!
但點解………..會有一種醇厚既濃香ge??
仔細望下………..鵪鶉蛋黃????係吞拿魚飯內加鵪鶉蛋黃!!!!完全將美味提升至令一個更高既層次!
明明只係簡簡單單既吞拿魚、白飯、鶉蛋、醬油、蔥花、紫菜絲加埋一齊,但就足以抗衡一切花巧烹調,立於料理的頂峰! 就好似九陽神功一樣獨沽一味卻至剛至正,樸實而強大!
而整個吞拿魚丼配蕎麥麵套餐,都只係1300円!!!!!! 當時6.5算即係100蚊港紙都唔使!!!有無平得太過份呀??
天呀! !!!!!我以後食唔返點算呀??????
(呢排睇得多食戟之靈,用詞好似誇張左!)


完美既一餐話咁快完結,呢個都係so far我幾個trip感覺最幸福的一頓飯
老婆婆送到我出門口後,我走上日落的漁港,連下一整天的雨終於停了,就像這一窩心小店為我洗去這天的陰霾
係時候去我今晚既住宿了,woo我今晚住溫泉旅館呀!!!
下回詳細介紹旅館痴孖筋既露天風呂~

=================

《十割そば森本屋》
https://tabelog.com/wakayama/A3005/A300502/30004123/
営業時間 : 11:00~14:00 17:00~20:00 (19:30LO) 日曜営業
定休日 : 第2火曜日、第4火曜日
電話 : 0735-52-4578

=================

My Facebook Page : www.facebook.com/Garcia.in.Germany
Utravel Blog : https://blog.ulifestyle.com.hk/blogger/aeolusgarcia/
Instagram : https://www.instagram.com/fung_garcia/
DCFever – Fever Travel : http://www.dcfever.com/travel/utravelogue.php?id=799202
Email : funggarcia@gmail.com
請各位繼續多多支持呀!!!!!!!!!!!!!!!

This entry was posted in 外遊美食, 日本, 觀光 and tagged , , , , , , , , , , , , , , , . Bookmark the permalink.