德國working holiday第九十三章 : 在盧森堡的盧森堡

離開比利時,南下嚟到我西北歐之旅最後一站內陸小國盧森堡Luxembourg~
講起盧森堡大公國,除左出名細出名貴,一定會想像此地充滿現代感既高樓大廈,最摩登既建築,最先進既設施,話哂呢個係歐元區內最重要的私人銀行中心,並為全球僅次於美國的世界第二大的投資信託中心呀(from維基百科)
但由比利時一落火車行出首都盧森堡市中央車站,再行到市中心…………好似…….同想像差咁遠ge…….
建築略為殘舊,街道上仍然有垃圾同乞丐,感覺就好似……….德國或英國一個非常普遍既城市咁樣…….
加上當日天氣非常熱,盧森堡市又係一個位於極大落差山谷中的城市,上山落山大汗疊細汗,觀賞心情即刻大打折扣…..


(唔係周街見到呢d靚車都唔覺嚟左有米國家……)

(呢個升旗廣場我研究左好耐…….究竟邊度有地方比一群士兵列隊?)


(information center門口有即興唱歌表演……點解要特別係information center門口?)


(舊城區真係nth special……..)

穿過盧森堡舊城區誤打誤撞行到去著名既盧森堡…………..wei你語癌呀講乜鬼呀!
唔係呀! 其實所有地名有個“堡”字既—-特別係德國,都係有座城堡係當地的,例如海德堡、紐倫堡、羅騰堡、史特拉斯堡、麥克華堡、惡靈古堡等等
盧森堡地處比利時、法國、德國中間,自中世紀以來已是兵家重地,簡單嚟講就係荊州咁,一打仗就食左你先!
故此地築有非常宏大壯觀的防禦工程,並明顯睇到此為一超級易守難攻既地方!
頭先係舊城區見所有野都無咩特別,但見到此地後,終於覺得…….um係有d料到wor!



雖然真係有料到,但如前文所言上山落山+30幾度高溫+內陸山谷無風,儘管某些地方有不顯眼既電梯,不過夏天來確是有點難受!
一場嚟到,唔可以比熱浪同疲倦打擊我既!
的起心肝再行埋去遠處山上的Mudam Luxembourg,幸好風景亦是不俗~
真的無力了,坐巴士返火車站囉背囊,食d野,就去住宿處,完成盧森堡一日遊了
唔好睇我寫得咁短咁輕鬆,足足行左6-7個鐘ga啦……….


(離開Mudam Luxembourg時先見到摩登大廈,應該呢個先係盧森堡吧)

住宿呢件事係要特別講下既!
其實盧森堡呢一段行程我plan得好辛苦,只因有兩個大問題 :
1. 盧森堡市得一間hostel並一早full哂,其他酒店都貴到唔係人住,唔知點stay
2. 呢個係我西北歐之旅終站,之後我就要返德國啦,雖然旁邊就係德國西南部,但點樣又快價錢又合理地返到東北部既柏林真係難事
我曾經諗過完全唔stay a night in Luxembourg,即係朝早由布魯日出發–>盧森堡玩一日–>即晚坐十幾個鐘巴士返柏林,不過咁辛苦之餘仲要忍受約40小時出左汗無涼沖……….
本身臭男人無乜所謂呀,燻到巴士旁邊果個唔好啦,易地而處旁邊條友仔臭到冤仲要對十幾個鐘都想打鑊佢啦!
所以最後計劃係於盧森堡機場訓一晚,第朝再坐巴士返德國
wa我backpack咁耐都未訓過機場,終於可以一試,諗起都興奮呀!!

人算不如天算,於比利時布魯日嘔餐死hostel中竟然比我識到香港既英國留學生阿邦!
佢將會與我同日到盧森堡,同我一樣有第一項問題,但佢選擇硬食間貴+遠既hotel
我無房,佢有房,兩人share抵好多,不謀而合呀!!!
單人床,兩個男人,基不可失! 為左荷包,一晚大被同眠都無辦法啦!
於是盧森堡呢一轉就成為我整年行程中極少見既二人行一日後啦!
而阿邦亦都係我呢一年認識,少數岩傾既香港男性朋友(估計唔多過5個……..),thanks for your host! Really nice to meet you guy!



(500大元港幣都只能搵呢種遠離市中心既hea hotel……)

(原來我地一張合照都無,but nice to meet you邦!)

至此,一個月的西北歐之旅正式完結!
由6/5開始離開柏林到波蘭克拉科夫,再倒穿越德國到丹麥西部Esbjerg,一直東行經數個小島到哥本哈根,然後飛到英國及蘇格蘭,再返落荷蘭阿姆斯特丹及海牙、比利時布魯日,最後8/6完結於盧森堡,共7個國家19個城市
(廣告時間~即係第77至第93章,之前有東歐之旅 : 第12至24章,德國南部環遊之旅 : 第36至50章,北歐及波羅的海之旅 : 第51至72章)

這個旅程係我working holiday第四個長途旅行,同時亦係使費最勁,surprise最少,同遊覽得最hea既一個!
但都係果句,我總覺得將來一定會再嚟呢幾個國家,就下次再發掘多d啦!

好啦,夏天到了,要繼續旅行,就係時候返一返德國換裝備啦!

=====================================

補完此blog上未成文的相片和無聊閒事:
My Facebook Page : https://www.facebook.com/Garcia.in.Germany ,多多指教~

~瘋人鋒語 – 30前80後的德國工作假期~

Promote your Page too

This entry was posted in 盧森堡 and tagged , , . Bookmark the permalink.