外傳3 : 旅遊言語不通國度的3大工具及用法

有好友問我英文咁弱又唔識德文,點解係德國生存得到?仲去咁多地方tim!
其實大家常去既日本同韓國都唔係咁易溝通啦,只不過香港女仔多數識幾句韓文,男仔一定識幾句日文,係咁ee攪得掂je!
不過係d言語不通既點一個人自閉都好,問路、坐車、食飯、買野等,都一定會與人接觸,意思攪錯既分分鐘弄垮整個行程!
筆者高考曾英文肥佬,oral囉U,更到過不少非英語國家,甚至德國working holiday期間都因不熟德語而引起很多麻煩,但暫時都仲無穿無爛,不是撞得板多自有神庇佑,只係諗到一d小方法去解決,就係度分享下希望對各位有用啦~
 
必要工具1 : 智能手機

◆用法1 : Google translate 

唔使講,最直接有效知外星文字的方法!
筆者於加里寧格勒時就用此同只懂俄文的hostel職員“對話”。手機的google translate可以把文字影相作圖片翻譯,雖不大準確但仍有參考價值,特別對餐廳的純文字menu有效!
但google translate需連線使用,所以很多時候都無用武之地…….
 
 

◆用法2 : 字典

一早download定該國的字典apps(記得係可離線使用的!),去到邊查到邊。
缺點係效率不高,而且有d本地用詞未必查到,現代漢語詞典都查唔到咩係「奪命鉸剪腳」啦!(廣州方言詞典可能有……..)
 
 
◆用法3 : 影相
上網或街上見到d poster既景點或資料幾好wor!影低佢~直接比張相人地睇,人地就知你要乜!
呢招最常用係坐的士,問路同食飯,甚至screen capture地圖再問人都得。
係聖彼得堡時我見門口M記個包幾吸引但又唔知咩名wor,門口影低比收銀姐姐睇,佢微微一笑,快而準送上~但個包唔好食……
 
 
必要工具2 : 紙筆墨硯(無既話紙筆都得~)
用法1 : 寫地名或交通公具號碼
呢個係我用得最多既方法。當時我在斯洛伐克要到山區Zdiar,起碼都要轉三四次巴士,仲要每次都唔一定係總站落,十幾架車又唔知呢架岩唔岩,司機大哥係Yes No都唔識的。於是我上網check好轉車站名後寫係紙仔上,一上車比佢睇個地名,司機見你係外國人多數都明白,咁就無咁易錯啦~
當然用手機打個名比人睇都得,但係治安不佳既地方要小心財不可露眼。
 
(於加里寧格勒,落巴士後向車站職員畫來畫去15分鐘問路)
 
◆用法2 : Draw something!
Draw something大部份人都玩過ga la~有時畫圖畫對方可能仲易明白,加埋漫畫及手語更加功效顯著!更可以叫對方畫返比你tim~
係俄羅斯同立陶宛我都常用呢招問餐廳、巴士站同找換店係邊。不過最勁既都算係德國奧格斯堡,係間本地餐廳用draw something同唔識英文既大叔“傾”左3個鐘,仲談笑風生tim!雖然我都唔知大家講左d乜~
 
 

◆用法3 : 想食d咩?寫定先!

呢個係我一個朋友遊日本時既做法!
佢只想去無遊客的地道小店,但餐牌無圖片,甚至係無餐牌的,點算?於是佢一早搵識日文既人寫低「你們最受歡迎的3種食物是甚麼?」下面fill in the blanks間3條線,等對方畫or指示or展示出嚟後再決定~
當然,食得落可叫哂ge~
 
必要工具3 : 厚臉皮一塊

◆用法1 : Hostel,Hotel及Information center

世界各地既以上3個地方的reception多多少少都識d英文,更重要係佢地9成都係本地人,所以到達一個陌生地方時最好搵佢地做盲公竹。
通常我必問既有
a.有咩必去景點
b.有咩本地人先會去既本地餐廳
c.呢個國家有咩值得去or鮮為旅客知既美麗地方
d.坐咩車點樣去
另外一般都可以在此處拿到free map,拜託職員寫低圈低資料係地圖上,有咩事囉住張地圖問人都易攪d!
仲有多數reception都係靚仔靚女,假如傾得埋又得閒既話,不如飲啖茶食個包……………唏!講呢d!
 
(於加里寧格勒遇到,唯一懂英語的俄羅斯information center staff)
 

◆用法2 : 周街用你熟悉既語言大叫「有無人幫到忙呀???」

呢個係最後辦法,假如失陷異國走投無路時的孤注一擲。但用完後極度樣衰,萬千目光在一身,士氣值-10,而且效果不大,唔建議亂用!
 

◆用法3 : 手語 + Body language

我諗呢樣大家都只自動波做ga la,之不過如果對面真係唔明既,真係玩超級無敵大電視,或成套歡樂今宵做一次都要……
另外有可能對方會唔明英文one two three four及我們慣用的數字手勢,如果要4份熱狗既話最好指指隻狗,跟住由1舉手指到4
 
話題方面
係車上酒吧中旅館內,好多時都會主動或被動的與人聊天,如果大家想傾下偈但又唔知講咩既,最常用的開場白都係“Hello,where are you come from?”
講左大家既國家後就可以跟據情況,講下有關旅遊、語言、文化差異、個人經歷、今日玩去左邊、此地的旅遊景點等等……..
再唔得ge,講下音樂、運動、荷里活電影醉拳甘迺迪等等等等, 男人可以講女人, 女人可以講化妝品…….
再唔得ge………呢個人傾唔到偈,放棄吧啦!
 
(於列支敦士登的私人hostel晚飯時,一班五湖四海傾足一晚~)
 
以上純粹個人經驗分享,有d更係誰不知娘親是女性既廢話tim!
可能大家各自有更好的辦法,歡迎交流下呢!
 
 
鋒.Garcia
2014-05-10,無聊時寫於波蘭至丹麥的超長途車上
 
 
This entry was posted in 德國 and tagged , , , , , . Bookmark the permalink.

6 Responses to 外傳3 : 旅遊言語不通國度的3大工具及用法

  1. 鋒Garcia says:

    Hi JoeiB! Sorry ar我而家先睇到你留言!
    我上年係話1/7重新計算150人,4,5月已經申請得wor!不過可能今年又唔同……
    Anyway大家傾下偈無問題啦~u can Like我上面呢個fb page inbox我呢~

  2. JoeiB says:

    Hi 鋒, 大使館那邊說要 01/07 才開始接受申請 (2014年), 如果獲批的話, 要於3個月內出發.不過到時你一定已返來了. 你剛去完, 一定有很多寶貴的經驗/意見可以俾到我, 可以留個聯絡方法給我嗎? 感激

  3. 鋒Garcia says:

    Yokocheung~Haha其實有時同唔同語言既人傾偈都幾好玩的!

    JoeiB我如無意外仲有兩個月,你會幾時出發呀?

  4. JoeiB says:

    我plan 緊今年去 呀! 你會幾時返HK ??

  5. yokocheung says:

    *唔識講到識

  6. yokocheung says:

    好鬼正,唔識講都識咯一於,指手畫腳最正,好考演技呀^^

Comments are closed.