哥哥同子華成日唱 : 「你始終都有第一次!」 第一次........驀然回首,果種青澀,緊張,興奮,真係令人再三回味 ; 當時的快樂、美妙,直到而家都令人難以忘懷呀.........第一次join local tour~ 梗係講旅遊啦!!!!~~我又唔係要係旅遊網站賣咸濕廣告~ 續上回~於愛沙尼亞的第三日, 係我旅行咁耐第一次跟local tour去玩,到塔林東邊的拉赫馬國家公園Lahemaa Rahvuspark 平時唔跟係因為d地方自己去得到,今次跟係因為d地方一睇就知自己去唔到,但張宣傳poster d相太靚,一於試一試,獻出我第一次啦! 係塔林舊城區information center集合私家車出發,除左導遊仲有兩個紐西蘭既女仔,都好呀小班教學,但佢地d英文講得太快,十句明得6句,所以都係靜靜地陪笑居多,不過大家都係very nice的! 第一站去左Jagala Waterfall~ 本身瀑布無咩特別,但由於天氣極冷,整個瀑布在傾瀉狀態下完全冰封,形成一道超巨型冰牆! 可以零距離站在瀑布正下方的機會在不多,更可走到冰牆內水簾洞,宛如鐘乳洞一樣神秘美麗!不同之處只在洞內有陽光透射,而且點破壞都無問題XD 點擊圖片放大 +2 之後來到一個碼頭模樣的東西,雖被積雪完全覆蓋但仍能看出其破爛荒廢,日光下仍略帶陰森 廢盡我Alevel囉F既Listening九牛二虎之力先聽得明白,原來呢度係冷戰時代前蘇聯幫潛水艇塗膜.......呀唔係!係幫潛水艇做反磁場深測加工的工場 導遊仲話以前愛沙尼亞係蘇聯既歐洲窗口,係非常重要既戰略地域,所以好多呢類軍事遺跡 就算唔報團,如果比我一早比我知此歷史既話,我自由行都一定會come here的,但可能死左都無人知....... 因為呢個潛艇工場四處都是被厚雪遮蓋的空洞及滑冷,跌落冰海事小,跌落兩三層樓高既鐵皮房事大,仲未計鐵枝玻璃尖鐵等等..... 唔係導遊兄精熟地勢,未嚟過既一定會叉錯腳! 點擊圖片放大 如果你睇到呢度都覺得“車咪都係呢d",咁以下呢個Kuradi Sihtkaitsewoond應該會比到surprise你 ------- 一個以雪為沙既極地海灘呀!!!! 呢度一眼望去能清楚看到雪和冰形成的不同層次,淺灘上佈滿的圓形怪石全罩上光潔螢亮的冰帽 行走於海面之上,除了能試盡世界級滑冰花式外,環視四周,更會老土地感慨大自然的神奇和自己的渺小? 驚唔驚冰裂跌落水?一班人+呢個識途老馬導遊兄又唔太驚wor 萬一真係跌,我苦練多年既破冰轉身大派用場啦! 點擊圖片放大 +5 Lunch去左Kasmu Meremuuseum ------ 一間漁獵博物館食飯..........唔係食標本呀! 間Museum係藝術家館長私人開的,同時用自己廚房招待呢個tour既旅客,即係我地去左間鬼佬非公開私房菜食飯! 10€一人,唔好話d三文魚薯仔櫻桃芝士撻香草醬全部homemade超好味呀,只係能於咁地道既愛沙尼亞家庭用餐都值回票價! 點擊圖片放大 人少既好處係可以隨便改行程~ 飯後Museum外海邊咁靚,行左一圈餵飽埋相機先去下站唔知乜乜森林睇唔知乜乜松鼠 呢種松鼠好鐘意咬某種樹林(得啦我知超多不確定詞語!),係會咬到佢“冧”果隻,所以經常造成樹林倒塌非常危險,可惜既係我地搵唔到呢種動物既踪跡,呢tour唯一有d失望既環節 點擊圖片放大 太陽開始完全西沉,嚟到另一個海邊Altja既石灘 呢個石灘無咩特別,係得一個字,靚! 寫景寫到好攰呀!唔講啦,有幾靚,睇相啦! 點擊圖片放大 +4 最後去到一座現已改為博物館及酒店既舊式莊園 如果唔係天黑同冬天既應該都幾靚,但而家對我地嚟講就只係一個純白色花園 其中一個團友一時興起話要穿過花園跑返去~於是4個加埋過百歲既年青人就係到小腿深的積雪上直線狂奔跑到抽筋,最後4個一齊倒在雪地上大笑,好青春好日劇呀!! 就這樣我既第一次local tour經驗結束啦! 團費+小費+午餐共約$600港幣,唔可以話平,但以所見所遇及開心程度來說絕對是物有所值,更重要係你得到比同樣價錢都買唔到既經歷 呢個第一次,我永遠都唔後悔(喂講呢d......) ========================================= 近期試緊呢個Facebook Like box,但比想像中難set up好多古古怪怪野,例如整左delete唔到la.... Anyway,有興趣既網友,like一like我個無聊page ar~(係咁賣廣告煩唔煩呀你!!) =================================== IG果邊間中會有d和Blog及fb page不一樣的相片和story,大家有興趣既去follow下支持下啦~ Instagram : https://www.instagram.com/fung_garcia_backpacker/ ============================== 我既Youtube Channel正式開通啦!!!! 快d Click入 「鋒加西亞 / 旅人瘋語」Subscribe 睇片再禁個like啦!~ ================================= Email : funggarcia@gmail.com Facebook Page : www.facebook.com/Garcia.in.Germany 文章同時刊於UBlog、 DC Fever Travel、 Blogspot 、遊牧爆谷、Medium,請各位繼續多多支持呀!!!!!!!!!!!!! 鋒加西亞 - 德國工作假期後的世界流浪