德國working holiday第五十九章 : 重回柏林的蝸居生活

遊記太多,暫回正常時空,報告下而家係德國生活既點滴先~
 
兩個月既長途旅行後,由2月底開始我已駐紮於在柏林,11月時日日hea爆生活頹廢既柏林
今次返嚟,主要係配合有個fd嚟柏林玩我要做盲公竹,如果唔係我一定會玩埋波蘭先unun腳他他條條返德國
另外我想試一試可唔可以係德國街頭做小販賣下飲品,因為我知英國囉小販牌照係好簡單的,要賣都要有個岩既地方,我相信柏林自由既環境會易d
可惜我問完相關市政府部門後話working holiday visa唔比咁做,於是全盤大計咁就泡湯了………..
之不過,柏林既生活指數幾乎係全德國最低的,要雙失係度似乎比較好,而且我死唔信邪,唔信我會輸比呢個地方!!
皇天不負有心人,今次返嚟我終於有屋有工有working啦阿彌陀佛!!!!!(有工同有working係一樣ga中文老師……)
 
我而家居住既房位於柏林中央車站(Hauptbahnhof)附近,交通都算ok方邊啦(柏林中央車站同市中心一d關係都無)
原屋主要出差所以出讓暫住一個月,我睇第一眼時已經鐘意左佢!
間房有我香港屋企2/3咁大,大電視大梳化,乾淨企理,柏林少數既9樓高,仲有可以睇日落既露台,唔使4千港幣一個月我覺得ok ar!
但有左自己地方後個人好似仲hea左……..
以前stay全日留係hostel會覺得頹廢到自己都討厭自己,但而家反而有d唔想出街! 試過將梳化椅移近露台就咁曬左一日太陽!
而我每日都會做既,就係去超市搵有d咩古怪材料買返嚟反轉個廚房!得閒叫d fd上嚟食飯飲酒打邊爐~
深夜時邊玩我十年都未肯玩完既逆轉裁判,邊睇電視裡李小龍同阿Sa阿嬌講德文,都幾逍遙!~
 
(某晚同working holiday既好友,德國土生香港人及剛來柏林既香港exchange大學生鴛鴦鍋~)
左至右,上至下:
胡椒排骨湯、西蘭花薯餅、芝士白汁雷蘭花蘑菇意粉
生火腿配哈密瓜(唔叫煮呀!)、encore嘅港式叉燒煎蛋飯+凍檸水、德國腸伴意式餃子配酸忌廉
自製Nachos、燒原舊牛仔骨配蘋果薯仔沙律、咖哩雞翼
(p.s. 其實我覺得我假如亂post野既話呢,成個Facebook page會變左飲食版law…..忍左手ga la….)
 
咁都唔係日日咁浪費生命ge~
踏入三月大地回春,柏林既陽光開始輕撫大地,凡有光之所在,總有本地人站著坐著躺著攤屍著,睇書聊天飲酒訓覺乜都唔做
酒吧餐館cafe客似雲來,開放的所有露天座位坐無虛席 ; 而只要係草地,都總有人在享受春天的來臨
至於我當然唔會浪費好天氣啦~
日照下約10℃的氣溫剛剛好,坐在施普雷河畔,感受著臉上的微溫悠閒地寫作……….這是香港不太會有的生活吧~(某程度來講其實都係頹廢既一種…….)
 
 
working方面………….wa好感動!!!!!我呢篇blog第一次正式講working ar!!!!!!!
因為面皮超級厚,終於比我搵到份服裝批發店既工作!
執下衫,上下貨,打掃下,其餘時間就係上網……….
囉住6€一個鐘嚟睇銀魂,好似有d過份ar ho?但點都好過幾萬銀一個月開會睇女優寫真ge
 
另外華人論壇上有請貨物包裝員,去到pat野做左一陣,個顧主同我講 : 「如果你想搵多d,可以幫我去買奶粉,每罐比返1.5€你」
買奶粉…….打包……what呢班原來係水貨客運奶粉返大陸!!!!!!!!!?????
我唔知德國呢樣野合唔合法,亦知對大陸人嚟講呢個係理所當然無咩問題,但作為香港人,我真係完全接受唔到!
窮都要有骨氣!要我助紂為虐!?采妳都傻!即走!
 
到而家,無意中比我搵到一份按摩店既工作!
我知大家第一時間一定諗衰野 ———— 「睇死你一定做邪骨賣沙田柚ga la~」
唔係呀~~~~~~係一間正式既中醫藥推拿店,正過正骨水!
而按摩推拿店本身都係好多working holiday人都會打既工,因為語言要求唔高嗎,時間又彈性人工又唔錯,個註冊中醫師仲好好心機教我點做推拿tim!
所以,暫時都算過得唔錯啦~
不過靜極思動,停左一個月,開始又想去旅行啦…….
 
 
我暫定到5月都會以柏林為基地,假如各位網友嚟玩既,不妨搵下我呀~
 
預告 : 下一章會變返遊記 ——– 俄羅斯聖彼得堡
 
This entry was posted in 德國 and tagged , , , , , , , . Bookmark the permalink.

8 Responses to 德國working holiday第五十九章 : 重回柏林的蝸居生活

  1. 鋒Garcia says:

    Hello Carz! Sorry ar而家先睇到你既留言!
    純粹個人意見 : 如果唔去博物館唔去動物園唔去周邊地區等等,純走馬看花柏林兩日是ok的~而Frankfurt真係無咩特別,除非特別愛好,否則佢周圍有更吸引既地方:)
    3 days包哂Munich同黑森林會好急,只係交通都好花時間,同埋黑森林裡面既交通唔係咁方便,好視乎你想去邊度同睇d咩。
    Btw,Berlin to Munich係有巴士落去的,約7小時,有時會比火車更平更快,你可以比較下~

  2. carz says:

    hello! i wanna go to visit Berlin in end of Sept and then take train down to Munich and black forest area, plus travel to Zurich afterward. Do you think stay in Berlin for 2 days is enough for sightseeing? As i am not deeply explorer but wanna have a look and leave a footstep there.
    24/9 – 3/10 (10days)
    Berlin – 2 days
    Frankfurt – 1/2 days
    Numberg – 1 days
    Munich – 3 days (travel to black forest and other place)
    Munich – Zurich (1 days)
    Zurich – lurzen ( 1 days)

  3. 鋒Garcia says:

    re Winghehe : 好多大陸人咁做,其實聽聞係德國都係犯法的,而且有任何人都只限買3罐only,有唔少大陸留學生都會幫手,但我真心接受唔到!

    re sunshinelala : ha其實唔算平啦!我今日見到有月租$4000約6/700尺既全間apartment連露台!而有朋友住student apartment二千幾蚊勁靚tim,係香港我地慣左貴je

  4. sunshinelala says:

    咁平租到個咁靚嘅地方, 真係冇可能係香港搵到

  5. winghehe says:

    買奶粉??? 德國都興架?

  6. 鋒Garcia says:

    Re Alex : 其實睇地方同運氣,以德國為例,慕尼黑同法蘭克福相對易搵工,但樣樣野都好貴 ; 柏林就真係幾難搵下,不過生活指數低。其實點都會搵到ge,只係搵幾耐幾多錢同做d咩既問題je~

    Re Kelly : 我識得“多謝”“唔該”“你好”同埋數目字“1” , 算唔算識XD

  7. Kelly says:

    你識唔識德文嫁?

  8. Alex says:

    其實working holiday係咪真係好難搵工?我都有興趣去!

Comments are closed.