試住沙田Hyatt山景行政套房 | 包$1000任飲任食!?

近排日日睇新聞,都會睇到個人壓力好大,所以想好好搵個地方游飽水發洩下!除咗海灘,酒店泳池都係唔錯嘅選擇。

今次入住重點:
1. 高CP值Package - 房費包$1000飲食回贈
2. 山系露天泳池 - Chillax!
3. 空間感十足行政套房 - 跑步都得

$1000兩個人用去咗邊?
– 酒吧晚餐 + Live Music
– 早餐 Buffet

所以把心一橫去咗book酒店!今次訂嘅係有優惠套餐嘅九肚山景行政雙人套房$1600 (未加稅) 一晚,唔駛做會員都可以Book,一房一客廳兩個沐浴室,週六日入住,加埋稅後人均$880。

呢個Package,房費內有$1000飲食回贈,喺酒店裏面食乜都得,早晚餐Buffet、酒吧、Cafe等等。作為大食積嘅我,今次趁機放肆!(最尾發現幾乎冇洗過任何錢喺食物上面 (笑))

露天泳池 - 大、實用、環境優美、Chill、恆溫
Check-in之後,就直接去咗泳池!呢個泳池應該係香港住過咁多間酒店嚟講,數一數二嘅露天泳池!佢勝在有宏大山景、寬闊面積,同埋清新空氣 (唔係廣告腔,因為佢真係咁),同一個池有哂 hea area、小朋友池、練習泳道,適合大人細路一齊玩;就算10個人同時喺個池到游,都唔會覺得迫。重點係個池係恆溫,冬天游都得~

中意晒太陽嘅人基本上可以喺池邊好舒服咁攤成日~(我個人推薦攤喺一入泳池嘅右手邊,黃色圈住,可以睇到山,好Zen) 池尾仲有個露天暖暖嘅按摩池,都好受歡迎!

免費用按摩池、桑拿室、蒸氣室、Gym
更衣室有齊按摩池、桑拿室、蒸氣室,游完水去享用下,應該會變美吧~ Gym 喺同一層另外一邊。

超闊落一房一客廳
雖然間房都唔新,但空間感的確係會令你超級興奮。最搞笑嘅係,入住酒店5個鐘後先發現個廚房對面有另一個沖涼房,即時更加興奮!



▲大家見唔見到個廚房,根本諗唔到對面有個沖涼房+廁所XD

▲被忽略的真實面貌

▲房入面果個差唔多,多個浸浴缸

▲房內有個Bluetooth Speaker,音質普通,可變換光顏色

$1000去咗邊?
今次兩個人,初初以為好難先食到$1000,點知原來都幾易。

晚餐喺Tin Tin Bar到食,嘢食唔太平,不過Cocktail價錢唔曳,Happy Hour飲嘢仲有買一送一,有Live Music,加上有$1000,咁我就唔客氣食多啲喇!

游完水太肚餓了冇影相,先食咗巴馬火腿Pizza ($230),薄身多芝士,溫度暖熱,好吃。

個人較喜歡是這裏的Cocktail。每次都要點經典的Manhattan來試試調酒師是否對我的味,結果Bingo!那第二杯就試下火熱長灘島,有辣椒的頂在表面,先來的是冰涼香蕉奶味,隨著液體滑過喉嚨之後,陣陣辣椒在喉嚨底湧上味蕾,Wow,沒有違和,很有驚喜。
▲嗜辣的人可以一試

早餐有中有西有麵,都切合到唔同口味嘅住客嘅,給大家看看照片就知道有甚麼吃喇







▲鬼佬口味嘅朋友隻碟

冇食到夜晚Buffet,有食過嘅朋友不妨同我分享下~


同埋唔好錯過佢哋招牌蘋果批!

唔再長氣講喇,呢個價可以用到咁多設施,又可以自己揀嘢食,又有咁大間房,你哋又覺得呢?

利申:是次及上次住宿自己付費,並無任何贊助 (我都想有) XD

This entry was posted in 新界, 消閒, 美國菜, 自助餐/放題, 觀光, 運動, 酒店 / 度假村, 香港 and tagged , , , , , , , , , , , , , , , , , , , , , , , , , , , , . Bookmark the permalink.