試住港島新酒店Hyatt Centric | 每人HKD215晚?!

大家仲對Hotel Vic有印象嗎?喺8月尾的時候,開業差不多1年的Hotel Vic已變身為連鎖酒店品牌Hyatt Centric了!之前到訪過東京銀座的Hyatt Centric + 一直沒有機會試住 + 加上近日酒店房價實在頗平,好奇心滿滿的我趁住朋友係Hyatt會員就入住體驗!
今次2日1的周末淨雙人房住宿(不包任何餐飲)連加一總共:$215/位。

對,這價是有蹺妙。除了近日香港普遍房價跌得厲害之外,本身再使用了Hyatt的Best Rate Guarantee Reward (最優惠房價保證回贈)。因此在現時原價$900的情況下,酒店回贈了大概美金50元給我,這樣扣扣減減,就變成$430/晚住Hyatt的節奏了。

*因為很多朋友Inbox我說不太明白這個系統,所以在此再簡略講多少少。

*Best Rate Guarantee 是當你喺官網以外的平台找到比官網更平的房價時,你可以官網上填申告表,經酒店核實之後,酒店就會提供你所申告的價位 (你搵到平啲價果個),還另外給您 8 折優惠或 5,000 點凱悅天地獎勵積分。

如看到外面平台比酒店官方網較便宜,必須於預訂官網酒店房間後24小時內到官網填寫申告表 (千萬不要在外面平台預訂房間,否則連回贈的機會都會失去)。可以選擇英文或中文填寫,但如果填中文的話,便要額外再打電話去官方凱悅全球聯絡中心,再等官方審核你嘅申請 (電話詳情)。當然審核成唔成功都要等官方批喇,因為都有唔成功嘅Case~

當然如果要搵到出面比官網平嘅平台,都要花費少少時間,唔係話一時之間就即刻有個優惠嘅,同埋呢個優惠係要下一次入住先會用到的


評分總覽
房景:5/5分
一定一定要揀維港景,唔係嘅話望住內街唔知好嬲定好笑。

位置:4/5分
落街行2-3分鐘行返出大馬路就可以搭巴士或叮叮,都有地鐵,睇自己選擇,要去銅鑼灣等等行街地區都好方便。附近都有唔少小店,都係自己選擇啦~

設施:4.5/5分
有無邊際泳池、望維港健身中心、望維港Sky Bar、望維港Lounge、桑拿、蒸氣室、VR Gym遊戲、多國菜餐廳,房嘅電視都高清幾靚仔,有sound bar。

睡眠質素:4/5分
睡床較軟,訓得都幾舒服,落晒窗簾熄晒燈基本上係全黑。唯獨是天花板有啲防火燈閃下閃下,擰埋一邊訓都無咩事嘅。

服務:3.5-4分
基基本本,你需要幫助時,酒店職員絕對會樂意解決你嘅問題,但唔好期待有5星酒店嘅果種熱情主動嘅服務態度。
▲Check-in大堂供客人飲用的香橙士多啤梨水

▲灰白主題雲石牆走廊

今次入住房間位於10樓,屬海景客房,打開房門就看到引頸以待的景色~調光看清相片,大家就會看到房間主要是灰+卡其+雲石主調,用色低調,不會誇眾取寵,房間不算太大,卻讓人舒適安心。


▲只有茶包及咖啡膠囊的Minibar▲吉嘅雪櫃

浴室也是一貫的雲石設計,感覺高尚優雅。特別之處,酒店不使用即棄式沐浴套裝,取而代之的是家庭式般的大容器,相對環保。
另外我很喜歡他們的護理用品包裝設計,充滿香港風情,最終也捨不得拆開,原封不動的留在櫃裏。
來到無邊際泳池,長方形達23米!多數見住客也不是真的在游水,最多浸下水曬下太陽歎緊。池的最盡頭還有個小正方形按摩池,舒唔舒服、有冇按摩效果就見人見智喇。

嚟到呢度冇理由唔打卡嘅!
更衣室裏面有埋桑拿+蒸氣浴,非常適合女士們!焗完隔離就係沖涼房,另外仲有乾衣機同保鮮袋,非常方便。

▲附有日式木桶裝水倒進熱石

健身室內的飛行VR遊戲,應該是香港少有。我未玩過海洋公園VR所以比較唔到,但都算係幾有新鮮感。這是考平衡、精神的遊戲,如果自問容易頭暈的話就唔好勉強了~重大提示!女仔玩嘅話要着緊身啲嘅褲,千奇唔好着裙、鬆嘅短褲,一定走光。

▲大家都需要健身,強身健體!

▲高空俯瞰城景,唔係房客都可以嚟食嘢飲酒

整體嚟講,酒店硬件算係唔錯,淨係喺間房、泳池chill下我都覺得值,喺頂樓Cruise食過晚飯,乾炒牛河$90?太X都$5X幾啦,俯瞰維港夜景,質素唔曳,有service,算係咁。而家呢個階段,性價比高,就算房價去返正常千零蚊,我都覺得比得過。

Hyatt Centric
Tel: +852 37621234

This entry was posted in 住宿, 酒店 / 度假村, 香港 and tagged , , , , , , , , , , , , , , , , . Bookmark the permalink.