畢業要去Grad Trip應該是常識吧，趁著人生最後一個暑假，決定送自己一份禮物 - 獨遊澳洲！！！ 帶返頭盔: 去個時冇諗住會寫blog，所以好多相都唔齊，上網搵唔到就要靠大家想像下啦 事前準備 Visa 呢個放第一，因為真係好好好好重要，我都差啲唔記得左(香港太方便啦..去好多地方都唔使簽證) 拎特區護照就可以去呢個網申請Visa。填哂資料，俾AUD20，等幾分鐘就會收到confirmation email啦! http://www.border.gov.au/Trav/Visa-1/601- 但如果你係拎BNO就冇得上網簽證，要去搵旅行社/代理幫你啦~ 機票 呢次搭Scoot (酷航)，從香港出發到悉尼，再係柏斯返港，來回程都需要到新加坡轉機。去程冇包寄倉行李，回程就有寄倉行李同埋Scoot-Thru service (者係你件行李會由出發地一路送到目的地，唔使係轉機地出關拎完行李再入關，方便轉機時間短嘅朋友) ，總共 HKD3,337 我當時係等到Scoot做優惠先的起心肝買，當然呢個唔算最平(宜家2,000頭已經去到)，但個時真係太想去澳洲旅行，所以諗都唔諗就買左啦~ P.S. 我本身係想去黃金海岸，但買機票時發現去柏斯會平幾百蚊，所以連柏斯有咩玩都唔知就買左(之後再介紹柏斯其實可以好好玩)。之後先發現原來本身柏斯機票就特別平，係好多旅客去澳洲必選嘅轉機城市。雖然好多人都知，但都寫出黎俾新手們參考下啦~ 住宿 獨遊+慳錢 = 訓床位 雖然以前去旅行都會慳錢住Hostel，但因為有伴，都會揀訓獨立房，所以今次都係第一次住Dorm。 我今次揀住宿就得4個條件: 1. 價錢合理 (<HKD150/night) 2. 近CBD (周圍唔會過份冷清，又方便搭交通工具，想慳錢係CBD行完街再行返去都得) 3. 乾淨 (特別係床同沖涼間) 4. 女生房 (因為今次係獨遊，自己一個要安全少少) 以下三間就係我今次住嘅Hostel: (無話推唔推薦，畢竟我只住過呢幾間無咩比較，但至少話俾大家聽都唔係 "伏"，可以安心去住呀) 悉尼: Sydney Backpackers (HKD492.03/ 3nights from Agoda) 悉尼呢間真係不得了，第一日入去住都係得一個外國女仔，點知第二日佢都走埋，我就自己一個霸左2日呢間10人房。係幾爽，但間房太大太凍，其實夜晚自己一個都有少少恐怖... credit: Agoda.com Female dormitory 墨爾本: King St Backpackers - Hostel (HKD133.03/ 1 night from Hotels.com) 呢間我覺得係最專業: 有職員制服、有毛毯(真係暖架!)、有免費早餐(多士牛奶)、星期三晚有免費Pizza Party，成間Hostel感覺好熱鬧，可惜我淨係留左1晚，明明星期三晚係到住都因為參加Tour趕唔到返去食Pizza... 但可能因為呢間最多人住，所以我覺得佢個廁所麻麻地乾淨，加上佢沖涼間同廁所係連埋係一齊，感覺上更加麻麻。但我有係朝早遇過韓國Oppa洗廁所(係女洗手間冇錯)，如果怕污糟可以朝早等Oppa清潔完先用啦。但總括而言其實都唔錯，都對得住佢個價錢架~ 最重點係勁近Southern Cross Station!!!無論係來回機場定其他city都勁方便!!! credit: kingstreetbackpackers.com.au 柏斯: Hay Street Traveller's Inn - Hostel (HKD381.96/ 3 nights from Hotels.com) 柏斯呢間最大特色應該就係佢外形，直頭就係一間複合式住宅，我岩岩到個時行過2次都認唔到(好彩有Google大神)。我去個時有位日本女仔應該係去Working holiday，佢同佢Manager都好好人。呢到沖涼房都好大，有一間仲要係獨立沖涼間連廁所，三間入面呢間沖涼真係最舒服。 但要留意佢有2層，我今次就住地下個層，但如果住樓上就小心行李重啦，佢係只有樓梯，仲要望落好似都幾長下。 行過真係以為係人地間屋... credit: agoda.com 換錢 由於今次由買機票到出發雖然有個半月時間，但等我考完試，又趕住返工賺旅費，加上拖延症勁嚴重，最後所有野都趕哂係最後一日先做好，包括換錢。 今次去左最出名個間百年換錢(http://bcel1985.blogspot.hk)，因為要即日交易又要匯率唔好太差(雖然自己拖到澳元升左好多先去換...)，點諗都係得百年。好彩佢個預訂電話聽得好快，又有大把貨等人換，如果唔係我應該就要身無分文咁出發... 大家要去百年最好真係預訂左先，因為真係會快勁多，唔使樓下排完去到樓上又排。但佢有規定要換HKD5000先有得預訂，大家留意啦~ 行程 黎到呢Part要再帶返頭盔先，我旅行Style就係"chur"同"慳": Chur: 早出晚歸，行程緊密，最中意搭通宵交通工具遠行，行程無逢連接 慳: 慳完機票住宿，旅行時最主要係慳交通，可以免費就免費，可以行路就唔會俾錢搭車。仲有慳食，唔係話唔食好野，係唔會去食高級野/High tea之類。最後係慳買，我好中意買野，但都係揀有折/outlet，名牌野我就唔會行啦。詳細就留返後面再講啦! 預約活動 去到澳洲冇理由日日留係City玩，所以我都安排左好多其他野，其中有部份可以係訂定先，唔使擔心去到唔識Book啦! 1. Skydiving @ Sydney 玩skydiving又要令又要平就梗係揀澳洲啦!!! 今次就揀左Skydive Australia (http://www.skydive.com.au) 根據唔同地區、日子同高度 價錢可以好唔同架!! credit: skydive.com.au 連相同片嘅package都有幾款 今次選擇左係Sydney嘅Wollongong跳skydiving: Midweek 14,000ft (已經係最高高度) + Gold video & photo package + free pick-up and return service from Sydney CBD = AUS402.95 (include tax) 大概HKD2300就跳到skydiving仲要有哂全部service其實真係好抵架啦!而且Skydive Australia嘅Staff同Coach全部都好好人，大家不防去呢間試下! P.S. Skydive Australia差唔多係全個澳洲都有Skydive點，每個地區係每星期Midweek其中一日都會特別平架! 2. Philip Island @ Melbourne 睇呢班全世界最細嘅Penguin係我其中一個最期待嘅行程! 要去呢到除非自駕遊，如果唔係都要參加tour架啦~ 要揀tour最簡單就分外國tour vs 中國tour 外國tour當然就係澳洲當地旅行社搞嘅local tour~全程英文而且參加者都係外國人較多，質素都比較有保證。但價錢就相對較貴啦~Philip Island呢個行程就通常要AUS 130左右 中國tour就會係China town嘅旅行社搞(最出名就長城 宏城 長青等)~全程普通話而參加者都係中國人居多，質素就比較參差但價錢就應該係最平架啦，大概AUS 70左右 今次我本身係兩樣都冇揀 揀左台灣tour --> kkday (https://www.kkday.com/zh-tw/home/index2) 連埋中途其他景點同入場費，總共係HKD500左右。 但都唔知我唔好彩定點，我揀個日唔夠人開唔成團，但我又冇時間轉日子，所以kkday就幫我轉左去一個大團...結果原來係長城搞嘅團... 好彩今次位導遊其實都幾好，解釋又清晰，團友大部分都好合作，所以都可以接受。今次join唔到kkday自己搞嘅團，所以評論唔到，不過想參加嘅朋友要留意有可能會俾佢安排去中國團，介意嘅朋友除非日子夠flexible可以轉其他日子，如果唔係可以搵其他團啦~ 跟住落黎就正式開始旅程啦!!!
