每間公司嘅生態環境各異，而除咗老闆，同事好唔好係非常影響份工嘅性價比。雖然話玩唔玩得埋係人夾人嘅，但基於工作需要，唔係吓吓都可以同同事Friend過打Band。最少，以下呢幾類應該唔得： 忠忠直直型 其實佢係好人嚟嘅……但就硬係唔係好識做人。例如佢見你Sick Leave完第二日返工，會大大聲問你：「做乜連射兩日波呀去咗邊玩？」直到你狠啤佢一下先發現自己好似講錯嘢呀可唔好意思。Project出咗事，老闆問起佢會照直講「係呀個邊話起唔切貨」，而正常人嘅反應都係嘗試死返掂佢先，直至紙真係包唔住火。咁你話以後有嘢都唔知講唔講俾佢聽好呢…… 口密型 行蹤詭秘，唔到出Trip嗰日都唔知佢要走，平時又唔知佢究竟負責D咩。明明佢個位係近水樓台，理論上收風應該最快最準，但問親佢咩都一副神神秘秘樣咁，聽親同事講起公司D咩傳聞就陰陰咀笑但咩都唔爆，總之就密實過黃加藍變綠啦…… 阻住地球轉型 有種人，你係唔明佢點入到嚟呢間、或者任何一間公司嘅。基本上，人人都識嘅嘢佢唔識 —— 打中文用手寫板、唔識用Word轉PDF 、用計數機計完先入D數落Excel表……；但佢識嘅嘢你全部都識喎，咁點解唔出埋佢份糧比你呢？反正次次老闆叫你哋跟D咩，佢劈頭第一句實係：「呢D嘢我無跟開。」喂呢條根本係哲學題，你樣樣都唔跟咁當然永遠都無嘢跟開啦……睇住佢日日準時放工，你就每日到放工時間個刻開始做埋佢嗰份…… 為求自保型 呢種人嘅目標好明確：有D咩都唔好搞到佢。例如每日五點後你都是搵佢唔到的：「我有嘢搞緊，或者聽朝先傾？」；Email遲過三點Send俾佢都唔會即日處理，因為佢知道開咗個頭就唔洗旨意有得準時走。呢個道理其實我都明喎，咁但係老闆就係即刻要丫嘛，於是只好死死地返埋位不求人自己搞掂…… 塞錢入你袋型 話佢塞錢入你袋，唔係真係佢咁叻教識你D咩，而係佢永遠都用一副「我塞錢入你袋咋細路」嘅姿態點你做嘢。睇返公司架構圖，明明你唔係隸屬佢架，因乜解究佢成日擺起個阿頭款點你做呢樣嗰樣架呢？每次老闆發完脾氣，佢就會發表偉論：「一早就話唔應該咁安排架啦！」乜乜乜，但佢次次一早講嗰陣點解都咁啱無人聽到嘅吓…… 小學雞型 總唔會全部同事都同一職級、能力同樣高，做嘢有少少磨擦或者蝕底係在所難免，呢D人工包埋嘅，行出公司門口咪抹咗佢算囉。偏偏好多人都會頂住道氣，例如以後唔肯同佢同枱食Lunch，搞到每日約食飯要夾晒口供前後腳，有你無我，請食下午茶硬係數少一件蛋撻…… 其實都喺得同一間公司甚至同一條team合作，就唔好計較咁多。如果大家都齊心，每日以交到貨、一齊準時放工為目標，就唔洗吓吓由Monday Blue到Friday，同事都可以變老死啦。 ************************************ 網絡作家 B612 – Facebook專頁： b612lpp（鍾意睇嘅去俾個like，支持吓我繼續寫嘢吖！:)） 「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」
