多年前一日係工作期間，突然俾人捉咗去做makeup model教化妝，一班十幾人，個化妝老師當住咁多人面前話揀我係因為我單眼皮，仲大細眼，係練習的好材料（咳～唔駛咁老實呀？！）小器係女生既特質，我會記係心架，於是我之後一直努力改變自己既容貌！ 我唔反對人整容，但係我自問一直都提唔起呢個勇氣，所以一直都係靠化妝來解決雙眼既缺憾。化咗妝，雙眼望落係對稱咗，又大咗，但係影相時，某ｄ角度又令我雙眼既缺憾現形！ 唔敢割雙眼皮，又渴望有雙眼皮，最折衷既方法莫過於用雙眼皮膠水或膠紙啦！今次就等我比拼一下雙眼皮膠水同膠紙既功效啦！ 第一個要比拼既係羽翹係youtube介紹過既雙面雙眼皮膠紙 – Wonder Eyelip Tape (Extra)，包裝入面有ｄ咩、點用，我唔多講啦，大家睇youtube 介紹仲好過啦！ 優點： 1. 頭尾尖頭設計，而且貼紙好幼身，唔易穿崩 2. 無論有無化妝，雙眼皮效果都好明顯，化咗妝更加唔覺係做咗手腳 缺點： 1. 貼唔岩位既話，要搣咗佢重新再來過，比較麻煩 2. 一合埋眼就會見到有摺線穿崩 3. 搣咗之後，雙眼打回原形！ 跟住就睇吓另一隻雙面雙眼皮膠紙 – 牌子名係日文，唔識睇，但註明係Made in Japan！ 優點： 1. 膠紙好挺身，令雙眼皮效果好突出 2. 貼咗佢一日，搣咗之後會發現雙眼皮真係出現咗，都可以維持幾個鐘，長期日日用佢，話唔定有日真係會變雙眼皮，夢想成真！ 缺點： 1. 貼唔岩位既話，要搣咗佢重新再來過，比較麻煩 2. 一合埋眼就會見到有摺線穿崩 3. 頭尾係圓既，貼上去頭尾好易凸出穿崩 4. 比較厚身，眼影粉會卡住係雙眼皮位置，有ｄ礙眼 最後又睇吓雙眼皮膠水既效果，我用既係Koji Eye Talk，呢個牌子好出名，見係網絡度好多sis都係用佢~ 優點： 1. 對眼既大細對稱返 2. 查錯咗位置都好易可以更正返，唔駛洗走佢再來過 3. 無論有無化妝，雙眼皮效果都好明顯 4. 就算合埋眼，雙眼皮膠水位置都唔係好覺，效果好自然 5. 化完妝發覺雙眼皮效果唔夠理想既話，可以再補雙眼皮膠水而唔會影響已完成既眼妝 6. 用卸妝用品就可以輕易卸除 7. 亦可以來＂痴＂假眼睫毛，一物兩用！ 8. 查咗佢一日，清洗之後唔單止發現雙眼皮真係出現咗，仲可以維持到成日，變雙眼皮既夢想似乎又邁進咗一大步！ 缺點： 1. 要等一隻眼既膠水乾後先可以查另一隻眼，而且要等膠水完全乾透先可以上妝，比較費時 2. 查膠水時唔小心的話會＂痴＂到眼睫毛 總括： 我選擇唔用單面雙眼皮膠紙因為真係太覺眼啦，一直用開雙面雙眼皮膠紙，最近先開始試吓用膠水，發覺效果真係唔錯，只係比較費時，希望以上意見，可以俾各位單眼皮sis參考啦！ Wonder Eyelip Tape (Extra) $68/120pcs Colormix 有售 日文牌子名Eyelip Tape $28/102 pcs 莎莎有售 Koji Eye Talk $62 莎莎有售
