今日,我地繼續遊湖一圈。向280公里外伊塞克湖南岸嘅Tamga Village進發。途中會經過Cholpon-Ata 同Karakol 兩個城市停留參觀。 出發前,先響homestay食早餐。 中亞地道早餐。下方最大碗嘅,係類似米糊嘅物體,上而一塊塊嘅係煎餅,點牛油食嘅。左上角果碗,就係之前提過必食嘅吉爾吉斯home made酸奶喇。真係好好食,奈何要坐長途車,唔係驚住清腸胃嘅話,我一定會KO佢。最右手邊果碗如果冇記錯應該係牛奶黎,都好好飲架。Alexandra大叔話,酸奶係要加糖食喎,我試左少少,真係好好食。 食飽飽,我地送埋Thankyou card俾屋主就離開homestay了。屋主又以為我地係日本人喇。佢問: “Are you Japanese?”…...講完再見之後,我地就出發去今日第一站,Cholpon-Ata~ 第一站: Cholpon-Ata – 探訪古岩石畫露天博物館 大概半個鐘車程,我地就到左Cholpon-Ata。距離Tamchy只35公里。 蘇聯時期,呢度嘅療養院係蘇聯共產黨模範人物嘅度假勝地,唔係人人黎得架~至今仍然營運。 我地今日嘅target,就係呢度嘅Open-air Art Gallery of Stone。 Gallery招牌 Gallery大門 呢片曠野上散佈住好多舊巨石。唔好睇少佢地,佢地都係響冰河時期冰川流動活動之下響山上帶到落黎的。大部份岩石都刻有圖案。有部份岩石畫源自銅器時代晚期,但大多數都係屬於Saka-usun (烏孫) 時期的,可以話係烏孫人嘅遺物。 薩卡祭司響呢度獻祭同舉行祭拜太陽神嘅儀式。佢地當年居住嘅社區毫響現今Cholpon-Ata海灣之下。 再後期嘅岩石畫,係出自突厥時期的。 響呢度嘅岩石畫,唔理係咩時代出品嘅,佢地嘅主題都係野生動物: 山羊嘅長角,狼,鹿,獵人,馬等等。仲有圍成圓圈嘅石堆,係祭壇嘅痕跡。仲有就係,所有岩石畫都係面向南方(向住伊塞克湖一邊) 點擊圖片放大 岩石畫(呢三幅都係比較清晰嘅) 響呢度,亦都可以見到類似布蘭那塔果邊見過嘅石雕。Alexandra 大叔話,左邊係女,右邊嘅係男喎~ 冰川大石幾拍 舊舊石都咁大舊,可想而知冰川嘅冰流威力有幾勁。呢度好多石頭都係滿怖地衣同青苔的,呢d都足以證明當地空氣質素有幾好~ 個人十分喜歡呢張相。呢d原始壯麗景色係我最想見到嘅吉爾吉斯。亦係吸引我黎呢度嘅動力之一。其實最最最想見嘅,應該係要去行山或者去一次位於比什凱克附近嘅阿拉阿查冰河國家公園先會見到喇。希望有機會可以再去一次睇下。 睇珍貴岩石畫之外,呢度亦係攝影好地方~ 點擊圖片放大 呢幾張伊塞克湖嘅相亦係自己比較喜歡的。呢度真係好靚呀。好可惜同伊塞克湖只有3日嘅相處時間,實在係太短喇~ 其實Alexandra大叔都係愛攝影之人,佢見我地2個咩都影得一餐,之後就連佢自己都拎埋自己d架生出黎同我地一齊影,哈哈。 睇完岩石畫,我地就向第二站Karakol進發,一路上,仍然係超吸引嘅風景。 伊塞克湖北岸一邊嘅山脈就係天山支脈Kunkey Alatau Range了。呢一帶嘅山後其實就係哈薩克了。Alexandra大叔話,原本吉爾吉斯同哈薩克係想劈開個山整條公路穿過山脈連起嘅兩國的。不過最後因為一d原因,計劃就擱置左。一切都係利益作怪吧。如果呢條公路真係通左,真係可以縮短車程,慳好多時間的。對兩國人民,旅客都係好事。點解要擱置呢? 第二站: Karakol 人口66,000係伊塞克湖州行政中心, “Karakol” 意指「黑色手腕」,大概係指移民至此嘅俄國農民響山谷土地上工作整污糟手嘅情境。 周圍有好多蘋果園,好出名下架。呢度亦係前往湖畔地區,Terskey Alatau同天山中部嘅最好根據地。 Karakol建於1869年7月1日,早期嘅人口以軍官,商人,專業人仕同探驗家為主。蘇聯時期,呢度被稱為 “Przewalski”, 係以探險家Nikolai Przewalski 命名的。呢度係佢生前探險最後一站,死後亦安葬響附近湖岸。 1. Oriental Bazzar (動物市場) 吉國人傳統買賣動物場所,響中亞好出名架,。吉國人鍾意將買返黎嘅牲畜放入Larda車內,甚至車尾箱,都幾殘忍下。 不過我地黎到果陣已經差唔多中午,錯過左最peak嘅時候喇。我地見到嘅只係零星商販響度賣梗貨尾。 呢度其實遍地 “黃金”,仲好 “香”添呀~ 牛隻賣買中~ 除左牛外,仲有羊賣的。問過價,一隻羊只係要75美金only~ 傳統遊牧民族,點會冇馬賣? 2. Chinese Mosque 由一名中國建築師同20名中國工匠用3年時間建成。完全冇用過一粒釘。1910年為當地回族社區清真寺,但睇上去似一座蒙古人嘅佛教寺廟。1933-34年間,清真寺被布爾什維克關閉,後來再從新開放。 點擊圖片放大 3. Holy Trinity Cathedral 響Karakol,市民最早係響帳篷裡面做禮拜的。後來起左一座花崗岩教堂(而家仲可以見到花崗岩地基的)。但花崗岩教堂響1890年一場大地震中倒塌。 1895年,現有嘅木教堂建成。20世紀30年代被布爾什維克拆左5個圓頂,將教堂變成俱樂部。1961年對教堂進行修復,之後1991同1997年分別再進行2次正式修復,之後再次開放俾公眾做禮拜。 教堂外觀~ 包頭參觀中嘅我。完全唔明點解參觀教堂要咁做,不過人地要求就尊重下啦~ 去完呢幾個景點,大叔帶左我地去掃紀念品,其實我地響布蘭那塔果陣已經想掃,但係大叔響Karakol買會平d,而且有相熟嘅店舖,可以平d,我地去到果間shop,選擇的確係比布蘭那塔多,而且價錢尚可,買完之後,我地就去食lunch了。 是日午餐: 呢款係響中亞最typical 嘅沙律,響中亞,真係冇咩蔬菜選擇。基本上我地日日都係食呢款菜咁制~ 茶+雞絲湯麵。 4. Bazza 唔好覺得「又係巴札」。中亞巴札真係個個都有自己特色,個個唔同style的。今日嘅巴札,我有一下係閃過「會唔會就咁就中SARS同禽禽感」嘅想法。 巴札賣禽鳥嘅區域,雞鴨鵝統統混埋一齊養同賣,你話我果一下點會冇中禽禽感嘅擔心? 雞同兔又放埋一齊賣,係唔唔係會驚中SARS先? 不過呢箱鴨好得意 除左以上奇景,呢個bazzar仲有一個室內區域係賣生肉同內臟的。響出面望入去已然覺得好嘔心,而且仲有好多烏蠅響度飛,好恐怖。大叔仲問我地要唔要入去睇,梗係say no啦。 中亞嘅烏蠅 講到烏蠅,其實中亞我地到過嘅地區普遍黎講都幾多。每逄食飯,食食下野偶爾都要趕下烏蠅。不過為數唔算多,尚可接受。到呢區旅遊,要有呢方面嘅心理準備呢。 呢個巴札,賣嘅野俾我地之前去嘅幾個多種類。就我地所見,食品,植物,五金產品,校服,普通衣物,VCD……真係咩都有。 行完一round之後,我地都要繼續向湖嘅南岸進發。Karakol呢度剛好係我地行程嘅最東點,之後我地就會各南方一路各西遊埋南岸返回Bishkek。而家我地就向我地今日嘅目的地Tamga Village出發。 On the way to Tamga~ 深秋中嘅伊塞克湖~ 與天山主脈最接近嘅一刻~ 過左一陣,我地就到左湖嘅南岸。伊塞克湖嘅地理環境係咁嘅,北岸(即係尋日同今朝去過嘅Tamchy同Cholpon-Ata一帶,湖邊係沙灘,而過左Karakol之後,一路開始靠近Treskey Alatau Range果陣,湖邊就變左係一大片石灘。而響南岸,亦係同天山主脈最接近的。Central Tien Shan Range就響湖嘅南方。越過南邊嘅高山,就可以返返中國境內喇。 順帶一提,到中亞可以考慮帶定回鄉證旁身的。中亞呢個充滿高度不碓定性太高嘅區域,有回鄉證旁身,絕對可以以備不時之需。如果要陸路返入中國嘅話,響哈薩克其中一個可以過霍爾果斯口岸,響吉爾吉斯呢, 其中一個可以過嘅係吐爾尕特口岸(Tourgart Pass)。不過要注意,呢d口岸大都係響海拔3000米以上嘅高山的,如果真係考慮響呢d口岸過境,要考慮交通安排,旅遊季節是否適合(冬天時可能會因為大雪封關),亦要留意兩地時差會影響口岸辦公時間,亦要留意假期安排。 去Tamga途中, Alexandra 大叔放左我地落車去湖邊玩左陣,俾我地響伊塞克湖南岸同天山來個近距離接觸。Photo time又來了~~ 另一張我最喜愛嘅相片之一。伊塞克湖湖水十分清澈,尤其是南岸果邊,真係清楚見底的。根據資料,湖水可見度達20米,透明度達12米。 免費紀念品:湖邊之石仔~ 清到冇朋友嘅湖水。 伊塞克湖與天山山脈。 響呢個石灘,Alexandra大叔終於忍唔住要去游水喇,我地都非常歡迎,可以有時間影多d相同睇下野。影到咁上下,大叔都返左上水,我地要繼續去Tamga嘅路了。 到Tamga前,經過金礦所在地-Barskoon Village Barskoon Village響蘇聯時期係個軍隊補給站,以前有一個軍隊療養院,至今仍然開放。 村內嘅居民,全都係吉爾吉斯人,Tamga則以俄國人為主。 11世紀一位語言學家Mahmud al-Kashgari 係呢條村嘅傑出居民。1072-74年,佢響巴格達寫左第一部突厥語比較詞典(Divan Lughai at-Turk) 響呢度,仲有個Barskoon瀑布。沿住從療養院開始一路到瀑布嘅公路,再上去就係Kumtor金礦喇。 Kumtor金礦由加拿大金礦公司Centerra Gold經營。全世界第八大金礦區。呢個區域唔接待旅客,需要特別申請先入得去。金礦位於海拔4200米,呢個金礦產值佔左吉爾吉斯整個國家GDP約 12%。 呢個金礦,吉國人對佢又愛又恨。愛嘅,係因為佢撐起該國經濟增長達標令到吉爾吉斯可以加入WTO, 而且長期為吉國經濟帶來支持。被視為吉爾吉斯極其重要的資產。 恨嘅係,國民覺得吉國政府批金礦開採權俾加拿大金礦公司果陣條款冇好好保障國家利益,差唔多送晒所有利益俾果間加拿大公司,仲俾佢地帶走所有收益返自己國家。就係因為咁,吉國國民覺得政府保護國家重要資產不力,於是響2013年5月底呢區發生左一次警民衝突, 示威者仲兩度中斷左金礦的供電,吉爾吉斯總統要簽署命令響果區實行緊急狀態同宵禁。示威者要求政府將金礦國有化，並改善社會保障。 Tamga Village – 給我地一個十分悠閒嘅下晝同畢生永記嘅最美星空~ 大概下晝3點幾,我地就到達Tamga Village。呢條村響Barskoon Village附近,距離Karakol 75公里,位於海拔1648米。 1928年,呢度被選為興建軍用療養院嘅地點。戰時受傷嘅士兵都會被送黎呢度進行治療。 蘇聯時期,有好多太空人完成飛行任務之後都會黎呢度渡假。 我地嘅車沿住全村唯一主要道路上山,直駛我地今晚要住嘅guest house。我地住嘅guest house係由一對俄羅斯夫婦經營的。 夫婦都懂英語,可以溝通, 係Alexandra 大叔嘅好朋友。大叔去到真係好似當係自己屋企咁,不停搵人d蘋果黎摘。其實佢一路上已經好想買蘋果黎食,不過佢睇極都唔岩。水果嘅選擇響中亞唔多,通常都係蘋果,西瓜,呢度買水果,係斷公斤計的,要買嘅話, 人少都幾高難度。 呢間guest house有隻大狼狗。我地落車佢就好熱情咁歡迎我地,仲搵個鼻頂住我,叫我向前行,真係俾佢嚇一嚇,老闆見狀,即刻綁住佢,打擾左佢嘅自由,我都覺得有D唔好意思。 Settle 好之後,老闆請我地飲茶同食餅。之後我地約好左幾點食飯,我地就準備出去周圍睇下。 Guest house 幾拍 門外 用餐嘅地方 用餐地方一拍。加上下午悠和陽光,感覺好舒服~ 出動好好享受一個與天山與伊塞克湖為伴嘅悠閒下午~ 出發喇~先到guest house所在果條街由頭行到尾參觀下先。 路邊碰到的蒲公英~好大個好完整呀~ 路上有一D好cutie 嘅牆畫,但望入去裡面好似荒廢左好耐,好荒涼。唔知之前呢度係咪學校之類嘅建築呢? 由guest house 所在嘅街嘅街尾影返上街頭。 由銜頭行到街尾之後,我地就出返去伊塞克湖再影下相。 睇黎唔止路牌一個咁簡單,上面果埋字究竟講咩? 仲有上面D窿係咪子彈窿? 呢條就係Tamchy嘅主要道路。沿住佢一路行返出去就到伊塞克湖了。 再行前差唔多出返去村口果度,有架俄式戰機響度伴梗天山。唔知做咩無啦啦有架飛機響度。係咪因為以前呢度係軍用療養院嘅關係? 見完戰機之後再行前D,就可以見到伊塞克湖喇。LP裡面都有提過呢度嘅沙灘,不過我地冇落去睇,只係響上面望落去。 Issyk-Kul Lake + 天山 = 向往已久嘅景致。 呢度實在太靚喇,企響呢度,你只會有兩件事想做。第一, 只係識不停舉機影相,第二,就係只想盡情欣賞景色,計都唔想傾住,其他咩都唔知了~ 仲有響湖邊放空亦係唔錯嘅活動,老實講呢兩日企響湖邊嘅時間可以話係我人生暫時最享受嘅時刻之一。 美景繼續謀殺記憶卡memory~~ 響湖邊行返入少少,就係呢片草原,影相出黎效果亦係一絕。其實個人覺得南岸呢邊嘅風景比北岸更靚。南岸人流亦比北岸少。只係偶爾見到主要道路有1,2架車行過。 繼續天山 就係咁不停影,雖然我地去得唔遠,但都已經用左好多時間。見開始日落,我地都返歸了。 途上日落一拍~ 返到guest house,未夠鐘食飯,於是就同響Karakol買嘅紀念品影大合照。 影完相,就開飯喇。今晚住嘅guest house,仲有一個6-7人嘅旅行團。不過冇交流。 今晚食乜? 湯,好似係有蕃茄同薯仔,味道唔錯架~ Main Dish係雞肉通粉,亦都係好好食。 西域傳統餐桌上必有嘅東東:糖果+餅乾 中亞傳統係好客,所以餐桌上必須要經常放有茶,糖果同餅乾黎準備隨時招呼客人的。如果冇嘅話,就係冇禮貌嘅表現了。 畢生永記嘅西域星空~ 食飽飽之後,我地就入返房執下野,休息下,去埋沖涼。大約9點幾10點,我地就出去花園嘗試影星星喇。 之前響Tamchy因為太光而錯過左一次機會,所以今次都只係抱住試下出去睇下影唔影到嘅心態。 出去一望上天,嘩,簡直係滿天星斗,今次真係冇死喇,.一定影到。之後我地就set好腳架,仲拉埋凳坐低,響度慢慢捕。老闆見我地2個咁夜仲出黎,見我地set晒野,佢仲叫我地去蘋果園果邊影,但我地set好野都唔想郁喇,所以都係留響原地就算。 我地不停trial and error, 有理冇理影左返黎先算。 Version 1,效果ok啦~ Version 2, 最壯觀嘅一個版本。 由於Tamga比Tamchy更原始,所以見星星幾會比較多。其實我地今晚仲見埋流星的,不過只係記得好興奮咁嗌,唔記得左許願。影相中途,老闆隻大狼狗俾人放左出黎周圍行,佢見有2個人響度就不停走埋黎睇下我地做咩,但我地唔得閒理佢,攪多陣佢都唔理我地自己走左去瞓覺喇。 今晚呢片天山腳下嘅星空,一世都會記得,實在太靚喇!!!! 真心的,我真係好享受呢短短幾日同伊塞克湖與天山為伴嘅日子。久違了嘅原始人生活返黎喇。呢度冇wifi,冇電視,冇電腦,生活超級正常,空氣好好,貼近大自然,天氣涼快乾爽,一切一切加起黎,整體環境好舒服,我向往呢度嘅寧靜。希望有機會可以再黎一次,我會好好記住呢度嘅一切。 影完相,我地就執野入房,執好埋行李就休息喇。聽朝就要離開呢個天堂返返去Bishkek,下晝就返烏茲別克了。真係開始有D唔捨得呢度喇。
