今日嘅行程,可以話係到左烏茲別克一圈遊嘅戲肉- 撒馬爾罕一日遊。 撒馬爾罕(Samarkand), 伊斯蘭學術中心,現為烏茲別克舊都兼第二大城市、撒馬爾罕州的首府,突厥語為富庶之地,Samar意為「肥沃」,qand意為「土地」,撒馬爾罕意為「肥沃的土地」。 坐落在海拔710公尺的澤拉夫尚河谷地,絲路西段(北路)必經之地。 漢代曾稱此地為「康居」,唐代稱「颯秣建國」。<<大唐西域記>> 係咁記載的: 「颯秣建國。周千六七百里。東西長南北狹。國大都城週二十餘里。極險固多居人。異方寶貨多聚此國。土地沃壤稼穡備植。林樹蓊鬱花果滋茂。多出善馬。機巧之技特工諸國。氣序和暢風俗猛烈。凡諸胡國此為其中。進止威儀近遠取則。其王豪勇鄰國承命。兵馬強盛多諸赭羯。赭羯之人其性勇烈。視死如歸戰無前敵。」 十四世紀時為帖木兒帝國國都,阿歷山大大帝東征時曾經以為嘅「世界盡頭」。 光係睇左呢幾句,就應該可以粗略感受到呢個地方係幾咁「有過去」。其實,中亞呢片土地有住十分豐富嘅歷史,文化底蘊豐富,好多新奇好玩嘅地方等住大家去發掘。呢個都係點解我咁堅持要到呢度遊一次嘅原因。準備去果邊旅遊前,奉勸大家要補好歷史同地理知識先好去,否則對住一大堆歷史遺跡可能會唔明白箇中嘅巧妙之處,未必會玩得投入。 撒馬爾罕 2001年被聯合國教科文組織列為世界文化遺產嘅城區面積約有965公頃, 為Crossroads of Cultures(文化交匯之地)(亞洲和大洋洲世界遺產)。 我地今日就主要響呢區活動。 遊撒馬爾罕,一定要認識嘅一位大人物 - 帖木兒 遊撒馬爾罕, 首先要認識一下帖木兒呢位仁兄。 帖木兒 (Amir Temur – 1336-1405), 出生於西察合台汗國一個信奉伊斯蘭教的突厥貴族家庭,是成吉思汗七世女系駙馬。(冇錯,佢只係成吉思汗嘅女婿,絕唔係佢後代。呢個謬誤由今日開始要改喇~) 1362年,響故鄉Shakhrisabz附近被打成瘸子。1369年, 殺死左具備兄弟情誼嘅西察合台汗忽辛,宣稱自己是成吉思汗的繼承人,建立了帖木兒帝國。 佢在位期間, 先係掠奪左阿富汗,波斯,伊拉克,印度等地, 後更征服土耳其,愛琴海一帶。 佢響烏茲別克人心中係個不折不扣嘅英雄, 而成吉思汗呢,響佢地心目中就係破壞佢地土地嘅壞人。唔同地方嘅city guide都會話帖木兒係hero, 成吉思汗destory our places. 已經從唔同當地人口中聽同一番話好多次了。 蘇聯時期史太林一度唔俾烏茲人追思帖木兒,仲將佢渲染成野蠻人同暴君, 但自蘇聯解體烏茲獨立之後, 政府就將佢作為凝聚民族自尊心嘅偶像。(同吉爾吉斯嘅民族英雄馬納斯(Manas)差唔多function) 帖木兒畫像 帖木兒帝國版圖 一日遊開始喇~ 響撒馬爾罕,絕大部份古跡都係同帖木兒有關的。今日,帶我地去參觀嘅city guide哥哥個樣好法國feel的。Meet 好之後佢就帶開始行程。 1. Gur-Emir Mausoleum 呢個景點,不解釋,入去行下絕對係指定動作。始建於1403年,原本帖木兒係想自己百年歸老之後響自己出生地Shakhrisabz長眠的,點知自己準備攻打當時由明成祖統治嘅中國果陣中途死於「訛答剌」(即今哈薩克境內的Otrar), (如果當時佢冇死,可以去打中國嘅話,世界今日又會係咩格局?)當時正值嚴冬,根本冇可能 “又越過高山又越過谷” 咁樣將佢運返去Shakhrisabz安葬, 最後只好長眠撒馬爾罕了。呢度除左帖木兒之外,仲葬左佢嘅兒子,孫子兀魯伯,同埋佢嘅一位恩師。陵墓起得十分宏偉,碧藍瓷磚鑲得極為工整。陵上的房廳可參觀,仲有圖片同文獻介紹帖木兒王朝歷史,陵內的地宮亦可沿甬道落去參觀。 內裡果真有氣勢 陵墓外觀 這裡有……隱藏的「魔咒」?! 呢個「魔咒」,係同帖木兒嘅棺槨有關的。佢嘅棺槨係由一個墨綠色軟玉所造嘅裝飾墳標示(穆斯林嘅傳統係地面裝飾墳標示墳墓所在位置,正陵就響地下室。) 中國人嘅傳統最忌祖先山墳俾人攪, 亦都唔會隨意攪人地山墳,有d有權勢嘅人仲整埋咒語/機關佢保護自己個墓。 而生活響西域嘅帖木兒響呢一方面亦同我地中國傳統好接近,佢都唔例外, 整左個神奇「魔咒」黎招呼騷擾佢長眠嘅人。「中招」嘅朋友來自世界各地。 City guide哥哥介紹話,當中嘅表表者,就一定要數前蘇聯嘅偉大領袖- 史太林。話說1941年, 史領袖突然好有雅興話要考古,於是就叫考古學家同人類學家去打開個棺槨睇下,話要睇下裡面果個係唔係真係佢, 之後仲有人玩過科學驗證,證明佢並唔係元人後代,又跟返佢頭骨畫返佢嘅畫像出黎。 打開之後,考古學家發現左裡面有幾行銘文寫住: 「驚擾吾長眠者,必遭逢敵寇,其可怖更甚於吾!」 結果,考古學家打開棺槨之後隔日,希特拉進軍蘇聯。 呢個世界,總有人係唔信邪嘅。另外有一個波斯軍閥將果舊墨綠色裝飾墳軟玉運左返去,結果舊玉斷開兩半,自此之後, 軍閥厄運不斷,阿仔仲病到得返半條人命。之後運返舊玉返去,阿仔就不藥而癒。 以上嘅係巧合,定真係有「魔咒」存在呢? 2. Registan Square (雷吉斯坦廣場) 坐落在城中心,撒馬爾罕老城標誌性建築,有六條大街通向四面八方。帖木兒時代,呢度係絲綢之路上嘅貿易中心。 a. Ulugbek Medressa (兀魯伯經學院) 位於廣場西邊,建於15世紀, 1420年兀魯伯曾經響度講學。佢係帖木兒嘅孫,一位伊斯蘭學者, 1409 年起成為帖木兒帝國統治者, 佢亦係一個天文學家同數學家。作風前衛開明,15世紀時仲俾女子入經學院聽講經。 經學院四圍遊 b. Sher Dor (Lion) Medressa (悉多書院) 位於廣場東邊,大門於1636年落成, 成座野前後用左17年興建,以獅子作裝飾,但睇上去似老虎。仲要係人面嘅添。(響烏茲別克當地銀紙都可見到呢個裝飾。) City guide 話到而家都唔知點解要畫隻咁嘅野出黎。 d. Tilla Kori Medressa 位於廣場中央,Tilla kori, 意思係頂部用黃金覆蓋,1660年完工, 內部黃金裝飾好有氣勢,完全顯示到撒馬爾罕當時有幾富庶。 3. Bibi-Khanym Mosque (比比哈姆清真寺) 建於1399年,曾是伊斯蘭世界最大嘅清真寺。(淨係大門高度就已經35米) 經歲月侵食,清真寺響1897年一場地震中倒塌,而家見到嘅建築,係後來原地再起的。清真寺以帖木兒其中一位妻子嘅名字命名。據講呢位女子係中國人,天姿國色嘅公主。 傳說當年比比哈姆為左俾驚喜帖木兒而下令起呢坐清真寺。負責建造嘅波斯建築師愛上了比比哈姆,故遲遲唔肯完工,除非比比哈姆肯錫佢一啖。比比哈姆為左要趕及帖木兒征戰完返黎之前完成工程,於是答應左建築師嘅請求。後來呢件事俾帖木兒知道左,最後果位波斯建築師嘅下場當然係要殺無赦。而比比哈姆,相傳佢響度呢度嘅拜喚塔跳左落黎。自此之後,帖木兒就下令所有婦女要帶面紗。 清真寺隨意拍~ 點擊圖片放大 +4 位於清真寺大門口嘅大理石古蘭經台。當地人話求子必定要響底爬過去,圍住圈行就心想事成咁話~ 再遊巴札 參選完清真寺,我地就要轉去,下一個景點參觀。去之前,又途經一個巴札,city guide順便帶我地入去遊下。巴札(Bazza),維吾爾語意為市集。去中亞(應該話係整個西域), 居民都會響呢度補充日常生活所需。每個巴札都有自己特色, 每一次行都會有唔同嘅新發現。 今日響呢度,我地有以下嘅新發現: 名牌紙袋??!!! 中亞人好喜愛嘅乾果~ 飲茶時必備!! 4. Shah-i-Zinda (夏伊辛達陵) “Shah-i-Zinda “ 意指 “Tomb of the living king”。響巴札果度行大概10分鐘就到。呢度係王族墓園,帖木兒一個妃子同先知穆罕默德一個侄仔都長眠於此。響當地人黎講,呢度係個神聖地方。 個人認為呢個係撒馬爾罕最靚嘅景點。陰宅起到好似民居,巷道兩旁嘅墳墓有門有廳,規格井然。所有墓室都用左非常靚嘅瓷磚裝飾,藍藍綠綠,再加埋陽光藍天,一個超靚嘅畫面。周圍環境好安靜。 陵園內幾拍~ 點擊圖片放大 +3 5. Olugbek’s Observatory (兀魯伯天文台) 由帖木兒個孫兀魯伯於1428至1429年修建,係20世紀世界上最強勁天文台之一。 人們認識兀魯伯,通常都只係記得佢精通天文學多過記得佢係一個君主。天文台起響山坡上面,裝了一座巨大的六分儀,用以觀測星位,旁邊有博物館介紹中亞地區在天文學上嘅種種成就。 呢個就係六分儀~而家仲用得架!! 兀魯伯就係咁嘅樣架喇~ 天文台山下嘅兀魯伯銅像~ 食午飯遇到當地”明星”??!! 參觀埋天文台,我地今日嘅official 行程就完左喇。同city guide哥哥道別後,司機哥哥就帶我地去食lunch。我地去左LP都有介紹嘅一間餐廳,其實前一晚已經想去,但係搵極都搵唔到。餐廳叫 “Platau”, 只係響我地住嘅酒店後兩條街。一入到去,成團日本人響度食梗飯,成間餐廳差唔多俾佢地霸晒,等左一陣,終於有人黎serve 我地喇。好唔容易,終於有野食。 餐廳一角~ 食物唔錯的~ 食到一半,有個自稱係半個artist嘅producer帶埋助手入黎食野,佢不停同我地答訕,問我地邊度黎,又問我地香港嘅野。連讀大學要幾錢都問埋,哈哈。仲派左卡片俾我地添。佢話佢地響Tashkent黎呢度開show,食完野,我地就返去抖下,撒馬爾罕下晝太熱喇,要響應下當地傳統瞓個晏覺。 出動去睇夜景去~ 抖左陣,我地又出動去四圍影四圍遊。因為約左司機哥哥帶我地出去食晚飯同影夜景,我地唔去得太遠, 響酒店附近睇下最後去左酒店附近一間士多買茶包做手信。 鳥茲別克民居~ 民居附近街道 路上巧遇東正教教堂~ 士多裡響度陪大人看舖嘅小朋友~ 入夜之後,司機哥哥再去酒店join我地,食飯前我地再去Registan Square一帶影夜景, 之後食飯。 Resistan Square夜景比預期遜,唔夠光啊~ Gur-Emir Mausoleum夜景。配合燈光,感覺有點陰森。 去完影相之後,就去開餐。今晚食飯嘅餐廳叫” Lyabi Gor Restaurant”, 響Registan Square對面馬路。 餐廳環境~ 是晚晚餐 (由左至右):羊肉蒸餃Manty,傳統沙律 同埋苦苦地有d似苦瓜嘅菜~ 司機哥哥同我地一齊坐埋吹水,原來佢岩岩新婚,仲俾左佢同太太婚禮前去學跳舞響婚禮時娛賓嘅片我地睇。原來鳥茲別克同我地一樣,主角響結婚當日係要娛樂大家架。 烏茲別克人嘅思想相對仲係比較傳統,覺得要早結婚同要有big family先係好,而女生,如果25歲都仲嫁唔出,響當地標準,佢已經係到左 ”The end of the world stage” (司機哥哥教架個term~)。呢餐飯,我地仲吹左好多水,司機哥哥都有講佢帶其他客去參觀嘅趣事俾我地知,仲話佢地嘅旅遊業仲係當地嘅infant industry,佢地好想做好d,令去佢地度玩嘅遊客滿意再返佢地度玩。比起香港而家乜都求其是旦嘅心態,真係好欣賞佢地仲咁有heart去做事。食完返之後,我地就返去休息,準備聽日返Tashkent了。