中亞之旅- Day 4: Bukhara - 尋找阿里巴巴 2~

行程黎到第四日,今日終於響古城裡面參觀喇。尋日host我地嘅city guide auntie因為阿仔要結婚,要去幫手做準備,所以叫左另一位city guide- “Mr.Good Day”黎帶我地周圍遊。(因為我地真係記唔住佢個名,佢就諗左呢個方法令我地記得佢……XDD) 佢話佢個名響烏茲別克語裡面係” Good Day”嘅意思,又幾得意喎。 今日嘅行程由東至西,由位於布哈拉古城中央嘅Lyabz-Hauz廣場開始。”Lyabz-Hauz”響塔吉克語裡面意思係「水池周圍」, 廣場中間係個水池,旁邊有幾棵己經老死嘅桑樹。呢個水池響以前嘅作用,係俾伊斯蘭教徒入清真寺做禮拜前沖乾淨自己用的。 廣場東邊有一尊 Hoja Nasruddin雕像,佢係烏茲別克一位被半神化的智者。 1. Nadir Divan-begi Madrasah經學院 響雕像再行過d,就係一座叫”Nadir Divan-begi Madrasah”嘅經學院。最初係一座大旅舍,俾到當地朝聖做禮拜嘅穆斯林同經絲綢之路經商路過嘅商旅竭腳用的。但當時有個可汗以為佢係一座經學院,於是1622年果陣將佢索性改做經學院。 2. “Nadir Divan-begi Khanake”經學院 響廣場西面, Nadir Divan-begi Madrasah”經學院嘅對面,係一座叫 ”Nadir Divan-begi Khanake”嘅經學院。早期為流浪嘅修行者提供住宿,內部幾乎冇裝飾,十分簡樸,而家做左賣紀念品嘅商店。 3. “Maghoi_Attori Mosque” 穿過大街,就到左第三個景點喇。呢座亦係一座清真寺,仲要係中亞地區現有最古老嘅。有住9世紀外表同16世紀重建後風格被混合左。其實佢一開頭係一座拜火教寺廟黎架。而家做左地毯博物館。呢個古蹟得以保存完整,避得過成吉思汗嘅破壞,都係當地前人嘅功勞,當時佢地將成座廟用沙堆埋,成功避過一劫。 行完呢度,Mr. Good Day帶左我地去一間類似賣地毯嘅shop入面坐低飲杯茶,佢好好奇我地來自邊度,我地話香港之後,佢即刻用I-phone google map搵 (冇錯,係I-phone,咪以為中亞好落後,其實不然), 佢話以佢認知, 香港係”Part of China”, 問我地點解香港要同大陸分開完再合返埋一齊,點解我地同大陸有咁大分別,好似咩都係自己攪掂咁,佢又問左好多中國嘅野,例如點解響大陸唔用得Google 同Facebook, 完全係文化交流囉。不過去旅行正正就係想咁樣啫。 呢舊野,大家會唔會以為佢係頂帽呢?其實,佢係當地人用黎笠住個茶壺保暖用架。響中亞,無論去到邊,只要你係客人,主人家都一定會請你飲杯茶的,可想而知茶具對佢地有幾重要。Break完之後,就繼續響古城裡面遊。 4. Ulugbek Madrasah 接住我地黎到”兀魯伯伊斯蘭學院”。貼住藍色瓷磚, 係帖木兒個孫Ulgubek響當時自己屬地興建嘅三座經學院之一。 5. Abdilazizkhan Madressa 呢座亦係一座經學院, 由Abdul 可汗下令興建,現為木雕博物館。Abudl Aziz將其頭像偷偷刻響祈禱室的神龕(Mihrab)上(神龕係一間清真寺內用黎指示聖城麥加方向的),挑戰遜尼派穆斯林禁止描畫活物的禁律。(Abdul Aziz Khan係個什葉派教徒)。我地到訪嘅時候,經學院外牆岩岩翻新左,超級sharp,好靚,全個布哈拉最like呢座建築。亦影得最多相。 6. Kalon Complex 接住就到遊布哈拉嘅重頭戲, Kalon 建築群。”Kalon”塔吉克語嘅意思係偉大咁解。 a. Kalon Minaret : Minaret,宣禮塔也。亦稱喚禮塔。響穆斯林世界有好重要嘅地位。清真寺常有之建築,用黎召喚信眾做禮拜。響先知穆罕默德去世段80年先開始出現。 呢座喚禮塔響1127年由黑汗王朝統治者亞爾斯蘭可汗(Arslan) 修建。高47米, 當時大概係中亞地區最高之建築。就連征西路過嘅成吉思汗都覺得adore,話說當年佢路經,大風將佢頂帽吹跌,佢彎身執帽後抬頭一望,覺得座塔好宏偉,於是下令唔可以毀壞。 b. Kalon Mosque :建於16世紀, 現有的清真寺係取代原有被成吉思汗完全摧毀左果座的。 Kalon Minaret 與Kalon Mosque正門 Kalon Mosque內部 c. Mir-i-Arab Madrasah.: 位於Kalon Mosque 對面,亮點係藍色穹頂,響陽光下sharp到飛起。呢庭經學院以16世紀一位來自也門嘅Naqshbandi 教長命名,呢位仁兄對當時的統治者Hbaidullah Khan影響極大, 佢地兩位最後亦長眠於此,都被葬響北面嘅圓頂之下。 7. Ark-Fortress 睇完Kalon Complex,我地就去到布哈拉最古老之建築,建於5世紀,1920年被蘇聯紅軍炮襲嘅皇家城中城Ark-Fortress。不過好可惜,古城當時修復中,冇得入去參觀,只可以響外圍影下相。 8. Bolo-Hauz Mosque 影完Ark-Fortress,我地就去位於佢對面嘅Bolo-Hauz Mosque度睇下。建於1718年, 係埃米爾正式敬拜神嘅場所。旁邊嘅水塔已經棄用,高33米,1927年由俄國人修建。 9. Ismail Samani Mausoleum 之後我地再轉到Samani公園,去睇下呢座陵墓。於公元905年完工,城內最古老嘅伊斯蘭建築。墓主係Ismail Samani(薩曼王朝之創造者) 以及佢嘅爸爸同孫子。話就話伊斯蘭建築,但風格好拜火教,至於點解要起到咁款,而家都仲係一個謎。 睇埋呢個景點,響布哈拉古城內我地已經由東邊走到西邊,我地嘅司機哥哥已經駛左架車過黎等梗我地接我地返去古城中心區去最後一個景點參觀。大概Mr.Good Day同司機哥哥係好兄弟,兩個really long time no see, 佢地一見到面果陣先黎個擁抱(呢個係當地男生碰面時嘅指定禮儀動作), 佢地仲要拍到「啪啪聲」,真係嘆為觀止。唔使五分鐘,車就返到古城市中心, 我地就行去今日最後一個景點參觀。 10. Char Minar 呢個景點,係要穿過小巷先搵到的,真係唔係當地人帶路都未必搵到。穿左幾分鐘就到喇。呢座塔有d印度feel, 一d唔似傳統布哈拉嘅建築。”Chor Minar”塔吉克語解作 “四座宣禮塔”, 建於1807年。聯合國教科文組織響1998年修復左其中一座倒塌左嘅塔,仲固定左另外一座。 就係咁,我地就參觀完所有布哈拉嘅目標景點。Mr. Good Day覺得我地好靜唔多野問,但其實真係冇咩想問啊~佢臨走仲猛咁問我地要唔要食中餐,果間餐廳叫 “Golden Dragon”, 仲不停推介一間叫 “Bella Italia”嘅餐廳。不過咁遠水路黎旅行,冇理由仲食中餐掛,所以我地堅決say no。玩左一輪,就真係正式同Mr.Good Day say good bye, 返去酒店抖下,準備再出去自由活動。 返酒店抖左一陣,我地又出動喇。主要都係響古城內遊下,再影下相咁。不過當地下晝真係太熱喇,我地先搵左間茶館去high-tea 下先。 我地去果間茶館響bazza附近,叫Skil Road Tea House (LP都有介紹), 一個套餐有一款茶,幾碟小食 (有冰糖,放入茶的,叫唔出名嘅糕,仲有加左100 som超好食嘅合桃蛋糕) 呢間茶館仲有冷氣開放,真係爽到震呀~~~~ Hea左都好一段時間,等太陽冇咁猛,就再出動去影相喇。尤其是十分colorful嘅 Abdilazizkhan Madrassa, 我地響果度玩左好耐,寶麗來都出動埋呢。 遊巴札,令我地感覺做左大明星一樣~ 遊巴札(Bazza), 係到訪中亞must do item 之一。響呢度,你可以籍此了解一下當地人嘅生活。而且每個地方嘅巴札都各有特色,每個都會令人有唔同嘅體驗。 而響布哈拉嘅巴札,為左通風,都有好多圓穹頂。 城內嘅巴札分為三部份: 1. Taqi-Sarvafon (以前係猶太人專做貨幣兌換嘅地方,係市內銀行) 2. Taqi- Telpak Furushan (以前主要制帽) 3. Tao-Zargarm (以前主要賣珠寶的) 而家賣野嘅地方,已經冇分類分得咁清楚, 主要都係賣紀念品,茶杯茶壺碗碟同生活用品。 外國遊客去巴札好好玩,中國人響中亞可以話係稀有動物 (連司機哥哥都話: Chinese tourists are rare here.) , 就係咁,我地第一日到左唔夠半日已經俾巴札大部份開檔嘅人點晒相,同埋不停俾佢地當我地係日本人同韓國人。不停用日文韓文同我地打招呼。 之後今日再跟住Mr.Good Day遊左成日,佢地好多人都知道我地係來自香港 (估計應該係Mr.Good Day通左水俾佢地喇), 不過佢地個個都好友善,再見到我地自己行過都同我地打招呼,叫我地隨便睇佢地嘅檔。有路人甲想知我地邊度黎,呢個時候一位看檔嘅嬸嬸已經代我地搶答: Hong Kong~哈哈,好攪笑。 到新城區一遊 行完巴札,都地都去埋新城區一遊。其實只不過響舊城區行5-10分鐘路就到。 舊城區到新城區路上 新城區的廣告牌。你冇睇錯,係S3,其實當地絕唔落後架~ 新城區之日落 我地就去搵地方食晚飯。原本想去一間LP點知搵唔到, 最後返左古城區一間樓上餐廳食飯。但感覺一般。 食完飯再出去行多round,又見到意大利人。之後就返去休息喇。 布哈拉獨有特產- Bird Scissors 我地冇執書,都買左一把,不過都幾貴,要成USD13。原本要USD20的,之後deal到呢個價。但係全人手制, 淨係人工都心機都值回票價了。

成功發佈