呢排胃口唔多好,朋友約出街食好野都唔太想去,老公每日煮飯都諗到頭爆,於是決定罷工一日,帶我出去食蒸氣鍋!我地揀左係尖沙咀的「有蒸氣」! 睇睇menu原來呢度唔係淨係食蒸氣鍋,仲有小菜食!不過我地個日就揀左食蒸氣鍋,老公仲叫我唔洗睇價錢任叫野食,我當然唔會客氣喇!蒸野方面我地叫左鑽石蜆、鮑魚、龍蝦、蟶子、丸類、膏蟹糯米飯、鮮雞同埋勝瓜!另外仲有叫到炸墨魚頭同埋咕嚕肉!係咪覺得我地得兩個人點可能食到咁多野呢?其實當晚都係有朋友同我地食生日飯,所以先叫到咁多野食! 依家係FB打咭仲有黑松露蒸蛋,以我師奶仔性格一定唔會放過! 炸墨魚頭 - 炸得好香脆,墨魚頭好彈牙!本身好鍾意食魚片頭,但估唔到墨魚頭仲更加彈牙好味! 蕎頭咕嚕肉 - 最怕食到d咕嚕肉成口粉又唔脆,有d舖頭就整到好酸,完全送唔到飯,但呢度的咕嚕肉就無呢個問題,如果唔係叫左咁多野食,真係好想叫碗飯食! 唔記得左呢個係咩湯,淨係知道好濃味同埋記得係對女性好好! 黑松露蒸蛋 - 用蒸氣蒸出黎的蛋真係好滑好滑,加埋我最愛的黑松露又幾夾! 蒸鑽石蜆 - 第一次食呢款蜆,開頭諗住咁大隻蒸出黎的蜆會韌,但原來就咁蒸都好食落去的質感又無想像中咁,而且唔需要點任何醬已經好鮮甜,好好味! 蒸鮑魚 - 蒸出黎的鮑魚又係唔需要點豉油都好鮮甜,呢度特別在唔係加陳皮,加蟲草花又係不同的味道! 蒜茸粉絲蒸龍蝦 - 重頭戲出場喇!龍蝦肉好彈牙,配合蒜茸粉絲都唔會搶走左龍蝦的鮮味!正! 由我肥嘟嘟的手話比大家聽有幾大隻! 丸類 - 黑松露蝦丸、鵝肝墨魚丸、手打豬肉丸同埋鯪魚肉丸,呢多樣裡面黑松露蝦丸仍然係我至愛,雖然黑松露味道唔算太濃,但蝦丸好爽口,加分! 金銀蒜蒸蟶子 - 我本身唔算好鍾意食蟶子,但呢度的蟶子令我有小小改觀,最主要係唔腥,又兩款蒜加埋好惹味! 膏蟹糯米飯 - 真係無諗過兩樣加埋會咁好味!平時糯米飯都係配臘味,今次我加埋蟹肉食又幾好味! 我老公最愛食蟹蓋,佢仲將蟹膏撈埋糯米飯一齊食! 鮮滑雞 - 蒸出黎的雞肉真係好滑,肉質好幼嫩,而且食得出唔會落太多調味料蓋過哂鮮雞的味道! 蒸勝瓜 - 其實我真係第一次食蒸氣鍋時食蒸勝瓜,但因為大家都想食小小蔬菜,所以叫左呢個!勝瓜上面仲有蝦乾! 南瓜豬骨粥 - 有食過蒸氣鍋都應該知道食到最底的粥先係精華所在,吸收哂海鮮的鮮味,啖粥真係好甜好甜,加埋南瓜食真係好好味! 飯後又點可以無甜品呢?老闆好好人地送左木瓜燉雪耳糖水比我地!飲完好滋潤! 「有蒸氣 海鮮石鍋專門店 」 地址:尖沙咀天文臺圍5-9號寶軒酒店1樓 「YING住食住行」已經開左係Facebook開左專頁喇! 歡迎大家入去比個like丫! www.facebook.com/yingyingstyle