之前已經係網上同埋電視睇過關於香港掃街熱點「太安樓」的資料,一直都好想去試,但奈何我呢個九龍人過海的機會真係少之又少,最近終於比我等到呢個機會喇! 第一站:艾蜜思手抓餅 好耐之前食過手抓餅,一直都好掛住,一見到呢度有即刻要食! 除左手抓餅,仲有台灣芋圓食! 好多配料揀! 手抓餅最少有20幾款口味選擇,又開始有選擇困難症喇! 最後我地揀左鹹牛肉、芝士同粟米,呢個配搭已經預計到好好味喇! 新鮮熱料手抓餅,鹹牛肉同粟米再加芝士呢個組合真係好好味! 第二站:甜甜蜜蜜的安格斯牛肉粒 即叫即煎的安格斯牛肉粒,加埋洋蔥同美極,非常惹味!不過份量少d! 第三站:東記小食的炒粉麵 估唔到呢度可以食到同大排檔一樣咁有鑊氣的炒粉麵! 眼見有9款配料選擇,例如腸仔、煙鴨胸絲、魚片,如果困難症又發作揀唔到要邊款好,仲可以叫全餐添,一次過食哂咁多款配料!而粉麵除左有一般的河粉、米粉、油麵等,仲有好少餐廳食到的銀針芽! 鑊仔細細都相當有鑊氣,而且師傅係即叫即炒,每次炒一份,絕對唔會將你個份同其他人的一齊炒,所以大家要耐心少少排隊等 (當日都等左3-4個人)! 大排檔風味一定要食炒河粉,我地叫左全餐炒河粉!河粉炒得夠乾身,加埋秘製醬汁,少點甜味,多了分惹味!正! 第四站:TODAY的珍珠奶茶 食到飽飽就要飲返杯飲品,突然好想飲珍珠奶茶,所以試下呢間! 估唔到太安樓呢度連普通的珍珠奶茶都有驚喜,茶味極濃,珍珠又夠煙韌! 其實當日仲有食到掃街首選的魚蛋燒賣,但真係只可以用一個字形容 - 伏!燒賣食落似係蒸左好耐,咖哩魚蛋的咖哩汁難食得超恐怖!雖然當日唔係食好多野,但都幾值得去掃下街,大家如果黎開呢邊可以過黎試下! 「太安樓」 地址:港鐵西灣河站A出口 「YING住食住行」已經開左係Facebook開左專頁喇! 歡迎大家入去比個like丫! www.facebook.com/yingyingstyle