最近廣華街個邊開左一間新的餐廳食越南菜，旺角區雖然有幾間食越南菜，但味道唔算太好食，好難得係廣華街個邊開左一間新餐廳，一定要去試下！ 食店唔算好大但勝在有個開放式廚房可以睇到廚師煮野食！而且一路等野食一路有香味充斥全間食店，未食已經流口水喇！而且食物真係煮得好快，order食物之後5分鐘度已經有得食喇！而且呢度的越南菜加入好多自創的idea，同平時食開的越南餐廳有所不同架！ 點擊圖片放大 多款配料比你加入食物度！ 越南菜之中我最鍾意食生牛肉湯河，呢間的生牛肉湯河，老闆話個湯用左牛骨煲足兩日先會用黎煮比客人食，所以每一啖湯都係咁濃郁，試左一啖原湯之後我再加"碌冧"(即係平時食開的撈檬汁，我本身真係極度鍾意呢個汁)，生牛肉就用左安格斯，食落去好軟滑，完全唔韌。呢個絕對推介！ 招牌生蠔椰汁酸湯湯檬粉 - 雖然有生蠔係裡面但飲落去完全唔腥，淡淡椰汁味又有少少酸味，都幾開胃！我本身唔算鍾意食蠔，但呢個蠔又令我有少少改觀！ 蠔肉size適中，我都可以一啖放哂入口！ 青檸梳打都用倒掛形式比你呃like！ 香茅薑蜜 - 涷涷地飲佢最好架喇！ 我地個日真係好肚餓，竟然可以食埋呢個古法窩蛋烤牛肉生菜包撈檬，老闆以平時的窩蛋牛肉飯更改小小調味就變成呢度的自創口味喇！而且仲可以用生菜包住黎食，真係好正！ 三色雞翼拼盤 - 包括牛油雞翼、金蒜雞翼及火辣蒜椒雞翼，老闆話包含3個地方的色彩(香港、越南、歐洲)，香港代表就係金蒜雞翼，有小小避風塘感覺，雞翼炸到超脆，好似食緊薯片咁；越南代表當然係牛油雞翼喇，超香牛油味，食落去雞肉仲會咇肉汁架；而歐洲代表就係火辣蒜椒雞翼，同水牛城雞翼差不多，不過比較辣！ 煙三文魚手撕雞紙卷 - 用左9種不同的蔬菜加埋手撕雞肉同煙三文魚，好味！我個人覺得加埋旁邊的酸菜食更加好味！ 法式芝心蝦多士 - 有睇過我之前的文章應該都知我係好鍾意食蝦，蝦多士更加係我好鍾意的一樣食品，但依家唔係度度都有得食，因為好多人會覺得好油膩，但好的蝦多士就係應該要做到唔油。呢度的蝦多士係台灣高雄啤酒節下酒菜得獎作品，絕對唔油膩而且最難得係多士面的芝麻完全無燶（芝麻係極度易燶架），仲要係裡面加入流心芝士，正到不得了！不過大家要小心芝士會咇出黎辣咀呀（因為我已經試左T-T) 有無發現我成日都提住老闆話呢？原因就係呢度的老闆真係好friendly，一得閒就會向客人介紹菜色的特別之處，比出面個d餐廳希望你快d食完快d走真係好唔同！抵讚架！ 越男仔 地址：旺角廣華街2-20號翠園大樓二期地下8號舖 「YING住食住行」已經開左係Facebook開左專頁喇！ 歡迎大家入去比個like丫！ www.facebook.com/yingyingstyle
