沉晚同朋友慶祝生日，去左位於創興的大滿喜食放題。已經好耐無食過放題，依家放題的食店開到盛行盛市，單單係旺角已經有10幾間，真係好難選擇。最後揀左大滿喜，原因當然係價錢比其他食店平喇！而且見到食店裡面有自助食物bar，於是決定試下。 自助食物Bar入面有兩大個飲品雪櫃，飲品有好多款而且啤酒仲唔洗加錢，可以任飲！另一邊仲有自助軟雪糕機，有乳酪雪糕同雲尼拿雪糕兩款口味選擇！ 仲有個雪櫃係裝滿哂雪糕同雪條，超多款口味的雪條！ 中間仲有各款冷盤，例如螺肉、麻辣雞腎、醃青瓜等等..當然唔少得甜品喇！其實另一邊仲有少少熟食，例如炒飯、玉子蛋卷、炸春卷。 開餐喇！頭盤我最鍾意螺肉，螺肉正常味道！ 鳳爪爭少少，唔夠辣亦唔夠酸。 麻辣雞腎有麻辣但唔夠入味！ 蛋撻只有一個字形容 - 伏！ 我仲試左之前係韓國想試但又唔敢試的桃味汽酒添！味道唔太差！ 大大盤的刺身好新鮮，三文魚切得夠厚，我最鍾意食甜蝦，呢度的甜蝦比出面的大隻。仲叫左珍寶赤海蝦，蝦肉同我隻手指差唔多粗！好肥美呀！ 北海道牛乳海鮮鍋 - 湯非常之甜，而且牛奶味好濃郁，入面的蟹柳沾滿哂湯汁！好味！壽司 -雖然好多人會話食放題點會食壽司咁蝕架！但我就認為壽司都可以整到好好味同有特色！呢度的壽司都算唔錯，壽司飯唔會因為係放題而硬班班，醋味唔會過酸，配合不同的配料都好好味！ 天婦羅 -有點驚喜的係天婦羅蝦比較遲食，但個炸漿都唔會"林"哂，入面的蝦肉仲要好彈牙！ 黃金蝦 - 有點乾身，唔算好好味！ 燒物 - 燒蝦又係我的最愛，燒完都好彈牙，好味呀！燒羊架，其實聞落去有少少羶味，所以我無試到！ 蜜糖燒雞翼 - 好甜的蜜糖配合有鹵水味的雞翼，好味！ 炸物 - 芝麻雞翼，我無食到，但我見朋友話住好飽都食到兩隻應該都唔差！紫心香芋丸好好味！芝士蝦丸乾左少少，仲有款吉列一口芝士，d芝士可以拉絲架！ 乳酪雪糕 - 食到幾飽都好，一定要食雪糕，乳酪雪糕唔會太酸配朱古力醬，正！ 食店大堂有得玩夾公仔機，相信係等位等lift的過程絕對可以吸引到你玩！而我沉日好彩地用左$8夾到毒菌妹妹！ 大滿喜日本料理 地址：旺角彌敦道593-601號創興廣場8樓
