有班朋友差唔多一個月都會食一次飯,其中有個朋友好鐘意泰國,講左幾次食泰國菜都比其他菜取代左,今次聚會終於可以一償佢的心願,就黎一次說好的泰菜聚會喇! 雖然好多地方都有得食泰國菜,但講到最多泰國餐廳緊係要黎九龍城喇!今次揀左由朋友提議 - 「同心泰國菜館」,位置就係富豪酒店附近的休憩公園隔離。 酸辣鳳爪沙律 - 酸酸辣辣好開胃,之前食過有d餐廳整到超辣,食一啖已經已經要飲水,但呢間唔會整得好辣,而且有少少甜味。好味道! 飛天通菜 - 炒得好夠鑊氣! 冬蔭功 - 朋友話食泰菜叫冬蔭功已經係定律,唔洗提都知要叫!呢個冬蔭功都好多料,酸味比辣味重,本人唔係太好所以我都係飲左一碗。 生菜包 - 我一直覺得生菜包的肉碎用豬肉係最夾,呢個生菜包的豬肉碎整得好入味,食落去有少少檸檬味,正! 乾炒豬肉河粉 - 味道係唔錯,但炒得比較濕做唔到乾炒的效果,而且河粉好碎。 明爐烏頭 - 呢個有少少失望佢唔係全條魚上,而將佢斬左件。但個湯好好飲,有少少酸味,魚肉都好滑! 南瓜焗飯 - 外貌好靚!但食落去就真係麻麻地,飯好乾,朋友話乾到爭d吞唔到,我食左一啖後都要撈肉碎先可以食哂成碗。 小食拼盤 - 份量比較少,但蝦餅同魚餅都炸得好好味,反而春卷麻麻地,又係比較乾。荷葉雞都好味! 同場加映 - 珍多冰,呢個我無飲到,但色彩繽紛吸引我去影佢相。 「同心泰國菜館」 地址:九龍城打鼓嶺道5號