每次去旅行,無論個日食到幾飽都好,返到酒店總係會心思思出去食宵夜又或者買外賣/叫炸雞返酒店開個小型宵夜大食會。 基本上係韓國如果買宵夜的話,紫菜飯捲同魚糕係我的首選,一來可以周圍都見到有小食檔賣,二來係韓國街邊隨便搵一間小食檔賣的紫菜飯捲都比香港賣的平同好味! 第2樣我會食的邪惡宵夜就係杯麵喇!韓國便利店賣的杯麵唔係款款香港都會有,咁難得去旅行緊係要試下唔同款式的杯麵! 第3樣必食的邪惡宵夜一定係炸雞,韓國人真係好鍾意食炸雞,只要同酒店職員講想order炸雞,職員就會比張外賣menu你睇,揀好左職員就會幫你order,最緊要同職員講你房號,咁就可以舒舒服服係房等食喇!通常外賣要30分鐘度就會送到,仲可以沖個快涼等食添! 呢次係我地行街行到太攰所以掃街返酒店當晚餐。當日係東大門買左紫菜飯捲、魚糕、年糕串同Two Two炸雞,炸雞無相像中咁好味,個醬汁太甜太膩! 另外一次係便利店買左杯麵,係小食檔買左魚糕同燒雞串,仲試埋好Hit可以拉到勁長的芝士漢堡包,不過當時漢堡包有少少涷左,無咁好食。 另一晚就去左朋友間房開左個小型的薯片小食會,我地叫左劉在錫炸雞,係酒店叫過幾次炸雞外賣,都唔係每間都咁好味。所以個人比較推薦呢間劉在錫炸雞,因為佢地的炸雞肉質較嫩滑又有肉汁,如果鍾意食甜酸味,就一定要叫佢地的炸雞,甜酸醬唔會太甜,恰到好處!仲試左韓國限定的焦糖薯片,但唔係咁好味,個焦糖味同鹹的薯片唔太夾! 最後介紹我地之前係東大門食過的布帳馬車,即係我地的大排檔。入面賣的食物有好多,辣炒豬皮、辣炒鰻魚、炒烏冬、辣年糕,不過食物大部份都係偏辣,但就可以感受下當地人食宵夜的風味!先食宵夜再繼續行東大門呢個不夜城,可以幫助消化又唔洗食完即刻訓覺!一舉兩得呢!