前幾日係我同一班友人每月的定期聚會,友人想食韓國燒烤,本身想去試炑八燒烤,但見到瓊華中心個條長長的等lift隊目又加上要等位30分鐘,於是轉去新麻浦。 我地一行3人,叫左個2-3人牛肉套餐再加一份五花肉。 依家好多間韓燒店都有爐邊蛋食,但呢度就只得1 Round。 但呢度的配菜都幾多,有泡菜、醃洋蔥、昆布青瓜同埋黑芝麻雜菜沙律。要讚一讚佢個醃泡菜真係好好味,唔會太辣同太酸,係香港暫時食過咁多間醃得最好味。當晚我地都encore左好多round :lol: 主角黎喇!我地都一致覺得第2層鮮紅色個隻牛同下層個隻牛肉比較好食。用黎包生菜食真係超級惹味! 呢個係炙燒生牛肉壽司,侍應會用火槍係你面前將牛肉燒熟,配上芝麻汁真係好好味! 呢杯係士多啤梨+香蕉沙冰,原來入面仲有酒,但真係飲唔出。 套餐包埋有韓冰,我地揀左棉花糖朱古力冰,又係會係你面前用火槍燒溶棉花糖,熱熱的棉花糖配涷冰冰的冰,真係非常配,本身我對韓冰無咩特別好感,但呢個令我改觀。 地址:旺角彌敦道636號銀行中心1樓8-9號舖