每位德國留學生, 如來自非歐盟地區, 都必須註冊入學時申請醫療保險, 30歲以下學生基本上都會被要求使用公立醫保, 30歲以上既會轉為私保。 因我未夠30歲, 故符合使用公保, 比較多留德學生選擇既公保有DAK, AOK及TK等。記得當時在緊絀的時間內要由幾間醫保公司擇一, 挺難的。 選擇困難原因如下: 價錢相差不遠 保障內容差不多 我既選擇困難症亦係我除左買旅遊保, 一直冇買過保險原因。 最終係多間公司中揀左TK, 原因: 當時有朋友都去德國留學, 她選了TK, 兩人一齊申請同一間公司可參加推薦計劃 (最終沒成事) 實際TK包咩, 其實我買完都唔係好清楚, 不過上網睇有人話TK包27歲以下(我唔知有冇限女生)打HPV疫苗; 老實講, 我中學個時HPV岩岩出, 已經想打, 但一直擔心有副作用到而家10年已經過去, 見副作用好似唔係好多咁, 又差不多夠27歲, 既然醫保可以cover都費用, 就拿拿臨去打。 因為第一次使用德國醫療系統, 事前都有一直上網睇點樣預約(termin), 點樣拎返打針既錢等等, 而穩陣起見, 亦打左去TK問關於打HPV既資料。 問題+回覆如下: Q1: HPV需打3針, 如果我打第二第三針時已踏入27歲(要明白係德國約termin唔係你今日去約聽日就有), 保險會唔會包呢兩針既錢? A1: 只要打第一針既時間係27歲生日前一日之前, 就包晒3針既費用* Q2: 一定要去醫院打定係診所都可以? A2: 唔一定要去醫院, 可以去hausarzt, 亦可以搵Frauarzt, 不過要留意HPV唔係必需預防疫苗, 你預計termin日子會大約係1個月後。 Q3: 我冇Hausarzt, 亦冇相熟Frauarzt, 我德文又唔好點知邊度好? A3: 你可以去Berliner Institute Tropenmedizinen, 由charite 營辦, 你搵佢地預約就可以, 佢地同TK有聯繫。 Tropenmedizinen....一個做亞熱帶研究既機構, 網站上寫既疫苗都係travelling vaccine, 為左確認, 係網站上留言問係咪有得打HPV, 唔夠2個鐘, 機構就回覆左當局有得打HPV, 更好既係唔需要任何appointment, 坐言起前, 第二日就走左去回覆地址打HPV。 前面廢話講完, 正式入正題。 要去Institute of Tropical Medicine and International Health, 最方便係搭U Bahn 去到Westhafen, 步行大約8-10分鐘即到 (唔難搵, google map下就知) 入到去先係號碼機拎號碼, 分有vaccination, consultation+vaccination 同另一個選項(冇查到係乜), 我選擇左 consultation+vaccination, 然後拎一張personal information form填, 上面需要填個人資料同病歷問題, 下半部份係由醫生填寫, 填完就乖乖坐底等號碼。 等左大約30分鐘, 醫生叫號, 有D唔好意思地用德文問醫生可唔可以講英文, 結果就遇上黎到柏林後講英文最流利既德國人。 醫生首先講左總共打幾多針 (根據年齡)同每針之間相隔時間, 之後見到我打白喉(Diphtheria)、破傷風(Tetanus)係超過10年前既事, 亦建議我打返呢枝混合針, 同時提醒我如果去南非前一定要打返Hap A疫苗。 最終我決定按原定計劃先打HPV, 其他之後先算, 講左左約10分鐘後, 醫生拎左本針簿寫底各針日期, 然後再係之前表格上寫明打Gardasil (佢話德國只有9價), 就出左去等另一位幫我打針。 話說打針過程亦好快, 等左5分鐘, 入房坐底, 姑娘(醫生唔係叫佢做姑娘, 應該係專業打針既職業)話HPV呢枝針好痛 (見到我驚嚇樣, 佢即時戴頭盔話自己冇打未感受過, 聽返黎), 但亦好快手, 幾秒內完成注射, 冇特別痛感,之後提醒我兩日內唔可以飲酒食煙就走得人。 完全成個醫療程序後, 拎住張form去比收銀處, 問左年齡後, 直接刷TK保險卡, 然後就可以走。 後記 條款可隨時間更改, 任何時候都要問清楚條款 一開始醫生仲同我講佢地只有travel vaccine, 冇HPV, 直到我話黎之前已發電郵問左有先黎, 醫生再次入房確認先話係可以打HPV 如無保險卡, 是次費用為: 11€( 10分鐘咨詢費) + 2€ (針簿) + 157€ (HPV) 網上大部份係去診所打針, 先拎醫生紙去醫房買疫苗再返診所打針, 完事後TK只會退還疫苗費用; 但因我係institute已經有疫苗存貨, 另外係直接用保險卡而非先自費後退錢, 故所有費用由TK負責。
