決定左就要著手申請事宜 申請學校最重要既一點係: 留意截止申請日期 呢一點重要原因係...我試過錯過左幾間學校o既申請時間, 而且有部份院校國際學生同歐盟學生申請日期唔同。 另外德國分有winter semester 同summer semester admission, 皆有唔同既截止日期 學校分類 德國有分Hochschule, universität, applied universität 等, 我申請既院校都係universität master, 主因係我想做研究方便, 另外兩種好似係偏向技術型, 故無特別留意 文件準備 1. 學歷證明 基本上由中學畢業證書到大學既成績單畢業單都要遞交, 更重要一點係大部分院校會要求certified copies (如需郵寄申請)； certified copies 最好去返德國領事館做認證, 我第一年申請時貪方便去民政署宣誓免費做左幾份, 結果第一年收唔到任何offer(亦可能我qualification 唔夠強) 2. 入學試 部分院校會要求申請者申請前先考試, 考試成績會計入Admission score, 考試日期間間唔同, 但一般一年會舉行兩次考試；亦有學校會係申請者遞交申請後經篩選再邀請申請者進行筆試, 如不方便親身到德國, 有機會跟學校協商後改為喺香港或其他型式進行考試； 3. 德文或英語能力證明 部分學校會要求International students 提供德語能力證明, 通常都係要求Testdaf 成績; 如報International program(好似我咁), 一般都唔需要Testdaf 成績, 但就會要求提交英語相關考試, e.g. Ielts, Toefl 等, 個人覺得比起英美, 德國對申請者英語試成績要求唔算太高, 以我學校為例, TOEFL IBT要求為80分 4. 其他文件 部份會要求相片, 履歷, 證件副本等, 詳細要依照各學科網站 申請程序 1. 直接通過學校連結申請 依據學校要求上載申請表格及各種文件, 完成後部份學校會要求列印完成表格(submit後會學校會寫明經內聯網或電郵下載) 連同certified documents* (護照, 學歷文件等) 寄去學校, 要留意, 根據我自己經驗, 呢類申請既截止日期為文件郵寄到達學校日期而非網上遞交日期 * 我曾經去民政局宣誓做認證文件, 不過個人覺得都係去返德國領事館做比較好 2. 經Uni-assist 部份學校會要求international student 經uni-assist遞交申請, 個人覺得經uni-assist做比較簡單。 首先uni-assist網站申請一個戶口, 填寫所有資料, 上載各種文件, 完全後需要郵寄certified documents去uni-assist指定地址。 當申請學校時, 可以係uni-assist揀返相應學校及學科, 填寫表格, 之後uni-assist收到申請後會send email提示進度。經uni-assist係要比手續費, 申請第一間會收75歐羅, 之後每間會收取15歐羅, 有部份學校會免uni-assist手續費, 需要睇返邊間係豁免。 完成審核文件會收到uni-assist一份文件, 列明之前大學成績對比德國系統既分數, 要留意德國gpa system同香港相反, 佢地最高為1, 最低為4 經uni assist 申請同樣有截止日期, 而且uni-assist會建議提早遞交文件, 以免因顛峰季而拖延左申請進度。 我自己經uni-assist 申請左3間學校, 收到其中兩間offer, 經多番考慮後就去左柏林, 開始柏林生活。
