話說上個月的母親節同家姐合力製作出''藍莓芝士凍餅'' (回顧) 母親節有蛋糕，冇理由父親節冇既 o係製作今次這個父親節蛋糕前，中途我地其實仲製造左一個失敗品同半失敗品..(- -'') 完全失敗的那個，是想用回製作''藍莓芝士凍餅''的物資，造出''芒果芝士凍餅'' 可惜... 原來忌廉芝士係唔可以放冰箱保存..(- -'')放普通雪櫃層就可以了 我地製作當日，發現忌廉芝士結左冰，溶雪後會有d一粒粒的物體存在，而且仲有陣味 另外，原本的材料為淡忌廉，但我地就買左低脂忌廉，結果係發極都發唔起..(- -'') 原來因為要脂肪含量35%或以上才可以打起，低脂忌廉的脂肪含量低於這數<---網上看到的原因 至於半失敗品，同樣是整木糠蛋糕.. 不過... 整餅碎整得不夠碎，搞到好似岩石面咁..一粒粒石仔o係蛋糕面..(- -'') 另外，忌廉打得唔夠企身..(- -'')，整得唔夠實，感覺製成品好似快要塌下來..(不過味道是不錯的(笑)) 有圖有真相，希望大家唔好笑得咁大聲，亦等大家可以睇到成功的與半失敗的強烈對比 ((傳說中的岩石蛋糕)) 好了，講完瘀事，就黎個木糠蛋糕小小爛教學兼分享 食譜其實o係網上都可以搵到，基本上大同小異 而大部分材料o係超市都買到，而雲呢拿條o係專門賣整蛋糕材料的地方/大型超市-如citysuper等就有得賣 材料： (6吋蛋糕模) 馬莉餅 (marie biscuits) 兩包(我買的餅內有獨立包裝的3包) 淡忌廉 500ml 煉奶 約100g (我買的支裝是185g，大約吱出一半多) 雲呢拿條 1條 (取其籽） 做法: (1) 之前就係用人手壓碎(冇用木棒)所以壓得唔夠碎，今次用攪拌機打碎馬莉餅，整得超碎 (2) 剪開雲呢拿條，用小刀取其籽 (3) 將忌廉打勻至軟（6 成企身），再拌入煉奶、雲呢籽至 8 成企身(好似軟雪糕狀） (4) 將馬莉餅碎先鋪在餅模的底層，然後鋪上忌廉，用湯匙鋪平，再鋪上一層馬莉餅碎，如是者以「梅花間竹」的方法填滿餅模，最後以馬莉碎鋪蛋糕最面的一層，放入雪櫃凝固(雪6小時以上) 份量有多，仲可以整多3小杯出來 登登登~~~~ 成功的木糠蛋糕出來了 至少唔再有岩石出現o係蛋糕度，而且d忌廉又夠實 蛋糕味道適中，唔會太甜 呵呵，連一向少讚人的爸爸都話ok，總算無白費心機.. 黎緊就到我侄仔生日(七月尾1歲大)，到時可能會試下整個岩佢食的蛋糕仔..不過好似好有難道... 我的email: yeeyee1030@yahoo.com.hk 有問題可找我^^
