最近好似好興一人燒肉,尖沙咀同銅鑼灣都開咗好多間,朋友介紹話最近旺角都開咗間,而且價錢仲好平,今日唔使返工就約埋朋友一齊嚟試吓啦。去到門口,仲見到佢有個一蚊牛舌嘅優惠,而且除咗呢個優惠,其他套餐都好平最平嘅$48就有啦,好似仲平過兩餸飯。我就叫咗個牛舌牛五花牛板腱套餐,佢嘅餐除咗包飯或者烏冬之外,仲包埋沙律同埋麵豉湯,真係好抵呀。一上枱嘅時候都嚇咗一跳,估唔到佢嘅牛份量咁多,而且牛嘅顏色都好靚而且肥瘦分明。我個人認為最好是嘅就係個牛板腱同埋牛舌,雖然佢唔係切得好厚,但係薄薄地咁拎嚟燒就啱啱好。而且食落去牛嘅味道好夠,肥瘦平均真係好好食。佢嘅牛質素高級到唔使點醬都覺得好好食。我朋友就叫咗個M9和牛套餐,雖然我冇試過啲和牛,但係睇落又大塊又靚,朋友話食落有少少入口即溶嘅感覺,下次我黎都會試呢個套餐啊。呢間餐廳又平又好食,而且位置方便,下次出嚟旺角都一定會再食啊。