扇火鍋 呢間火鍋食過好多次，每次食都好多人排隊，不過今日預早攞咗飛，所以唔使等位就入得啦。 估唔到日式火鍋店都有泰國嘅主題，咁就一於試吓呢個冬陰公湯底啦。佢俾咗一碟海鮮同一個蔬菜籃我哋，而且俾咗一個鍋，比我地自己炒香料。雖然係好新奇，不過我哋唔識整，好彩有個職員過嚟幫我地炒，炒炒下已經聞到好香啦。 呢度嘅牛肉同豚肉嘅質素都十分高，我哋起碼食咗六七碟牛肉。佢嘅牛肉肥瘦適中，而且牛味好夠，切得夠薄， 碌十零秒就食得啦。 冬陰公湯底嘅海鮮好足夠，入面有蝦同魷魚。而且食落唔會太辣，不過好香好開胃。 黎呢度最緊要嘅就係甜品啦，因為佢有一個自助嘅乳酪雪糕機。乳酪雪糕又好味，食落感覺又冇咁肥，我次次都食三四杯先走㗎。 呢間日式火鍋價錢又平，食物質素又高，而且仲成日有唔同嘅主題，所以我差唔多每個月都會同朋友來一次！
