Cubus 28 聽朋友介紹呢度有間好有特色嘅中菜，而且可以睇到維港夜景，咁就同朋友約定今日去試吓啦。 一上到去，見到呢度嘅環境真係好靚，而且氣氛好好，位置仲真係睇到維港夜景添。 呢個海膽牛油果藜麥蟹肉沙律味道好fresh，食落夠晒開胃，而且海膽都幾多，啱晒我呢個鍾意食海膽嘅人。海膽亦都夠新鮮，食落比較清甜 主菜方面，我哋就揀咗金莎芥末鴛鴦蝦球。蝦球大大粒，而且襯埋芥末味好夾，食落果種感覺好特別，而且好香口好好味。 呢個秘製XO醬蘆筍炒北海道帶子十分高質，帶子好大粒，食落清甜，口感亦都好好。 點心我地揀左黑珍珠海膽燒賣，燒賣就食得多，不過第一次食海膽燒賣，估唔到出奇地夾。海膽嘅味道唔會蓋過燒賣，反而係相輔相成，令味道更加昇華。 最後梗係要食甜品啦，呢個金箔紅酒烏梅山楂糕睇落好特別，食落亦好有中式風味。感覺有少少消滯嘅作用，啱晒依家食到飽飽嘅時候食。 呢間餐廳嘅食物好有特色，而且可以睇到好靚嘅維港夜景，啱晒情侶黎食飯呀。
