由於呢度經常update唔到 and 死server, 現正慢慢搬家到 https://xenianlui.blogspot.com/ 今次既行程係同雙方父母, 再加埋帶個女去旅行, 其實都係一個大挑戰, 但偏偏我地又忍唔住想去旅行, (亦想長輩係行得走得既時候, 去下唔同地方玩下) 而偏偏呢個trip係比我想像中更大挑戰, 就好似我出發半年前已經訂左 Airbnb, 點知日本就出左新民宿法, 禁止無牌經常民宿, 果時重聯絡返民宿個人都話無問題, 點知出發前一個月再聯絡個人, 竟然失蹤左, oh my god ! 大失預算 ! 跟住又要搵 Airbnb了解件事都用左成星期, 好在最後成功退款, 重送左一張 coupon (等於退款既金額, 即係變相送左 $ 5781 比我用), 所以補訂既民宿 total 只係用左 $ 1600 之後日本遇颱風, 又飛燕又潭美, 搞到關西機場取消左好多航班, 嚇親懵, 好在最後交通恢復正常.....順利出發 ! (第一次去日本順順利利喇好嘛) 2018.10.10 (Wed) 夜媽媽係香港 21:20 搭 Jetstar GK64去大阪, 當初絕對因為平先會揀 Jetstar (只有夜晚機), 後尾發覺其實去到大阪要 stay 機場酒店幾粒鐘... 其實d錢同搭靚時間既機差不多, 真係蠢左 ! 不過, 由於我地帶住9個月大既阿女(心語)去旅行, 反而夜晚機佢可以訓下, 至少唔會係機狂喊嘈到人地 ! (不過同BB一齊去旅行, 真係要帶多好多野 !) 由於當初唔係全部一齊買機票, 搞到其中一個要分開坐 XD 因為無揀位呀 Jetstar check-in 行李係可以同行者加埋total黎計既 2018.10.11 (Thu) 凌晨 0200, 終於抵達大阪關西機場, 好慶幸成程機都好順利, 心語亦訓得到, 由於凌晨既關係, 機場無乜人, 拎行李呢方面幾好, 會有職員拎晒所有行李排好, 然後拎行李時要核對返 passport 先比人拎, 咁就唔會拎錯行李 (偷行李) 喇 過關程序都好快, 我地立即去 日航關西機場酒店 check-in, 極速 settle 好d野就訓覺....訓幾個鐘嫁喳 ! 張床都好大下, 幾嘆 ! 1200 check-out 就係機場 counter 兌換 歡迎來大阪卡, 之前係Klook app買定, 包括南海電鐵車票和一日市內地鐵任用 搭左南海電鐵 rapit 去民宿(日本橋), 車程一小時內 第一次見識到日本既女性專用車廂, 係有限時間既, 睇清楚先好入呀 好多朋友都話日本好多唔同鐵路, 又好多唔同既站, 小心唔好搭錯, 所以我係鐵路站入面都好小心望清楚, 睇晒鐵路路線圖先至上, 以免搭錯 (其實無想像中咁困難, 只要你知自己向邊個方向就 ok, 因為我去果d都係大站黎, 如果會去少人去既地方就要留意喇, 因為有d列車係會skip左某d站) ps : 我係圖書館借左小氣少年本書, 非常詳細, 亦有晒唔同既鐵路路線圖 ! 推介 ! 鐵路上落要搵部 lift 唔係咁容易, 由於媽媽隻腳唔太好, 所以好多時都要係站內兜來兜去搵lift搭 點擊圖片放大 講返今次民宿(Airbnb), 我地 5大人1 BB 總共分左兩個 apartment, 本身book 民宿就係諗住有得煮野食比BB, 同埋有需要用洗衣機洗衫 最後無乜選擇既情況下book左間平靚既民宿住, 但係無煮食爐 (d相係臨走前先影, 所以房間比較亂, 由於有BB, 所以我地推埋左兩張床, 我幾鍾意佢廁所同沖涼係分開, 唔駛爭, 座廁上有得洗手, d水會流返入廁所水箱, 呢個設計會慳左水, 應該係用淡水掛? ) 我地住既地方好近黑門市場, 步行幾分鐘就到, 朋友話黑門市場唔算抵, 因為做遊客做貴晒, 但去得旅行唔緊要喇, 呢度唔算好大, 好快就可以行晒 食左扇貝同埋章魚燒, 扇貝大大隻, 但唔算太特別, 章魚燒同香港果d相比真係贏九條街, 又軟身, 又熱辣辣, 又夠惹味 心語睇到流晒口水, 食住手指頂下癮先喇, 無你份呀 然後就搭左去搵 阿卡將 Akachan (大型嬰幼兒商品店) 本町店 : 御堂筋線 本町站 9 號出口 (營業時間: 1000 -1900 ) 本身以為好近...點知出完個鐵路出口都重要行一段路...... 去到足足有五層樓呀, 大型阿卡將有兩間, 一間係本町, 一間係天王寺, 上網search過話本町d貨好似較多種類, 所以就黎左呢間喇, 但其實本町店內既路較窄, 大家都會用手推車, 再加上要去唔同樓層, 變相其實都係幾麻煩, 帶埋BB通常要等 lift (後來有一日去過天王寺果間....建議大家去果間, 方便好多, 一層過, 係正商場入面) 係本町店都買左大批物品, 但一館個本館西賣嬰兒食品, 我地一開始無留意, 比完錢就廢事再去喇... 因為5樓排隊比錢都要一段時間 (收銀會直接退稅入袋) Shopping完之後就係附近覓食, 揀左間<王將>, 係日本食野真係好抵, d set大大份, 計返HKD都只係 50-70蚊, 心語只係食佢d糊仔/粥仔, 有得睇無得食 要注意既係, 日本餐廳係無規定禁煙既, 唔似香港全面禁煙, 所以同BB一齊進食要留意下附近有無人吸煙, 以免影響到 BB 由於帶住BB同長輩一齊去旅行, 休息時間就要增加, 所以行完一個地方, 我地就會返民宿稍作休息 到左夜晚 10點左右, 我地再出發去心齋橋食宵夜 (當時心語訓覺時間重係唔穩定, 所以我地無留係民宿休息) 去左呢間舖度食壽司, 其實大阪唔係周街都有壽司舖, 又或者唔係咁易搵到大間少少既, 我都係用 tripadvisor 睇住地圖去搵 第一次係日本食壽司.....同香港真係爭好遠 !!!!!!!!!! 如朋友所講, 日本食壽司係好鮮甜既, 重記得以前我係唔食生既壽司, 後來係香港慢慢嘗試食, 如果係日本質素的話, 絕對唔會抗拒 ! 同香港相比, 壽司價錢都係好平, 推介呀 ! 經過心齋橋舖頭門口, 頓時覺得其實日本都唔係想像中咁環保, 始終都係即棄既多 見到呢個好多人影既固力果跑步人, 由於某d低能mistake, 合照影得唔太好, 哈哈 經過都影下喇, 歷史悠久的地標相片 亦見到好多間知名既蟹道樂, 不過search過話食物一般, 所以我地去左另一間較貴既<網元別館> 難得見到 spider man 食扇貝 XD 由於我地好夜先黎心齋橋, 人流唔算多, 但都重有好多野食 重有不同既 24 hours 藥妝店 其實由民宿行過黎都有一段距離, 孭住BB行都有d吃力 心齋橋就好似旺角咁, 但我會覺得其實心齋橋唔係好多野值得行, 主要都係飲飲食食喇~ 忙碌既一日就咁完結, 明天繼續