每一年至少一齊去一次從未去過既國家, 係我定下既目標 (希望之後能夠 keep 住) 正因為一月係我地結婚既一週年, 我希望去一個旅行黎慶祝, 係2016年9月已經開始計劃, 係度揀地方, 本身係揀左去瑞士, 睇下少女峰, 睇下幾個城市, 後尾睇返資料, 真係太凍, 驚頂唔順, 又怕登山之後出現高山症會影響行程, 基於種種原因, 我地暫時擱置左去瑞士既決定 然後搵資料期間, 發覺1月份, 歐洲其實都係偏凍, 係資料搜集期間, 發現意大利都係一個合適既地方(度蜜月勝地) 因為意大利唔算太凍 (0-10度), 同埋又有景點想睇, (如果你對藝術充滿興趣, 意大利絕對值得一去) 參考左好多個網 (背包客棧 ,sharpe (圖書館有佢本書, 連結請按我) , 總算係11月定到個大概行程 "Big4" 指 米蘭, 羅馬, 佛羅倫斯, 威尼斯 而 Big4 當中我地決定唔去米蘭, 因為好多人都話米蘭行一日已經足夠 加上我地唔係鍾意shopping既人,所以就決定唔去米蘭 (主要原因係 假期唔夠去晒咁多日, 唔想咁趕) 路線: 羅馬(2晚) -> 佛羅倫斯(4晚) (半日去比薩斜塔) -> 威尼斯(2晚) 當時plan好晒, 已經係11月, 距離出發只剩下2個月, 所以立刻上網搵機票, 而我地玩法係, " 羅馬入境 , 威尼斯出境 " 比對過 skyscanner 同 expedia 既機票價錢, 最後用 expedia 買左機票, 土耳其航空, 上網search過評價, 係唔錯, 第一日睇既價錢係 $ 4300 左右, 過左兩日, 張機票變左 $5024 一張, 拿拿淋即刻買左兩個人既機票 total $ 10048 一旦買左機票, 就代表真係confirm左去意大利, 無彎轉, 所以會逼自己快d定好行程, 分配好邊日係邊個城市之後就要揀酒店, 透過 agoda, expedia 既評價同價錢, 黎決定揀邊間酒店, 記得一定要登入, 一定要登入, 一定要登入, 因為登入後係會有特別價錢, 比對後我分別用agoda同 expedia訂唔同酒店 酒店首要條件係地點(近車站) , 然後係價錢 ! 搞掂酒店之後就要買定鐵路票, 因為意大利國鐵有個叫早鳥優惠, 即係越早買就越平, (其實我已經唔算早了, 剩返1個月多少少) 唔知係咪因為淡季既原因, 我買果時係用相同價錢揀到premium既位置 如果行程真係決定唔到邊日係邊個城市, 或者唔想 fix 死自己一定要果個時間, 大可以去到車站先買, 但係我當日 check 過票價, 係要一個 double, 所以自己決定喇 直至12月尾 1月, 我開始買定景點門票 (梵蒂岡博物館, 羅馬競技場tour) 同埋我再check下意大利既天氣, 都仍然係keep住 0 - 10度, 所以我地係淘寶度買左帽同埋毛絨頸cool黎保暖, (頸位保暖真係好重要) 有人話外國既凍 係無香港咁凍, 但係偏偏呢個一月唔知搞乜, 意大利係偏冷, 幾策安全, 我地去埋 uniqlo 買 heattech 既底衫同打底褲 (保暖就唔係好夠暖, 但著左好過唔著) 由於歐洲國家室內都有暖氣, 所以決定唔買發熱底衫 就係咁, 準備得七七八八喇, 出發前我地最驚係天氣, 同埋d人話意大利一月既天氣係多雨, 一旦落雨, 我相信我地既衣著未必夠頂, 我倆就冒住隨時凍瓜既心情出走吧~~~~
