20/2/2023 之前諗左好耐邊日去睇富士山好，因為有D日子陰天，好彩揀岩左呢一日!又係晨早起身嘅1日😪 好多人去河口湖都會搭JR富士回遊 (4,310YEN)，但係我選擇咗搭高速巴士 (2,200YEN)。因為價錢方面平差唔多一半，以前搭過喺非繁忙時間唔會塞車，時間上2種都需時約2小時。但留意番繁忙時間搭高速巴士嘅話，會大機會塞車，搭富士回遊就會比較好。 高速巴士預約網站:https://www.highwaybus.com/gp/inbound/index?lang=CZ1 係預約網站搜尋關鍵字“河口湖”就會見到唔同出發點嘅路線。購買車票後，可以揀Print車票出黎或者以電子車票方式Show比職員睇。如有需要，可以係搭車前線上取消預約 (車票上有寫取消嘅時間限期)，手續費100YEN。今趟旅程就有需要用到，稍後再講。 因為1日遊嘅關係，所以選擇左7:15嘅班次。我地搭由新宿出發嘅巴士，搭完地鐵跟指示牌往新宿站南口方向行 (高速空港Airport bus方向)。 出街道後就見到對面係JR站，旁邊上扶手電梯嘅位置就係上高速巴士總站，搭上4樓就係喇。 上面有便利店，可買早餐上車食。冇預約嘅話亦可提前直接係櫃位購票的，只係需留意班次會唔會full。 2小時內就到達河口湖駅，天氣又好好呀。落車已經見到清晰嘅富士山喇!!! 係河口湖駅入面可以買巴士周遊卷(1,500EN)，或連纜車觀光船嘅套票都有。站入面同出面都有巴士時刻表同路線圖，詳情亦可到官網睇定:https://bus.fujikyu.co.jp/rosen/shuyuomuni 因為我地去嘅地點唔太多，所以就冇買周遊卷。搭巴士可用Suica卡，萬一唔夠錢都可在車上增值。第一站先去搭纜車上天上山公園睇富士山，搭紅線巴士到9號站“遊船/索道入口”。 纜車開放時間係9:30，建議早D到以免之後大排長龍。落車已見有團遊客行緊去，即刻加緊步伐先上去。 上次去富士急雖然都見到富士山，但今次見到再近D，而且由山上面俯瞰落去，全個景真係好靚~ 有個位置有職員專幫遊客影相，覺得影得好嘅可以買相。佢仲可以幫你用自己電話影相的, 唔洗周圍搵人幫你影好方便。 見佢影得唔錯就買左張，有少少可惜相機像素唔夠電話清晰，不過還可以。 10:00會開放千秋，可以2人坐住千秋又影到富士山，不過有唔少人排緊隊所以就冇影了，有機會一定要影番先得!儲金幣，每到一個景點，有得買嘅話我實儲haha 之後再搭紅線去河口湖自然生活館，入面有紀念品同手信可以買。 再去湖邊大石公園坐下食下野，真係好寫意，富士山又近左!係落車嘅位置有士多啤梨買望住呢個景真係坐到唔想走😍 天氣真係好好! 隔左一陣開始有少少雲遮住左，好彩早左黎! 有枱櫈嘅位置附近仲有個for遊客放電話影相嘅架，呢個設計真係好好，唔洗搵人幫手影。 難得黎到咁好天，而家睇番都嫌自己影得唔夠多靚相😂 附近有間雪糕店可以上一層睇住富士山食下雪糕，不過我就冇去喇 因為一日遊又打算去忍野八海，所以睇富士山嘅景點都唔多，下次可以再黎住番一晚，去多D景點。 大約2點番到河口湖駅轉車去忍野八海，由於等車期間唔夠時間去餐廳慢慢食，所以係街邊買左魷魚同去便利店食左D野。 大家有時間可以去河口湖駅對面嘅上層餐廳食野，窗邊可以一路食一路望住富士山架。 係河口湖駅出口嘅左邊6號車站搭觀光巴士去忍野八海站(126號)落，如果喺忍野八海入口站落會行得比較遠，所以建議忍野八海站落最好 (車程約40分鐘)。時刻表同巴士路線圖可係官網見到，因為有幾條線都可搭到去:https://bus.fujikyu.co.jp/rosen/shuyufujikkogohttps://bus.fujikyu.co.jp/rosen/detail/id/21 落車後行冇幾遠就係忍野村觀光案內所，職員識講英文，可以入去拎定地圖同埋問清楚回程巴士時間及上車位，因為回程都有好幾架車搭番富士山駅/河口湖駅。 步行幾分鐘就到~ 忍野八海其實就係忍野村入面有8個池，經由火山噴發及火山運動後形成嘅湧泉水池，部分仲好清澈見底。池配合周圍嘅建築同小橋，加上藍天白雲，的確幾靚幾有特色。 不過有幾個池有D污濁，一D都唔靚😅 沿住入村條路都有D小食店，入面亦有手信同小食賣，行到攰可以坐下食下。仲可以買枝泉水飲 大約行左2個鐘就搭車走喇，本身預計搭5點半倒嘅車走，有1個鐘時間番河口湖駅搭一早預約左番新宿嘅高速巴士。因為回程車好full，上一次去富士急冇買回程車攪到好迂迴曲折先番到市區。今次以為自己預得好好，點知計漏左原來係會塞車😂等到夠哂鐘都未見有巴士，以為架車走左啦，跟住等多幾個字都發現冇下班車，條路就開始好塞了。等到心都慌，最後成6點先有車黎😂雖然上左車但仍然好塞，就黎到預定搭高速巴士嘅時間，好彩之前提及過係可以線上取消，所以即刻取消同買過班車。應該因為塞車嘅關係，都加開左高速巴士班次。因為我冇開漫遊，幸好買飛時唔洗入驗證碼，都好方便。 晚餐係新宿隨意揀左間鐵板王國食扒，明明order 5成，黎到變左7成，因為係鐵板上，好快就變左10成🙂質素普通，唔推薦😂 好彩天氣好睇到富士山，真係影左唔少相🤣Day 4 END~
