好耐冇見！又懶左5個月，睇一睇發現大家好似鐘意睇啲實際啲既野，多過LO叔真人真事講故。上次篇防水防漏產品介紹既瀏覽次數竟然比其他BLOG多成幾十倍！老老豆豆，睇住啲瀏覽次數咁多原來真係有啲成功感，多謝大家支持先，一齊繼續睇睇漏水問題！話說LO叔有個岩岩搬入住新界既朋友，佢住既係典型3層高村屋又連天台，住開唐樓既LO叔非常羨慕，「你就爽啦，有獨立屋住，都唔知住舊屋唐樓既人有幾咁辛酸，星期六日冇野做UNUN腳上天台燒野食又得，初一十五曬月光賞月又得」。點知住唔夠3個月，條友仔就開始投訴，都不外乎每逢打風落雨3樓天花會滴水，同埋夏天係3樓唔開冷氣熱到HIHI。LO叔知道近年村屋好興安裝太陽能板，相信肯俾錢安裝既村屋業主都唔係為環保，而係深信太陽能板回饋返黎既錢一定回到本先會咁做，今次就唔講村屋天台太陽能板係唔係屬於僭建物呢個問題，亦唔討論太陽能板可以帶來幾多錢，想大家睇睇安裝太陽能板同滲水既關係。 相片來源：香港01/WWF 相片來源：東方日報 相片來源：村屋網太陽能板本身冇問題，但留意一下安裝方法，工程公司為穩定支架會將支架腳裝嵌落村屋天面，試幻想一下一個本身做哂防漏隔熱既天面，安裝時有咁多個螺絲打鑿鑽入表面，即係人為破壞天面防水層，咁又點會唔漏水？LO叔建議打算安裝太陽能板/已安裝太陽能板既大家，檢查下天面天台及天面下層天花有冇滲漏，如果唔係太陽能板回饋既錢都唔夠要黎維修呀！下一個BLOG，睇心情啦下。
