LO叔足足懶左2個月冇打BLOG，所以話做一個BLOGGER都唔易，加上WORK FROM HOME係好容易DUM懶個身；唔好嘥時間，要保持好學精神，即刻入返正題。上次講到今次要介紹防水防漏材料，之前果卷膠紙就唔講嘞，如果大家有興趣可以睇返上2個BLOG有關防水膠紙既故事，今日講下通常師傅會用、係五金舖買到同埋係網上搵到既材料。 1. 牛奶水 (英泥寶) 相片來源：佐記建築材料 「佐記推介各位裝修師傳使用「英泥寶 Kanga-Bond」混凝土添加劑，英國制造(Made in UK)，有助加強混凝土密度，防止混凝土龜裂，增強接合力，至重中之重就不得不提「英泥寶」的防滲漏能力，使用「英泥寶」混合而成的防水砂漿，適合塗於牆身，達至防滲漏效果。」 - 佐記建築材料介紹英泥寶 唔知由幾時開始，差唔多9成裝修師傅都會用牛奶水黎做防水， 「裝修佬平台聯合創辦人鄧世民（Simon）提醒蕭生注意揀磚及防水層，事關牆磚與地磚不同，兩者吸水率有別，牆磚一般需要浸水後鋪貼。坊間九成師傅用英泥寶做防水層，怕未夠穩陣，可考慮增加額外防水物料，例如「西卡107」防水塗料、防水黑膠等。鄧世民表示，英泥寶又稱「牛奶水」，市面有九成師傅採用這種防水物料，混合英泥作底層，然後鋪設英泥沙鋪磚，是防水基礎層，如果師傅手工好，防水功效綽綽有餘。」 資料來源：蘋果日報 2019年8月25日 牆身「飲牛奶」防水功效大 事實上，英泥寶只係石屎添加劑，本意並唔係要用黎做防水，有測量師更形容用英泥寶做防水既手法山寨。 「現時坊間普遍採用英泥沙漿混以石屎添加劑(俗稱「奶水」)來作防水層，雖然成本便宜，但其山寨式做法卻潛在不少問題。採用上述施工方法的防水層，易受牆內冷熱水喉管和沐浴時的溫差影響，出現冷縮熱脹，導致裂紋和受損；再者，批盪式防水層接駁疊口極多，亦存在很多小孔於內外，容易出現滲漏，故此單以這土法施工，實在太不可靠。」 資料來源：am730 2012年11月15日 建微知著 - 何潤權 樓宇漏水(二)：防水層失效 想當初LO叔岩岩有漏水問題時搵左好多位師傅，10個有9個師傅都話用牛奶水，記得有一次終於忍唔住問師傅，「其實牛奶水係咩黎架？個個都用係咪真係咁把炮？」師傅冷笑「嘿！你自己都識講個個都用啦，咁個個都用係咪實冇死先！嗱！話你知，牛奶水即係膠水，可以痴住啲石屎既，你自己話把唔把炮啦！」當時LO叔見師傅大派定心丸就一口答應話俾佢做，最後就當然係後患無窮先有心情係度寫BLOG 9UP。 過左咁耐之後，LO叔終於明白其實牛奶水並唔係傳說中咁把炮，亦唔係一種可以痴住石屎既神奇膠水，用完過一排冷縮熱漲就88；說穿了係牛奶水真係好平，平均$500/18公升一桶，周街都買到，師傅又有錢賺，變相防漏工程價錢都比其他方法平一大截，就算你鐘意DIY都可以自己買黎返屋企補漏；其次就係之前師傅大大聲講既「個個都用係咪實冇死先」，LO叔發現呢個心態根本就係人性的弱點，個個都以為係人都用就係好，呢個刻板印象令消費者冇左判斷力，盲目跟從亦懶得再去搵第二個方法，所以先會令牛奶水變成香港坊間最常用既防水材料，但係唔好忘記佢本身只係石屎添加劑。 2. 西卡107防水沙漿 SikaTop® Seal-107 相片來源：佐記建築材料 「SikaTop® Seal-107 為一水泥質雙劑型高分子改良式防水砂漿。該材料可用 於混凝土及砂漿以防止水份滲透。 可以使用於內部或外部防水及防潮層混凝土、砂漿、底塗、磚建築及木建築 保護混凝土結構物防止中性化、霜氣或鹽份造成的不良影響。 用於儲水槽、游泳池之剛性防水。 新建建築物地下室外牆防水。 作為地下室內牆的防潮層。 可以填充於混凝土結構物之髮裂紋。」 資料來源：台灣西卡 可以睇睇Sika 107既官方用法片段。 「Ray強調，浴室的防水層做得不好（包括地台及牆身），必定後患無窮。他分享，以前做防水，一般以英泥加英泥寶便算；現在行內會再加一層防水英泥（如圖示的SikaTop Seal-107防水砂漿），可達致滴水不漏的效果。」 資料來源：香港經濟日報 2017年9月23日 浴室篇：防水免後患 尺寸掌握亦重要 LO叔覺得Sika 107根本就係牛奶水既一大進化，仲要係房屋署認可，成日覺得佢好似有功能既水泥咁，可以就咁批上牆或者地台。價錢平均$330/一套包括5kg液體及20kg粉料，不過要留意對於不同施工環境Sika有不同既材料型號，107主要用係浴室企缸，如果要用指定防漏材料記得要同師傅傾，因為身邊有好多朋友瀨過野，買埋材料返黎點知個師傅淨係識用牛奶水，話唔識用Sika但又夾硬迫住用，朋友仔仲要買錯所需型號，錯上加錯，最後就梗係又漏啦。 「陳帆指，隧道天花所謂的滲水痕迹或裂痕，是厚度逾30毫米的防火塗層，因隧道長數公里，塗層分兩次噴塗，因熱漲冷縮及塗層乾涸後形成所謂裂痕，屬正常；又指石屎非百分百防水。」 資料來源：晴報 2019年1月7日 中環灣仔繞道疑滲水 陳帆強調安全 用家評價黎講LO叔覺得如果師傅手勢好，Sika 107都頂到2-3年，做一做防水工程買2-3年既安樂都抵既。始終有個迷思係局長話石屎唔係百分百防水，如果Sika係一種水泥砂漿，點解又防到水？ 3. 打針 (灌漿) 關於打針，LO叔認為普遍程度同牛奶水不相伯仲。 「注漿防水是利用液壓、氣壓或電化學原理，通過灌漿管將各種固話的漿液注入到地基土中，漿液以填充、滲透、擠密和劈裂的方式，將土顆粒或岩石裂隙中的水分和空氣排除後佔據其位置，經過一定時間後，漿液將原來鬆散的土粒膠結成一個整體，可以改善地基土變形，或用於減小滲透性。」 資料來源：每日頭條 2017年6月30日 最詳細的注漿防水施工方法，你值得擁有！ 咁其實灌漿係灌咩漿先？經資料搜集，主要係低黏度聚氨脂追水劑(Low Viscosity Polyurethane Injection Grout)、環氧樹脂(Epoxy Resin)及聚氨酯泡沫填縫劑(PU Foam Sealant)。 資料來源：香港漏水及防水資訊網 相片來源：隨意窩 灌漿物料可以防潮、保溫、絕緣、隔音，要留意係物料易燃，同埋室外使用時要避免俾紫外線直接照射，因為會紫外線會加速膠質老化硬化，所以外牆或者天台位置通常會用其他物料做防水。由於打針灌漿唔會處理滲水源頭，好多人都表示係一個治標唔治本既方法。 「香港公正行有限公司樓宇檢驗技術總監賴達明表示，為天花灌注防漏物料（俗稱「打針」），乃治標不治本的處理方法，「滲水源頭都未根治就打針，會整到啲水喺天花入面谷住，分分鐘搞到滲水情況仲更加厲害！」賴批評房署有關處理方法僅屬「頭痛醫頭、腳痛醫腳」，「一定要先徹底處理好滲水嘅源頭，下一步至可以做打針嘅修補！」 資料來源：東方日報 2014年2月22日 「打針」治滲水 房署求其 好多時師傅打針時唔會知道牆內裂縫係邊度，亦唔會知道水會被迫去邊度，分分鐘變做多一個漏水位；LO叔作為打針既用家，有發現打完針後師傅會用快乾英泥修補裂縫，但好快又會裂返，過左好耐之後先有一個師傅解釋到係因為石屎同石屎唔相食所以修補唔到。不過一分錢一分貨，打針灌漿方法係防漏黎講係比較經濟，大概$3000起，但打完針有幾多善後工作，大家自行判斷打唔打針啦下。 4. 滲透型石屎防水劑 (卓先液) 實不相暪，LO叔就係用呢種材料解決左多年既漏水問題，講明先市場上唔多見呢種材料，不過搵落原來都有幾個唔同品牌，其他品牌冇用過LO叔就唔講咁多，淨係講下用過既呢個。 相片來源：卓先國際(香港)有限公司 「卓先液可應用在所有石屎的材質上，如水泥、水泥磚、混凝土預製件等。卓先液可增強石屎的坡度表層，並有防塵、防潮及防水作用，卓先液最突出之處是能將新和舊的石屎緊緊連結而不脫層。卓先液有效深入滲透石屎約40毫米深至石屎結構內部，滲入後會於石屎中的孔隙中與石屎內的物質產生化學反應，即時形成果凍狀的不透水層，卓先液會於21-28天完全乾硬變成晶體，建立長期的孔隙阻塞作用，從而形成自身的疏水屏障，使水無法滲透入石屎；亦與穿透石屎的粒子結合，使滲透區域硬化。通過孔隙阻塞作用，卓先液令石屎密度增加，而不影響石屎原有設計的強度特性。配合一系列相關產品有效維修、根治及預防石屎出現的各種漏水滲水問題並達至最佳效果。」 坦白講當初真係唔係幾想用，呢一類型既材料唔知係咪新出，好少見有人討論又或者係新聞會見到介紹，同埋價錢比以上3個方法高少少，但又「走投無路」乜都要試既心態就試左佢。LO叔本身係打算買返黎自己再搵相熟師傅搞，點知佢地話冇零售，要指定工程公司先可以用，心諗「有咩咁巴閉，有人想買都唔賣」，但見佢免費檢查就是但啦；老老豆豆，作為一個文科人既LO叔盡力發揮好學精神都唔能夠完全理解佢既原理，當日問左師傅好多個問題「咁即係點樣滲落去？」「滲到幾入呀會？」「咁有水到又會唔會沖走佢架？」，師傅好似俾人問慣哂咁「你幻想下石屎就好似一舊海綿咁，海綿既窿仔俾藥水填滿左乾左之後就會變左晶體，成舊海綿會變更硬，除非人為破壞，如果唔係晶體會一直留係啲窿仔入面。基本上就係治本既方法，又可以解決石屎同石屎唔相食既問題。」 最後LO叔用家評價就係一分錢一分貨，可以解決漏水問題值回票價。 不過唔排除科技進步，遲啲起樓唔駛用石屎，冇漏水問題，大家可以安安樂樂大覺訓。 下一個BLOG，睇心情啦下。
