最近LO叔冇乜心情講故，因為又黎到傷春悲秋既3月，係LO叔最憎既春天。 春天最討厭之處莫過於一個回南天，潮濕程度絕對係攞你命3000，相對濕度最誇張可以去到100%；大家注意係100%相對濕度，並唔係100%水。另外，春天除左天氣潮濕，連人都係濕到不行，仲有就係訓極都攰既春困，呢啲都係提外話。正題係最近多左好多朋友同LO叔講屋企漏水，LO叔都有叫大家睇下究竟真係漏水還是純粹春天作怪。 如果春天回南天潮濕作怪的話，屋企牆壁、天花、地板都有可能起水珠，廁所企缸或者洗手盤位置既膠邊好大機會出現霉菌，以前LO媽教落要用漂白水濕啲紙巾醃下條膠邊就冇事。至於起水珠既原因係「當天氣由冷變暖，冷空氣剛走，另一股暖濕的海洋氣流迅速補充時，牆壁、地板等的表面溫度仍然較低，空氣中的水氣在遇上這些表面時便很容易凝結成水點。這些表面的吸水能力低，有利小水點聚集形成可見的水珠。」，其實就即係倒汗水。通常屬於回南天既起水珠現象只會維持幾日，當氣溫慢慢回升，濕氣冇咁重時，呢個現象就會減退。 相片及資料來源：明報 當回南天過去，繼續發現屋企有地方仍然潮濕發霉但唔係表面，而係入面濕出黎，油漆表面又開始起一個個小泡，咁好大機會係漏水；如果繼續由佢濕落去，再加上細菌同悶熱天氣，果個位置好快變黑，再唔理佢連菇都生得出，到時自己粒菇自己種不是夢。講笑，唔好認真食「嘔」出黎既菇，係細菌黎！ 相片來源：Tru-Seal 附送菇圖一張，LO叔話你知其實佢係黑木耳。 TO EAT OR NOT TO EAT, THAT IS THE QUESTION. 相片來源：HK01 下一個BLOG，防水防漏材料介紹。
