【漏水2020】搞乜X又漏水 適逢2020年1月，好學的LO叔有一個新嘗試 ─ 希望成為一個漏水BLOGGER。 坦白講，有頭髮邊個想做癩痢？有間屋又邊個想佢漏水？慘就慘在LO叔最有經驗莫過於處理漏水，但其實係受漏水困擾超過10年，絕對係經驗豐富的漏水屋苦主；加上接觸無數個漏水維修工程師傅，深明苦主煩惱，實在要紀錄一下心路歷程。 想當年，LO叔貪平租住一間土瓜灣唐樓，類似下面張相那種。幾千蚊住係唐5樓仲連天台，年少無知覺得非常爽皮，租住當時業主岩岩翻新左就更加吸引。當時1年生約，1年死約又覺得幾唔錯，冇乜點考慮就決定租。住落3個月左右經歷左幾次落雨，天花板就出現水漬，見對生活冇乜影響就冇特別同業主講；再過多幾個月，有一晚凌晨屋企突然跳FUSE，當時係夏天，冷氣熄左熱醒LO叔，叫電燈公司人黎緊急維修，先發現竟然係漏水令屋企FUSE都跳埋！ 相片來源：躍變．龍城——九龍城主題步行徑 下一個BLOG，故事繼續。
