近日上網見到有代客買餸服務 切好、洗好 仲調好味 好似好方便 到底同平時超市買到嘅餸包 有乜分別？ 我就試咗2間代客買餸公司服務 再同超市餸包比併 睇下有無「伏味」 測試嘅包括有：Deliverz、Yummy Everyday及fusion 【論味道】 3間公司的餸包 基本上都已調好味 不過同時代表 如果調味唔得 都幾難補救 【最好味—Yummy Everyday】 Yummy Everyday嘅咸蛋蒸鯪魚豬肉餅（任你魚肉） 呢間講明豬肉係用黑毛豬 調味適中唔咸唔淡（完全不用加豉油） 肉餅嘅肉唔會一篤就散 更有媽媽煮的感覺及味道 除了黑毛豬 呢間用嘅食材都係靚料 烏頭是本地有機烏頭魚 配有咸檸檬及鮮檸檬做配料 一拆開袋時好鯹 仲擔心會中伏 點知蒸熟後有驚喜！ 魚肉質較普通烏頭實少少 金銀蛋濃湯菜味道都好好 菜很新鮮 3個餸 家人都一至讚好 極快食晒 湯方面 呢間個湯係湯包 加2蚊會有埋湯料 味道有住家feel 可惜係3餸1湯 都係得2包湯 3人家庭會覺得唔夠分 Yummy Everyday三餸一湯未煮前是這樣的，魚及菜都是洗好再真空包裝 送貨時間是5-8pm，有保溫袋及冰袋包裝，如趕不及回家，由管理處代收的話，也不怕食物放室溫會變壞。 三餸一湯，用了大約40分鐘時間完成 【中規中矩—Deliverz】 個咸蛋肉餅微微過咸（可能我多手，見佢有豉油提供，倒咗少少落去） 肉餅輕輕篤已散開 似茶餐廳肉餅feel 沒有屋企煮嘅味道 烏頭魚方面 洗得好乾淨 不過只有鮮檸檬、無咸檸檬 雖然提供咗支疑似檸檬水 但煮完仍然無乜味 好彩條魚都算新鮮 唔會鯹 個湯味道唔錯 不過這間店 主力sell是30分鐘煮好餸 但這個豬肺湯 連埋飛水 足足用了超過一小時 仍然未煲到夠火喉 家中無高速煲或電子煲的話 完全係嘥料兼浪費時間 Deliverz仲有個缺點 後面再講 Deliverz包裝明顯較簡單，一層又一層膠袋，剪膠袋都剪到手軟 同樣有保溫袋及冰袋，當天送貨時間是5pm左右，一般上班族應該未返到屋企，可由管理員代收 三餸一湯，用了約1.5小時才完成，點解咁耐？睇埋下面張相會更了解 啲豬骨、豬肉，每件都大件過我隻手，豬肉又有離奇黑點，要開砧板自己再切過，再順手切走啲肥肉 【#超級大伏—fusion】 Fusion 係3間中食物質素最差 明明有靚啲的食材，如黑毛豬肉、有機菜等 但全部要散買 如買調好味的餸包 就只有普通豬肉 我買了3個餸 最伏係個梅菜蒸肉餅 咸到配咗飯都食唔到 堅擔心食完會腎虧 結果全家3個人 加埋只勉強食到半碟 香草雞翼唔入味 同買無調味嘅雞翼無分別 另一伏位係個湯！ 豬肉韌到咬唔開 南北杏有「益」味 蘿蔔有苦味 飲一個飯碗咁多湯 已經完全唔想再飲第2碗 至於蔬菜 fusion無提供已洗好配湯的餸菜包 洗菜、切菜要用多唔少時間 有選擇困難症，入到超市，樣樣都揀好耐，而且放工時間勁多人排隊，單係呢個買餸程序，已用了35分鐘（排隊畀錢佔了15-20分鐘） 三餸一湯，由於要洗菜、切菜等（揀了西蘭花，要洗耐好多），用了超過1.5小時才完成 青紅蘿蔔湯，但蘿蔔苦、南北杏（益），啲材料差到煮餸好手，都要變地獄廚神 【論易煮程度】 3間都係已執好材料 不過講易整度 一定係Yummy Everyday及Deliverz 因為呢兩間連調味料都配好埋 但Deliverz配套係差咗啲 經WhatsApp 落單 我又唔知佢哋要問先會提供每個餸嘅煮法 結果，無蒸魚經驗下 煮到一半 突然唔知點做 望住隨魚附送嘅一樽無味嘅黃色水 幾片鮮檸檬及冬菇 手足無措 樽黃色水是一起蒸 似煮魚咁？ 定分開煲再淋上面呢？ 煮到一半再WhatsApp 問已太遲 我唯有靠網上其他人教學 估估下咁煮 仲有Deliverz 於Facebook 示範半小時煲好湯 如果信佢 就真係中伏 本身以為會切好的豬骨及豬肉 結果攞出袋後 件件大件過我手掌 無奈地攞砧板出嚟切細少少 又發現豬肉有黑點 切走埋 又多手切走肥肉 咁又用咗5-6分鐘 然後豬骨要先飛水 又用咗近10分鐘 我再明火煲咗近1小時 仍然係未夠火喉 感覺上浪費咗個豬肺湯！ 半小時煲湯？ 信就真係傻！ 至於超市餸包 唔算難整 但真係超難食 【論環保】 買預先執好嘅餸包 一定唔及自己買餸咁環保 不過有一間係抵讚嘅 就係Yummy Everyday 由於發現佢有重用保溫袋 會送水果小食 再WhatsApp 查詢 更發現原來佢嘅食物盒 都係用可分解材料 感覺上至少令你安心啲 無咁浪費及破壞地球先啦 至於Deliverz 網上無話回收個保溫袋 我亦未問佢個保溫袋會唔會回收 點解？ 因為我相信我未必會再用佢嘅服務 唔係因為佢啲食物差 只係煮一餐3餸1湯 單係包裝膠袋、膠兜、膠樽及調味盒咁 一共有20件塑膠垃圾 煮完飯望住堆膠袋 真係會覺得自己做錯事 好對唔住個地球囉！ 環保團體別聲討我，事前我真係唔知會用咁多膠袋去包裝幾個餸㗎！ 而且仲要好油，無法重用，唉！感覺好對唔住地球先生 【論價錢】 最平，一定係超級市場 3餸1湯$140有找 但再平都無用 全家食得好唔開心 建議超市以後提供啲貴少少的餸包 用靚啲嘅材料 如黑毛豬的餸包 吸引力會大增！ 仲有要控制下個調味 一係無味 一係咸死你 平衡啲得唔得呀？ Deliverz 3餸1湯$198 不過除了首次佢肯用呢個價錢送貨外 以後要買滿$300先肯送上門 咁買定兩日餸 又好似無咁新鮮咁... 不過呢間最特別 係個湯係足料畀你自己煲 有時間煲湯（或者有高速煲嘅家庭） 又唔想洗豬肺 更重要係唔介意有一堆膠袋垃圾嘅 都值得一試嘅 Deliverz湯料包是這樣的 Yummy Everyday 3餸1湯係$294 不過食材真心係貴料 新鮮黑毛豬 本地有機烏頭 自家農場菜 全部料喺出面自己買都貴好多啦 加上湯已煲好（有老火湯feel) 唔使再由豬肉飛水步驟做起 慳到唔少時間成本 對食物質素較有要求嘅家庭值得一試 當然如果個湯份量再多少少 或加多少少錢就再畀多一包湯之類 就更吸引了 Yummy Everyday個湯包裝係咁，味道係好有老火湯feel。 對於份量唔夠問題，我在呢間公司幾日後，whatsapp 調查服務態度時反映過，佢哋建議我下次第二個套餐會抵食啲，下次再試下。 3日測試的餐單如下： 《Yummy Everyday》 咸蛋蒸鯪魚豬肉餅（任你魚肉） 檸檬蒸本地有機烏頭魚 金銀蛋濃湯浸菜 金銀菜煲豬肺湯 《Deliverz》 鹹蛋蒸肉餅 芥菜檸檬蒸烏頭 上湯杞子浸時菜 菜乾豬肺湯 《fusion》 梅菜蒸肉餅 香草雞翼 杏鮑菇炒西蘭花 青紅蘿蔔豬骨湯 黃老太上
